Read kumam Gianyuta 6 Bible Online

Gianyuta 6 - kumam bible

Gianyuta 6

¹Di ako neno Katin Romo di yabo acel i kom amwon kame kododoko tien kanyaare nogo. Ako winyo acel kikom giacwea akuo ongwon di waco kede dwan kame mor bala mwoc me kot be, “Bia!”

²Di ako neno asigira atar, ngat kame wanano en oudo mako emal; di oko mine ocoro me angosibib. En eko ot di elo yi, doko me wek edony lono yi.

³Kakame eyabo kede amwon me are mere, ako winyo di giacwea akuo me are mere waco be, “Bia!”

⁴Di asigira ace kame kwar oko wok. Di oko yei ne ngat kame wanano en kwanyo mulem ki wi lobo, tetekeny jo nekere ken gi ken gi; di oko mine twon epima.

⁵Kakame eyabo kede amwon me adek, ako winyo giacwea akuo me adek mere di waco be, “Bia!” Ango di ako neno asigira kame col, di ngat kame wanano en oudo tie kede misani i cinge.

⁶Ako winyo dwan kame cal bala me dano, di wok ki diere me giacwea akuo ongwon di waco be, “Kilo acel me engano pi denari acel, kede kilo adek me mawele pi denari acel. Do kur idudubo mo me olibeti kede bwini.”

⁷Kakame en eko yabo kede amwon me ongwon mere, ako winyo dwan giacwea akuo me ongwon mere di waco be, “Bia!”

⁸Ango di ako neno asigira kame kome oudo odubere; ngat kame wanano en oudo nyinge To, di kabedo me jo oto oudo tie lube. Oudo komio gi twer i wi acel i kom ongwon me wel me jo me wi lobo, pi neko gi kede epima, kec, aumpuli, kede leini ager me obar.

⁹Kakame eyabo kede amwon me kany mere, ako neno tipere me jo kame oudo koneko pi kop ka Rubanga, kede pi ijura kame oudo gin kimio, di kitie i dud alutari.

¹⁰Gin kiko redo kede dwan amalo be, “Rwot won Twer, in ngat kacil kede me ateni, ibino tero kare kame rom amene di likame pwodi ingolo kop ne jo me wi lobo, di iko culo kwor me remo wa?”

¹¹Di do oko mino ngat acelacel kikom gi ekanso atar, di oko yamo ne gi pi wei pi kare moro acecek, tuno di wel oromo, wel me jotic jowot gi, kede me imiegu kede amiegu gi kame kobino neko bala gin.

¹²Kakame eyabo kede amwon me kanyape mere, ango ako neno yangere atek me piny, wang ceng oko doko col bala giangapa me iturur, di duwe oko doko kwar bala remo.

¹³Acerin oko popoto piny bala anyakini me yat epigi kame ony piny i kare me ngico me piny kame yamo atek oyayango gi.

¹⁴Edou da oko rwenyo bala itabu adola kame kodolo, di oko kwanyo mori kede cula dedede ki kabedere gi.

¹⁵Di abakai me wi lobo, jo kame pirgi tek, jodongo me isirikalen, joabar, joatek kede jo dedede, ipasoi kede jo kalikame ipasoi, di oko pwono i abo kede i kide me mori.

¹⁶Gin udo kitie lwongo mori kede kide be, “Potunu i kom wa di ikounu kano wa me wek kur ngat kame bedo i kom me ajakanut nen wa, kede da ikounu kano wa ki lilo me Katin Romo.

¹⁷Pien ceng me lieto me lilo gin otieko tuno, ngai kame karuno kanyakino en?”