Read kumam Gianyuta 14 Bible Online

Gianyuta 14 - kumam bible

Gianyuta 14

¹Di ango ako neno Katin Romo di etie cungo i wi moru me Sion. Oudo etie karacel kede jo tutumia tol acel kede ot ongwon kiwie ongwon, jo kame kowandiko nyinge kede nying Papa mere i tur nyim gi.

²Ango di ako winyo dwan moro kame wok ki malo, kame mor bala pii atot kame mol di ony, kede bala mwoc atek me kot. Dwan kame ango awinyo nono oudo cal bala me adungu kame jogoc tie gono.

³Jo nogo oudo tie wero wer anyen i nyim kom me ajakanut, i nyim giacwea akuo ongwon kede i nyim joadongo. Oudo likame tie ngatamoro kame karuno mako wer nono kwanyo kenekene jo tutumia tol acel kede ot ongwon kiwie ongwon, kame oudo kotieko lako ki lobo.

⁴Gin en cuo kalikame omunaun kede mito mon, pien gin kigwokere likame kibilo timo mit. Gin nakanaka kilubo Katin Romo kabedere dedede kame en eoto iye. Jo nogi en kame kolako kikom jo dedede, pi bedo bala dul me agege me kac kame komio but Rubanga kede but Katin Romo.

⁵Likame tie kop moro me angalo kame owok ki dog gi, pien gin kili kede raco moro.

⁶Di ako neno malaika ace di tie por i malo i dier yamo, di etie kede ejiri kame bedo nakanaka, pi tuco ne jo kame bedo i wi lobo, ne jo me atekerin dedede, abilere dedede, leb dedede kede jo me erangi dedede.

⁷Di en eko waco kede dwan amalo be, “Lworunu Rubanga di ikounu mine deyo, pien esawa mere me ngolo kop otieko tuno. Worenu, en ngat kame ecweo malo kede lobo, nam kede ataneko me pii.”

⁸Malaika ace, me are mere, di oko lubo di ewaco be, “Epoto, Babilon adwong otieko poto! En emio atekerin dedede omato bwini mere, en tim mere me caro kame kelo lilo ka Rubanga.”

⁹Malaika ace me adek mere oko lubo di ewaco kede dwan amalo be, “Ka ngatamoro oworo le kede cal mere, di oko keto ne alama i tur nyime arabo i cinge,

¹⁰eda ebino mato bwini ka Rubanga, en lilo mere, kame eonyo di kec i ikopo me gero mere. Doko kobino mine acana kede mac kede salupa i nyim imalaikan kacil kede Katin Romo.

¹¹Yiro me mac kame kocano gi kede duny eoto malo ikar kede ikar. Jo kame woro le nono kede cal mere, kede jo kame koketo ne gi alama me nyinge, gin kibino neno can iwor kede iceng abongo wei.”

¹²Man tie lwongo but jokacil pi kanyakino, jo kame gwoko cik ka Rubanga kede kame moko i yei gi i kom Yesu.

¹³Di ako winyo dwan moro kame wok ki malo di waco be, “Wandiko kop ni: cako nan, kitie kede winyo jo kame to di kitie i Rwot.” Tipo oko dwoko be, “Ateteni kitie kede winyo. Gin kibino wei ki lole gi, pien tice gi upere kede gi.”

¹⁴Di ako neno edou atar, di ngat kame tie bedo i wie cal bala Wot ka dano. Oudo engapo ocoro me ajakanut i wie kame kotimo kede saabu, di pala abit me kac tie i cinge.

¹⁵Di malaika ace oko wok ki tempulo di elwongo ngat kame oudo tie bedo i wi edou atar nono kede dwan amalo be, “Cak do tic kede pala ni, pien esawa me kac do otieko romo; gikame poore kai i wi lobo otieko cek kiber.”

¹⁶Aso, ngat kame oudo bedo i wi edou oko kiarao pala mere me kac i wi lobo, di en eko kano kac kame tie i wi lobo.

¹⁷Di malaika ace bobo oko wok ki tempulo kame tie malo, eda oudo emako pala abit me kac.

¹⁸Di malaika ace, kame tie kede twer i kom mac, oko wok ki alutari. En eko lwongo ngat kame oudo mako pala abit me kac kede dwan amalo be, “Cak do tic kede pala ni, di iko coko abungeta me olok me wi lobo, pien anyakini mege otieko cek.”

¹⁹Di malaika nono oko kiarao pala mere me kac i wi lobo, di eko nyaro anyakini me olok me wi lobo di eko uco gi i bur me bino bwini, kame obedo gero ka Rubanga.

²⁰Di oko nyonyono olok pi bine i ooko me bomba, di remo oko mol ki bur me bino olok nono kame rom mere ibamurur puti kany, kede kame alele mere bor romo mairo tol are.