Read kumam Gianyuta 20 Bible Online

Gianyuta 20 - kumam bible

Gianyuta 20

¹Di ako neno malaika moro di tie wok ki malo bino piny, di emako i cinge sumilito me bur atut wiriwir kede twon eriko.

²En eko mako twol kiyiliyili, twol me anakacia, en Sitani, di eko twene pi mwakini tutumia acel.

³Malaika oko uce i bur atut wiriwir nono, eko cego doge, di eko mwone iye, tetekeny kur bobo engal atekerin, paka tuno di mwakini tutumia acel otiek. Ingei mano miero gonye pi kare acecek.

⁴Di ako neno komini me ajakanuto; jo kame bedo i wi gi oudo komio gi twer me ngolo kop. Di ako neno tipere me jo kame oudo kongolo ngut gi pi mino ijura i kom Yesu kede pi kop ka Rubanga. Oudo gin likame kiworo le akadi cal mere, doko da oudo gin likame kiyei keto alama i tur nyim gi amoto i cing gi. Gin kiko dwogo i kuo di kiko pug karacel kede Kirisito pi mwakini tutumia acel.

⁵Jo oto apat likame oko dwogo i kuo tuno di mwakini tutumia acel otiek. Manoni en iyarun me agege.

⁶Kitie kede winyo doko kicil, gin jo kame kibino nywako iyarun me agege. To me are likame tie kede twer i kom akodi jo nogo, do gin kiyaro bedo josaseredoti ka Rubanga kede me ka Kirisito, di gin kiko bino pug karacel kede en pi mwakini tutumia acel.

⁷Di mwakini tutumia acel otiek, kobino gonyo Sitani ki otkol mere,

⁸di en eko wok ot ngalo jo me atekerin kame tie i bad ongwon me lobo, en Gog kede Magog, pi coko gi ot yi. Gin kitot bala asinge me dog nam.

⁹Gin kiko jwiao kioto i wi lobo lung, kiko luko kabedo me jokacil, bomba kame Rubanga maro. Do mac oko cwei ki malo oko neko gin dedede.

¹⁰Di oko uco Sitani kame oudo ongalo gi i nam me mac kede me salupa, kakame le kede enabi me angalo oudo tie iye. Gin kibino neno can iwor kede iceng ikar kede ikar.

¹¹Di ako neno twon kom moro atar me ajakanut kede ngat kame oudo bedo iye. Lobo kede malo oko rwenyo wir ki nyime, di kargi oko doko li.

¹²Di ako neno jo oto, me ruom amalo kede me ruom apiny, di kitie cungo i nyim kom me ajakanut nono. Oko yabo itabun, doko di oko yabo itabu moro ace, kame obedo itabu me kuo. Di oko ngolo ne jo oto kop di lubere kede gikame oudo kitimo, kame oudo kowandiko i itabun nogo.

¹³Di nam adwong oko cwano jo oto kame oudo tie iye. To kede kabedo me jo oto da oko cwano jo oto kame oudo tie i yi gi, di oko ngolo ne gin dedede kop di lubere kede gikame oudo kitimo.

¹⁴Di oko uco to kede kabedo me jo oto i nam me mac. Nam me mac noni en to me are.

¹⁵Ngatamoro kalikame bin koudo be kowandiko nyinge i itabu me kuo, oudo kouce i nam me mac.