Read kumam Jongolkop 8 Bible Online

Jongolkop 8 - kumam bible

Jongolkop 8

¹Di do jo me Epuraimu oko waco ne Egidioni be, “Nyo ine kame in iko timo ne wan? Neningo, in likame ilwongo wa i kare kame in oudo ioto yi kede jo Midian!” Di gin kiko lok i kop nono kitek.

²Do en eko waco negi be, “Gikame ango ako timo likame kokaruno poro kede gikame wun itiekunu timo. Iparunu be raro olok kame jo Epuraimu otimo likame ber kalamo ngwedo olok kame jo Abieser otimo?

³Rubanga oko mino i cing wun jotel me Midian, Oreb kede Seeb; nyo kame ango atieko timo kame koromo poro kede meru?” Kakame en bin eko waco kede kamano, di do cuny gi oko kwei.

⁴Di do Egidioni bin oko tuno i ecilet me Yorodan di eko ngolo loka tetuca, en karacel kede jo tol adek kame bin tie kede en. Gin oudo kiol twatwal, do oudo pwodi kitie wapo jokwor.

⁵Kakame gin bin kiko tuno kede i bomba me Sukot, en eko waco ne jo me bomba nono be, “Ango akwao wu imiunu jo na mugati mogo. Gin kiol twatwal, doko ango pwodi atie wapo Seba kede Salamuna, abakai me jo Midian.”

⁶Do jotel me Sukot oko gamo be, “Benyo, mam in itieko mako Seba kede Salamuna en kame mio poore wan omi isirikalen nin mugati?”

⁷Egidioni oko gamo be, “Manono ber! Ka Rwot otieko mino Seba kede Salamuna i cinga, abino popoo komu kede okuto me wi tim!”

⁸Egidioni bin oko yai di eko ot Penuel, di en eko kwano jo me kunono da kamanono, do jo me Penuel da oko dwoko ne kop acel nono kame jo me Sukot oudo owaco ne.

⁹Aso, en bin eko waco ne jo me Penuel be, “I ceng kame ango abino dwogo kede kan i mulem, ango abino tuturo gedo wu abor malo noni.”

¹⁰I kare nono Seba kede Salamuna oudo tie Karakor kede isirikalen gi, kame wel gi romo tutumia tomon kiwie kany (15,000). Gin en isirikalen kame bin odong kikom isirikalen dedede me jo me tetu kide; pien oudo koneko isirikalen gin tutumia tol acel kede ot are (120,000).

¹¹Egidioni bin oko ot di eko lubo yongayo kame ririo lak wi tim, i bad tetu kide me Noba kede Yogobeka, di eko ngeso suro isirikalen nogo.

¹²Seba kede Salamuna bin oko ringo, do en eko riamere kede gi paka mako gi, di manono oko mielo kom isirikalen lung.

¹³Kakame bin Egidioni wot ka Yowasi tie dwogo kede ki yi di ebeo ki kakame yito Keres,

¹⁴en bin eko mako atin awobi me Sukot di eko pepenyo en. Atin awobi nono bin oko wandiko ne Egidioni nying cuo ot kanyaare kiwie kanyaare kobedo jotic adongo kede joadongo me Sukot.

¹⁵Di do Egidioni oko ot but jo me Sukot di eko penyo gi be, “Benyo, iyutununu kare kame bin wun idagunu konya kede? Wun bin iwacunu na be likame ikarununu mino cam but isirikalen na kame oudo ool, pien oudo pwodi ango likame amako Seba kede Salamuna. Aso, nataman gin ige!”

¹⁶En bin eko kwanyo okuto me wi tim di eko donyo tojo kede jotel me Sukot.

¹⁷En bin eko da tuturo gedo abor malo me Penuel, di eko neko jo me bomba nono.

¹⁸Di do Egidioni oko penyo Seba kede Salamuna be, “Do jo kame bin inekunu i Tabor kono?” Gin kiko gamo be, “Gin dedede oudo kical bala in; oudo kical bala awobe ka abaka.”

¹⁹Egidioni bin oko waco negi be, “Gin oudo imiegu nango, idwe ka toto na. Ango akwongere be ka koto wun bin likame inekunu gin, ango da koto likame aneko wu.”

²⁰Di en eko waco ne Yeter, kao mere be, “Oti inek gi!” Do lworo oko mako Yeter omio likame eko woto epima mere, piento en pwodi oudo etie atin awobi.

²¹Di do Seba kede Salamuna oko waco ne Egidioni be, “In bia inek wan in kikomi; pien icuo en kame karuno timo tic me icuo.” Aso, Egidioni bin oko neko gi di eko tero alung kame oudo tie i ngut aguraguran gi.

²²Ingei manono jo me Isirael oko waco ne Egidioni be, “In bed ngapug wan, in kede wodi kede ikwae ni da; pien in itieko lako wan ki cing jo Midian.”

²³Egidioni oko gamo be, “Ango likame abino bedo ngapug wun, akadi woda da. Rwot en kame bino pugo wun.”

²⁴Di eko meede waco negi be, “Wekunu kong akwai wu gi acel; wun dedede mianu mwolere me yit kame iyakunu.” (Jo Midian oudo bin ngapo mwolere kame kotimo kede saabu, pien gida oudo kibedo jo ka Isimael.)

²⁵Jo oko gamo be, “Wan obino mino gin buti kede yomcuny.” Gin bin kiko peto egoe piny, di jo dedede oko keto iye mwolere kame oudo gin kiyako.

²⁶Mwolere me saabu kame Egidioni bin oko gamo oudo peko gi romo kilo ot are, di likame iribo iye jamini me tubuso kom kede irikoi me ngut, kede igoen akwakwar kame abakai me jo Midian bin ngapo, kede rakoban kame bin kotweo i ngut aguraguran.

²⁷Egidioni bin oko timo epod kede saabu nogo di eko kete Opura, bomba me turgi. Jo dedede me Isirael bin oko donyo ot woro caljwogi nono kunono. Gi nono bin oko doko bala owic but Egidioni kede jo me ode.

²⁸Aso, jo me Isirael bin oko bwono jo Midian, di likame bobo jo Midian oko woto wi gi atwal. Anapakin bin oko bedo i lobo pi mwakini ot ongwon i kare ka Egidioni.

²⁹Egidioni bin oko dok bedo paco mere.

³⁰En bin etie kede awobe ot kanyaare, pien oudo etie kede mon atot.

³¹En bin etie kede da dako kalikame enyomo kame oudo en ebedo kede Sekem. Dako nono bin oko nywalo ne atin awobi, di en eko cako nyinge be Abimelek.

³²Egidioni wot ka Yowasi bin oko to di oudo etieko ti kiber, di oko yike Opura, bomba me jo Abieser, i ates ka papa mere Yowasi.

³³Oyotoyot di Egidioni otieko to, jo me Isirael oko bobo dok cen i kuo me woro Baal. Gin bin kiko mino Baal kame gin oudo kitimo isikan kede oko doko rubanga gin.

³⁴Jo me Isirael likame oko bin yutuno Rwot Rubanga gin, ngat kame bin olako gin ki cing jokwor gi kame oudo oluko gi ki bad dedede.

³⁵Gin likame bin kiko nyuto cuny moro me pwoc but jo me ot ka Yerubaal (manono en Egidioni), pi bero dedede kame en oudo etimo ne jo me Isirael.