Read kumam Gianyuta 18 Bible Online

Gianyuta 18 - kumam bible

Gianyuta 18

¹Ingei man ango ako neno malaika ace di tie wok ki malo ebino piny di etie kede akarunikin adwong, deyo mere oko caro lobo lung.

²En di eko redo kede dwan amalo be, “Epoto, Babilon adwong otieko poto! Etieko lokere edoko kabedo me jwogi kede kapwono me tipere areco dedede; kapwono me winy dedede areco kame jo dagi.

³Atekerin dedede omato bwini mere me caro mere. Abakai me wi lobo otieko timo kede tim me caro, doko jocat me wi lobo otieko baro i wi caro mere kalikame dire.”

⁴Di ako winyo dwan moro ace kame wok ki malo di waco be, “Jo na, yaunu tenge kibute, me wek kur idonyunu i dub mege, kede me wek kur inywakunu alola mege.

⁵Pien dub mege ocokere ikumemei tuno i malo, doko Rubanga otieko yutuno tim mege areco.

⁶Terenu iepone kame eda etero wu kede, doko culenu tien are pi gikame etimo. Nyalunu ne giamata i ikopo kame en oudo enyalo ne jo iye, kame kec kalamo meren tien are.

⁷Bala kame en oudo emio kede kome deyo di etie kede kuo ajabajaba, aso wuda mienu can kede iturur kame rom kede magonogo. Bala kame en ewaco kede i cunye kene be, ‘Ango abedo abaka adako! Ango likame apuserut, likame abino bilo iturur,’

⁸pi mano, alola nogi bino bino ne i ceng acel: tuo, iturur kede kec. Doko kobino wange kede mac, pien Rwot Rubanga ngat kame ngolo ne kop tie kede twer adwong.”

⁹Abakai me wi lobo, kame bin otimo kede tim me caro, kede kame olubo mit mege, bino kok di kibebelo pire ka kineno yiro me wang mere di duny.

¹⁰Gin kibino cungo tenge kakabor pi lworo can kame komie, di kiwaco be, “Otukwi can! Otukwi can! In bomba adwong! In Babilon bomba atek! Kop kame ongolo ni opoto i komi iesawa acel kenekene!”

¹¹Jocat me wi lobo ko bino kok di kitururo pire, pien likame bobo tie ngatamoro kame bino wilo jame gi,

¹²jame kame obedo saabu, siliba, mwolere, bira me wel, igoen ameny, igoen akwakwar, silik kede igoen akwar bubu, egere dedede me yen angwe kur kame kotimo ebao, jame dedede kame kotimo kede lak lyec, kede yen me wel amalo me timo ibaon, nyonyo burons, nyonyo ayon kede kidi mabol,

¹³sinamon, gikame ngwe kur, bubani, mura, odok me adunya angwe kur, bwini, mo, alos kame konungo kede engano, doke kede romini, asigiran kede cabalan, kede ipasoi, gin en kuo me jo.

¹⁴Gin kibino waco ne be, “Gi dedede kame oudo cunyi paro otieko yai kibuti, doko abar kede deyo nin dedede otieko yai, likame bobo ibino udo gi!”

¹⁵Jo kame cato jame nogi, jo kame oudo abar gi ki bomba noni, bino cungo tenge kakabor pi lworo can kame komie. Gin kibino kok kitek di kitururo,

¹⁶di kiwaco be, “Otukwi can, otukwi can! Bomba adwong, kame oudo ngapo egoe ameny, egoe akwakwar kede egoe akwar bubu, di etubuso kome kede saabu, mwolere kede bira me wel!

¹⁷Komio lonyo noni kony mere odoko li iesawa acel kenekene.” Jodongo dedede me jokwang emeri kede jo dedede kame emeri tero, jokwang karacel kede jo dedede kame udo sente ki tice kame makere kede ngolo nam, oko cungo tenge kakabor.

¹⁸Kakame kineno kede yiro me wang mere di tie duny, kiko kok di kiwaco be, “Bomba mene en kame oudo cal bala bomba adwong noni?”

¹⁹Di kiko donyo kiro asinge i wi gi di kikok kede di kitururo, di kiwaco be, “Otukwi can, otukwi can me bomba adwong! Jo dedede kame oudo tie kede imerin i nam oudo abar pi lonyo mere! Iesawa acel kenekene kotieko mino kony mere odoko li.”

²⁰Leli i wie in malo, lelunu wun jokacil, kede joor kede inabin, pien Rubanga otieko ngolo ne kop piru.

²¹Di malaika kame tek oko tingo kidi moro kame rom kede kidi me riego, di eko lwome i nam adwong di ewaco be, “Kobino reto Babilon bomba adwong piny iepone noni kede twon teko, di likame oko bobo bino nene atwal.

²²Koko me adungu kede dwan jo kame tie kede diru me wer, kede koko me bilo, kede koko me agwara, likame bobo kobino winyo i yi in. Likame bobo tie ngadiru me tic moro kame kobino udo i yi in, doko mor me kidi me riego bobo likame bino winyere i yi in.

²³Likame bobo kobino neno liel me etala moro i yi in, akadi dwan ateran kede eteran likame bobo kobino winyo i yi in. Pien jocat ni oudo obedo jo kame pirgi tek i wi lobo, doko in oudo ingalo atekerin dedede kede tim ni me jwok.

²⁴Remo me inabin kede me jokacil, kede remo me jo dedede kame oudo koneko i wi lobo, bin koudo i yi in.”