Read kumam Gianyuta 7 Bible Online

Gianyuta 7 - kumam bible

Gianyuta 7

¹Ingei man ako neno imalaikan ongwon di kitie cungo i bad ongwon me lobo, di kigengo yamere ongwon me lobo buko, tetekeny kur yamo moro buki i lobo arabo i nam amoto i kom yat moro.

²Di ako neno malaika ace di tie ot malo ki tetu wok ceng, di etie kede alama ka Rubanga, di en eko lwongo kede dwan amalo imalaikan ongwon kame oudo komio twer me dudubo lobo kede nam.

³En ewaco be, “Kur idudubunu lobo arabo nam amoto yen, tuno di wan otieko keto alama i tur nyim jotic ka Rubanga wa.”

⁴Di ako winyo wel me jo kame koketo alama i tur nyim gi, oudo kitie tutumia tol acel kede ot ongwon kiwie ongwon, gin jo kame owok kiye atekerin dedede me Isirael.

⁵Koketo alama i tur nyim jo tutumia tomon kiwie are me ateker ka Yuda, jo tutumia tomon kiwie are me ateker ka Ruben, jo tutumia tomon kiwie are me ateker ka Gad.

⁶Doko koketo alama i tur nyim jo tutumia tomon kiwie are me ateker ka Aser, jo tutumia tomon kiwie are me ateker ka Naputali, jo tutumia tomon kiwie are me ateker ka Manase.

⁷Doko koketo alama i tur nyim jo tutumia tomon kiwie are me ateker ka Esimioni, jo tutumia tomon kiwie are me ateker ka Lebi, jo tutumia tomon kiwie are me ateker ka Isakari.

⁸Doko koketo alama i tur nyim jo tutumia tomon kiwie are me ateker ka Sebulun, jo tutumia tomon kiwie are me ateker ka Yosepu, kede jo tutumia tomon kiwie are me ateker ka Benjamin.

⁹Ingei man, ango ako neno twon ekodet me jo kalikame ngatamoro karuno maro wel gi. Jo kame owok kiye atekerin dedede, abilere dedede, jo me erangi dedede kede leb dedede, di kitie cungo i nyim kom me ajakanut kede i nyim Katin Romo, di kingapo ikanson atar kede di kimako jange me otit i cing gi.

¹⁰Oudo gin kitie lelemo be, “Alako wok kibut Rubanga wa, ngat kame bedo i kom me ajakanut, kede kibut Katin Romo!”

¹¹Imalaikan dedede kame oudo tie cungo luko kom me ajakanut, joadongo kede giacwea akuo ongwon, oko riebere piny i nyim kom me ajakanut di kiko woro Rubanga,

¹²di kiwaco be, “Amen! Pak, deyo, rieko, pwoc, wor, twer, kede teko bed but Rubanga wa ikar kede ikar! Amen.”

¹³Di ngat adwong acel oko penya be, “Alu ige kame ongapo ikanson atar, doko kiwok kituai?”

¹⁴Ango ako dwoko ne be, “Adwong, in en kame ingeo.” Di en eko waco na be, “Magi en jo kame owok ki can alit. Gin kilwoko ikanson gi kede remo me Katin Romo oko doko tar.

¹⁵Pi mano, gin do kitie i nyim kom me ajakanut ka Rubanga, di kiwore iceng kede iwor i tempulo mere; doko ngat kame bedo i kom me ajakanut bino gwoko gi.

¹⁶Kec likame bobo bino neko gi, akadi orio me pii da likame bino neko gi; ceng likame bino wango gi akadi lieto moroni.

¹⁷Pien Katin Romo kame tie i nyim kom me ajakanut bino bedo ngakwat gi, en ebino telo gi etero gi i atan me pii me kuo di Rubanga ko bino weno pige wang gi dedede.”