Read kumam Gianyuta 2 Bible Online

Gianyuta 2 - kumam bible

Gianyuta 2

¹“Wandiko but malaika me ekodet me jokirisito kame tie Epeso be: “Magi en kop me ngat kame mako acerin kanyaare i cinge tetu cam, en ngat kame eoto ki diere me jamini kanyaare me cibo italan, kame kotimo kede saabu.

²Ango angeo tice wu, cane wu, kite kame idiunu kede cunyu, ikanyakin kede epone kalikame wun ikarununu kanyo kede tim me jo areco, do wun itiekunu tamo jo kame lwongere ken gi be joor do di li, di ikounu udo be gin kingalo.

³Ango bobo angeo da be wun itienu dino cunyu, itienu kanyo can pi nyinga, doko likame pwodi iolunu.

⁴Do ango atie kede kop i komu be, wun itiekunu weko amara kame oudo itienu kede i agege.

⁵Pi mano, yutununu kong kite kame oudo itienu kede di pwodi likame ipotunu. Swilaronu ki dub wu di ikounu timo gikame oudo itimunu i agege. Aso ka li, ango ayaro bino di ako kwanyo gi me cibo etala wu ki kabedo mere, kwanyo ka iswilarunu.

⁶Do gikaber kibutu en ine be, wun idagunu tice me jo ka Nikolau, bala ada.

⁷“Ngat kame tie kede yite, wek ewinyi gikame Tipo tie waco ne ikodeta me jokirisito. “Ngat kame bino lono, abino mine ecamo anyakini me yat me kuo, kame tie i paradis ka Rubanga.

⁸“Wandiko but malaika me ekodet me jokirisito kame tie Simuna be: “Magi en kop me ngat kobedo me agege kede me ajikini, ngat kame oudo oto di eko kuo bobo.

⁹Ango angeo peko wu, doko angeo be wun ibedunu jocan (do ateteni wun ibarunu). Ango angeo kope areco kame jo kame waco be gin Iyudayan, do di li, yamo i komu; gin kitie jo me sinagoga ka Sitani.

¹⁰Kur ilworunu can kame iyapununu beo iye. Nenunu, Sitani oyapuno mino korwako jo mogo kikom wu i otkol, tetekeny kotamu di ikounu bedo kede peko pi ceng tomon. Bedunu jo kame genere tuno i to, di ango ako bino mino wu kuo bala giamia pi lono.

¹¹“Ngat kame tie kede yite, wek ewinyi gikame Tipo tie waco ne ikodeta me jokirisito. “Ngat kame lo, bino bwot ki to me are.

¹²“Wandiko but malaika me ekodet me jokirisito kame tie Peregamu be: “Magi en kop me ngat kame tie kede epima kame bit tuni tuni.

¹³Ango angeo kakame wun itienu bedo iye, en kakame kom me ajakanut ka Sitani tie iye. Wun imokunu i nyinga, doko likame iwekunu yei ango akadi i kare ka Antipa mujura na, dano na kame genere, kame bin koneko i diere wu, kakame Sitani bedo iye.

¹⁴Do ango atie kede kope mogo anonok i komu: wun itienu kede jo mogo kuno kame lubo pwony ka Balaam, ngat kame bin opwonyo Balak keto gikame getaro jo me Isirael, me wek kicam cam kame koyalo ne cal jwogi, kede kitim caro.

¹⁵Iepone acel nono da wuda itienu kede jo mogo kame lubo pwony me jo ka Nikolau.

¹⁶Pi mano, swilaronu. Aso ka li, ango ayaro bino butu i kare kiyapiyapi di ako yi kede gin kede epima kame tie i doga.

¹⁷“Ngat kame tie kede yite, wek ewinyi gikame Tipo tie waco ne ikodeta me jokirisito. “Ngat kame bino lono, ango abino mine emana mogo kame kokano. Abino mine kidi atar, kame kowandiko iye nying kanyen kalikame tie ngatamoro kame ngeo, kwanyo kenekene ngat kame tie game.

¹⁸“Wandiko but malaika me ekodet me jokirisito kame tie Tuatira be: “Magi en kop kowok kibut Wot ka Rubanga, ngat kame wange cal bala leb mac, kede kame tiene cal bala nyonyo burons kame korudo.

¹⁹Ango angeo tice wu, amara wu, yei wu, gikame itimunu pi konyo jo, kede epone kame idiunu kede cunyu kanyakino. Ango angeo be tice wu kame itimunu i cen beco kalamo kame igeunu timo.

²⁰Do ango atie kede kop i komu: wun kom iwekunu aweka dako kame nyinge Jesebel no, ngat kame lwongere kene be enabi, doko etie pwonyo kede ngangalo jotic na pi timo caro, kede camo cam kame koyalo ne cal jwogi.

²¹Ango oudo amie kare me swilaro, do en edagi swilaro ki tim mege me caro.

²²Nenunu, ango ayaro mino aramo rete i apien, di ako mino jo kame timo kede en adote can alit, kwanyo ka kiswilaro ki tim mege.

²³Ango abino neko idwe mege, gin en jo kame lube, di ikodeta dedede me jokirisito ko bino ngeno be ango en ngat kame angeo tam me jo kede gikame tie i cuny jo, doko abino mino ngat acelacel gikame poore kede tice mege.

²⁴“Do wun jo apat kame itienu Tuatira, jo kalikame lubo pwony noni, wun jo kalikame ipwonyerenu i kom gikame jo mogo lwongo be mung atut ka Sitani, ango awaco ne wu be, ango likame amio wu gimoro ace kame dio wu;

²⁵kenekene makunu kitek gikame itienu kede, tuno ango bino.

²⁶Ngat kame bino lono kede kame meede timo tic na tuno i ajikini, ango abino mine akarunikin i kom atekerin, bala kame ada agamo kede akarunikin kibut Papa na. Di en eko bino pugo gi kede ebela me lilim, di eko ngingido gi bala agulu kame ongingidun.

²⁸Doko ango abino mine acer me odiko.[1]

²⁹“Ngat kame tie kede yite, wek ewinyi gikame Tipo tie waco ne ikodeta me jokirisito.