Read kumam Gianyuta 17 Bible Online

Gianyuta 17 - kumam bible

Gianyuta 17

¹Di malaika acel kikom imalaikan kanyaare kame oudo mako bakulin kanyaare ka oko bino di eko waco na be, “Bia anyut ni alola kame koyaro mino twon malaya no, kame obedo bomba kame tie i nget icileta atot.

²Abakai me wi lobo otieko timo kede en tim me caro, doko jo kame bedo i wi lobo otieko mer kede bwini mere, en tim mere me caro.”

³Twer me Tipo oko uma di malaika nono oko tinga etera i tim, di ako neno dako moro di etie bedo ingei le akwar kame oudo kowandiko i kome lung nying kame nyuto acae i kom Rubanga. Le nono oudo tie kede wie kanyaare kede tunge tomon.

⁴Dako nono oudo ngapo igoen akwakwar kede kame kwar bubu, di etubuso kome kede saabu, mwolere kede bira me wel. Oudo emako ikopo kame otimo kede saabu i cinge, di gikame neno rac kede gi me emuna kame nyuto caro mere opong iye.

⁵Oudo kowandiko i tur nyime nying kame obedo gi komungere be, “Babilon adwong, toto me imalayan kede me jo me wi lobo kame timo tim me emuna.”

⁶Di ako neno dako nono di emer kede remo me jokacil kede remo me ijurak ka Yesu. Kakame anene kede, ako uro twatwal.

⁷Do malaika oko penya be, “Pinyo komio iuro? Ango ayaro yamo ni dwong me gi komungere kame mako dako no, kede kame mako le kame biele, le kame tie kede wie kanyaare kede tunge tomon.

⁸Le kame oudo ineno nono oudo kuo, do nataman likame ekuo, do eyapuno wok ki bur kame tut wiriwir pi ot di oko dudubo en. Jo kame bedo i wi lobo, jo kalikame kowandiko nying gi i itabu me kuo cako di pwodi likame kocweo piny bino bedo kede ur ka kineno le nono, pien bin oudo ekuo, do nataman likame ekuo, doko ebino bino.

⁹“Manoni mito tam atek kede rieko. Wic kanyaare obedo mori kanyaare kame dako nono tie bedo i wi gi, gin nogo da kibedo abakai kanyaare.

¹⁰Kany kikom gi otieko doko li, acel pwodi tie, do ocelu mere likame pwodi obino; kame en ebino, miero ebed pi kare moro acecek.

¹¹Do le kame oudo bin kuo do nataman likame ekuo, obedo abaka me kanyauni mere, do en ngat acel kikom abakai kanyaare nogo, en etie ot di oko bino dudubo en.

¹²“Tung le tomon kame oudo in ineno, obedo abakai tomon kalikame pwodi komio twer me pug, do kobino mino gi akarunikin bala abakai pi esawa acel, karacel kede le nono.

¹³Abakai tomon nogi dedede oribo tam acel me mino twer kede akarunikin gi but le.

¹⁴Gin kibino yi kede Katin Romo. Do Katin Romo karacel kede jo mege kame elwongo, jo kame en eyero, kame genere, bino bwono gi, piento en ebedo Rwot me rwode kede Abaka me abakai.”

¹⁵Malaika nono oko waco na be, “Pii kame oudo ineno, kakame malaya nono tie bedo iye, obedo jo apapat, jo me erangi apapat, atekerin kede leb apapat dedede.

¹⁶Tung le tomon kame in oudo ineno, gin karacel kede le kibino dagi malaya nono; gin kibino tero jame dedede kame en etie kede di kiko weke nono abongo gimoro; kibino camo ringokome di kiko wange kede mac.

¹⁷Pien Rubanga otieko keto i cuny gi mit me cobo iik mere, en emio gi kibedo kede tam acel me mino le twer gi me pug, tuno di kop ka Rubanga ocobere.

¹⁸“Dako kame in oudo ineno nono en bomba adwong kame pugo abakai me wi lobo lung.”