Read kumam Jongolkop 5 Bible Online

Jongolkop 5 - kumam bible

Jongolkop 5

¹Cenge nono Debora kede Barak wot ka Abinoam oko wer be,

²“Pakunu Rwot! Jo me Isirael oweko yer wi gi odongo, di jo oko miire gin ken gi kede yomcuny ot i yi.

³Winyunu, wun abakai! Cikunu yit wu, wun jopug! Ango abino wer but Rwot, Rubanga me jo me Isirael.

⁴Rwot, kakame in bin iyai kede ki mori me Seir, kakame in bin iwok kede ki adul me Edom, piny bin oko yangere, di kot oko cwei ki edou. Ateteni idoun bin oko oonyo pii.

⁵Mori bin oyangere i nyim Rwot, akadi moru me Sinai da bin oyangere, i nyim Rwot, Rubanga me jo me Isirael.

⁶“I kare ka Samagar wot ka Anat, i kare ka Yayeri, jo bin oweko lubo gudi, di jo kame bin oto sapalin oko donyo lubo yote atino.

⁷Jo bin odak kiweko bomban me Isirael; bomban bin odong nono tuno in Debora bino; in bin iko bino bala toto me jo me Isirael.

⁸I kare kame jo me Isirael bin oyero kede rubangan apat anyen, yi bin oko bedo tie negi. Benyo, bin oko neno ebuku moro arabo tong moro but jo tutumia ot ongwon (40,000) me Isirael?

⁹Cunya tie i kom jotel me isirikalen me Isirael, jo kame bin oko miire ken gi kede yomcuny ot i yi. Pakunu Rwot!

¹⁰Tamunu kong pi kop nono, wun jo kame iwananunu pundan atar, wun jo kame ibedunu i ikekai me wel, kede wuda jo kame iotunu i yote kede tien wu.

¹¹Winyunu dwan jo atie wok ki kakame kotwomo kiye pii, gin kitie tatamo kite kame Rwot oko bwono kede jokwor, ekite kame jo me Isirael obwono kede jokwor! “Di do jo ka Rwot bin oko sirito ot i irutei gi.

¹²Debora we, cei, cei do! Cei, cei icak wer! Yai malo Barak, di iko telo yongayo ne jo kame in imako bala mabus, Okwe in wot ka Abinoam!

¹³Di do donge me jo kame bin koworo twatwal oko sirito wok piny; jo ka Rwot oko bino piny bute di kitieko iikere pi ot yi.

¹⁴Gin bin kiyai ki Epuraimu di kiko bino i aditot lubi, in Benjamin kede jo ni. Jotel yi bin osirito wok piny ki Makir, kede ki Sebulun jodongo me isirikalen oko bino.

¹⁵Jotel me ekeko ka Isakar bin obino kede Debora, kede jo me ekeko ka Isakar kame bin geno Barak; gin bin kiko onyaro kilube i aditot. Do jo me ekeko ka Ruben bin opokere; gin bin cuny gi oko bedo kede gung.

¹⁶Pinyo bo komio wun bin ikounu dong i anok me romini? Benyo, bin idongunu winyo bilo kame jokwat kuto pi lwongo romini? Jo me ekeko ka Ruben bin opokere; gin bin cuny gi oko bedo kede gung.

¹⁷Jo me ekeko ka Gilead bin odong loka tetuca me Yorodan. Pinyo bo komio bin jo me ekeko ka Dan odong i emeri, di jo me ekeko ka Aser bin oko dong bedo mot i dog nam, di kiko donyo bedo i idoketa?

¹⁸Jo me ekeko ka Sebulun obedo jo kocao to; jo me ekeko ka Naputali da kamanono, gin bin kicao kuo gi i ebar yi.

¹⁹“I Tanak, i nget ecilet me Megido, abakai bin obino di kiko yi; abakai me Kanan bin oko yi, do gin bin likame kiko yako siliba moro.

²⁰Acerin bin oko yi i malo i edou; gin bin kiyi kede Sisera di kioto i malo i edou,

²¹Alele me Kison bin omolo gi tenge, pii aringo me ecilet me Kison. Ango abino meede kede ot, abino meede ot kede teko!

²²Di do Asigiran oko bino di kitakaro, di tien gi mio piny mor.

²³“Malaika ka Rwot waco be ‘Lam Meros, lam kitek jo kame bedo kunono, pien gin bin likame kiko bino konyo Rwot, likame gin kiko bino yi pi Rwot.’

²⁴“Dako kame tie kede winyo kalamo mon apat en Yayeri, dako ka Keber dano me ekeko ka Ken, en kame etie kede winyo kalamo mon dedede kame bedo i iemai.

²⁵Sisera bin okwae pii, do en eko mine cak; en bin okelo ne mo me wi cak kede bakuli acil.

²⁶Yayeri bin omako loc me guro eema i cinge tetucel, di eko mako enyondo i cinge tetu cam; en bin eko tuco wi Sisera di eko bebelo cogo mere; en bin etuco wie i nget yite pelepel.

²⁷Sisera bin oko keto nyonyok piny, epoto piny di eko buto eling ti katien Yayeri. en enyongakin katiene di eko poto; epoto piny di eko to kanono.

²⁸“Toto me Sisera bin oko ngoloro ki dirisa; en eciko wange ngino ki dirisa, di eko penyere be, ‘Pinyo komio cabala mere ogal dwogo? Pinyo komio asigiran mege likame susunyo bino?’

²⁹Mon ariek kalamo kikom mon kame bin gwoke oko gamo doge, di en eko bedo nyogao yamo kene kene be,

³⁰‘Gin kitie udo jamini me ayaka di kipokopoko, sirikale acelacel tero nyako arabo anyira are, igoen acil kame kotubuso komio but Sisera, igoen are acil kame kongwangwaco kokelo nango me aruwa i nguta.’

³¹“Okwe Rwot, koto jokwor ni oto kamanono, do jo kame mari bed cal bala ceng kame wok kede teko mere!” Di anapakin bin oko bedo i lobo pi mwakini ot ongwon.