Read kumam Gianyuta 8 Bible Online

Gianyuta 8 - kumam bible

Gianyuta 8

¹Kakame Katin Romo oyabo kede amwon me kanyaare, ling oko bedo tie malo pi kare kame romo bala dul esawa.

²Di ako neno imalaikan kanyaare, kame cungo i nyim Rubanga, di kotie mino gi agwara kanyaare.

³Di malaika ace oko bino di eko cungo i nyim alutari di emako gi me dunyo bubani. Di oko mine bubani atot pi yalo karacel kede ilega me jokacil i alutari kame kotimo kede saabu, kame cungo i nyim kom me ajakanut.

⁴Yiro me bubani di oko duny malo karacel kede ilega me jokacil ki cing malaika kame tie i nyim Rubanga.

⁵Di malaika nono oko kwanyo gi me dunyo bubani, eko pongo iye mac kame kokwanyo ki alutari, di eko lwomo gi nono piny i lobo. Di amwocumwocun kame cal bala me kot, icelakin, meny atot acal bala me kot, kede yangere me piny oko timere.

⁶Di imalaikan kanyaare kame oudo mako agwara kanyaare di oko iikere pi kuto gi.

⁷Malaika me agege oko kuto agwara mere, di akako kede mac konyale kede remo oko cwei i lobo. Acel i kom adek me wi lobo oko wang, acel i kom adek me yen dedede da oko wang, kede lum dedede oko wang.

⁸Malaika me are oko kuto agwara mere, di eko lwomo i nam adwong gimoro kame cal bala moru ati kame oudo tie liel mac.

⁹Di acel i kom adek me nam oko lokere odoko remo, acel i kom adek me giakuo kame bedo i nam oko to, kede acel i kom adek me imerin oko dudubun.

¹⁰Malaika me adek oko kuto agwara mere, di acer ati oko poto ki malo di eliel bala toc, en epoto eko umo acel i kom adek me icileta kede ataneko me pii.

¹¹Nying acer nono en “Ekec.” Acel i kom adek me pii oko doko kec, di jo atot kame omato pii nono oko to, pien oudo edoko kec.

¹²Malaika me ongwon oko kuto agwara mere, di gimoro oko dipo dul acel i kom adek me wang ceng, acel i kom adek me wang duwe, kede acel i kom adek me acerin, omio acel i kom adek me lero kame gin kimio oko doko colo, acel i kom adek me iceng oko bedo abongo lero kede acel i kom adek me iwor da oko bedo kamanono.

¹³Di ango ako tingo wanga, ako winyo ekokom kame oudo tie por i malo okwidu di ekok kede dwan amalo be, “Otukwi can, otukwi can, otukwi can kame jo abedo i wi lobo bino neno ka kokuto agwara kame imalaikan adek oyapuno kuto!”