Read kumam Jongolkop 7 Bible Online

Jongolkop 7 - kumam bible

Jongolkop 7

¹Di do Egidioni kede isirikalen dedede kame bin tie bute oko dilo odiko sek di kiko gero kimere gi i nget atan me Karod. Jo Midian oudo ogero gida kimere gi i aditot kame bin tie i bad tetu malo, i nget emukura me More.

²Rwot bin oko waco ne Egidioni be, “Isirikalen kame tie buti tot twatwal, likame ango ayei mino jo Midian i cing gi. Gin cengemogo kiko romo paro be gin kibwono jo Midian gin ken gi, di kiko donyo wakere iye.

³Aso, nataman in wac kop noni di isirikalen dedede winyo be, ‘Ngatamoroni kame lwor, ngat kame kome tie miel, poore edok paco.’ ” Iepone nono Egidioni bin oko yeko gi. Jo tutumia ot are kiwie are (22,000) bin oko dok paco, di jo tutumia tomon (10,000) en kame bin oko dong.

⁴Rwot bin oko waco ne Egidioni be, “Isirikalen pwodi tot twatwal. Ter gi i pii, di ango ako bino yeko gi ne in i kunono. Ka ango awaco ni be, ‘Dano ni bino ot kedi,’ en ebino ot kedi. Doko ka ango awaco be, ‘Dano ni likame bino ot kedi,’ en likame ebino ot.”

⁵Egidioni bin oko tero isirikalen i pii, di Rwot oko waco ne be, “In ibino poko i bad tetucel jo dedede kame jakjako pii kede leb gi bala ogwok, di iko poko i bad tetu ocelu da jo dedede kame bino riondiko piny pi mato pii.”

⁶Jo tol adek en kame bin oko jakjako pii kede leb gi; do isirikalen apat dedede bin oko riondiko piny pi mato pii.

⁷Rwot bin oko waco ne Egidioni be, “Ango abino tic kede isirikalen tol adek kame oudo ojakjako pii kede leb gi di ako lako wu, ako bino mino jo Midian i cing wu. Wace jo apat dedede dok paco.”

⁸Egidioni bin oko gamo jagin kede agwara kibut gi; di eko cwano gin dedede kidok i miere gi, kwanyo kenekene isirikalen tol adek nogo en kame bin oko dong. Kimere me jo Midian bin tie pipiny gin i aditot.

⁹Iwor me ceng nono Rwot oko waco ne Egidioni be, “Yai iko ot suro jo Midian i kimere gi; pien ango atieko mino gin i cingi.

¹⁰Do ka itie kede lworo me suro gi, ot kong i kimere gin kunono kede ngatic ni Pura.

¹¹In ibino winyo gikame gin kitie waco, di do in iko bino bedo kede nwangcuny me suro gi.” Egidioni bin oko ot kede ngatic mere Pura i kimere me isirikalen me jo Midian.

¹²Jo Midian, jo Amelek, kede jo dedede kame bin owok ki tetu kide oudo oraramun i aditot bala obonyo; doko aguraguran gin oudo likame marere bala asinge me dog nam.

¹³Kakame Egidioni bin otuno kede, eko winyo icuo acel di tie tatamo ne ngawote gikame oudo eleko. En oudo etie waco ne ngawote be, “Ango tin aleko be mugati kame kotimo kede mawele olor ebino i kimere wa di eko dipo kima paka loko ataru.”

¹⁴Ngawote bin oko gamo be, “Manono kom obedo epima me dano me Isirael, Egidioni wot ka Yowasi! Likame gimoro apat! Rubanga otieko mino wan jo me Midian kede isirikalen dedede i cinge!”

¹⁵Kakame Egidioni otieko winyo kede itatam amako lek me icuo nono kede dwong me lek nono, en eko woro Rwot. Di do eko dok i kimere me jo me Isirael di eko waco negi be, “Yaunu! Rwot otieko mino isirikalen me Midian i cing wu!”

¹⁶Egidioni bin oko popoko isirikalen mege tol adek (300) nogo i ikodeta adek di eko mino dano acelacel agwara kede jagi kame koketo mac aliel i yie.

¹⁷En bin ewaco negi be, “Ka ango atuno i nget kimere gin, nenunu gikame ango atimo, di wuda ikounu timo kamanono.

¹⁸Ka ango kede jo me ekodet na okuto agwara, wuda kutunu megu rimaro kimere gin di ikounu lelemo be, ‘Pi Rwot kede Egidioni!’ ”

¹⁹Aso, Egidioni kede jo tol acel kame bin tie kede en oko ot paka tuno i nget kimere me jo Midian i dier iwor, iesawa kame oudo pwodi oloko kede isirikalen jodar aloka. Di gin kiko kuto agwara di kiko neneko jagi kame oudo kimako i cing gi,

²⁰di ikodeta are icegun ka da oko timo kamanono. Gin dedede kiko mako mac aliel i cing gi tetu ngodal, kede agwarai i cing gi tetu cam, di kiko lelemo be, “Epima pi Rwot kede Egidioni!”

²¹Dano acelacel di oko cungo kare rimaro kimere me jo Midian, di isirikalen dedede me jo Midian oko ringo tenge di kidwilao kede koko.

²²Kakame jo ka Egidioni bin tie kuto kede agwara, Rwot oko mino jo Midian olokere cocobo jowot gi ken gi ken gi kede ipimai gi. Isirikalen gin bin oko ringo tetu Saretan paka tuno Bet Sita, ape tuno i ikor me bomba me Abel-mekola, i nget Tabat.

²³Di do bin oko lwongo jo me Isirael ki ikekon ka Naputali, Aser, kede me ka Manase are dedede, di gin kiko wapo jo Midian.

²⁴Egidioni bin oko cwano jo i piny kobedo mori mori me Epuraimu pi waco ne jo me kunono be, “Wokunu piny yi kede jo Midian. Makunu ecilet me Yorodan kede icileta dedede paka tuno Bet Bara.”

²⁵Gin bin kiko mako jotel are me Midian, Oreb kede Seeb; gin kiko neko Oreb i lela me Oreb, kede Seeb kiko neko kabedo me biino olok ka Seeb. Magonogo gin bin kitimo di kitie wapo jo Midian. Gin bin kiko tero wi Oreb kede me ka Seeb but Egidioni loka tetuca me ecilet me Yorodan.