Read kumam Lusi 1 Bible Online

Lusi 1 - kumam bible

Lusi 1

¹I kare kame jongolkop en kame oudo pugo kede Isirael, kec adwong oko poto i lobo nono, di icuo moro me bomba me Betelem i lobo me Yuda oko ot bedo i piny me Moab, en karacel kede dako mere kede awobe mege are.

²Nying icuo nono oudo Elimelek, dako mere oudo nyinge Naomi; awobe mege are nogo nying gi oudo Makilon kede Kilion. Gin oudo kibedo jo Epurat kame oudo bedo Betelem i lobo me Yuda. Gin kiko ot i lobo me Moab di kiko dong bedo kunono.

³Do Elimelek cwar Naomi oko to, di Naomi oko dong kede awobe mege are.

⁴Awobe nogo oko nyomo mon me Moab, Oropa kede Lusi. Kakame kitieko bedo kede kunono pi mwakini aromo bala tomon,

⁵Makilon kede Kilion oko gida to, di do Naomi oko dong abongo icuo kede da abongo awobe.

⁶Ingei kare moro Naomi oko winyo be Rwot oudo omio jo mege winyo kiko udo cam atot; di do en eko iikere me yai ki Moab kede mon me awobe mege.

⁷Gin kiko yai karacel pi dok Yuda, do kakame oudo kitie kede i yongayo,

⁸Naomi oko waco ne mon me awobe mege be, “Ngat acelacel kibutu dok i ot ka toto mere. Akwao Rwot ebed ber kede wu bala kame wuda oudo ibedunu ber kede buta kede but jo otieko to.

⁹Doko akwao be Rwot mi wu itwerunu nyomere bobo, ikounu udo miere.” Naomi oko noto lem gi pi moto gi amot me pokere. Do gin kiko cako koko

¹⁰di kiwaco ne be, “Li, wan obino dok kedi but jo ni.”

¹¹Do Naomi oko dwoko be, “Anyira na, wun dokunu, pinyo komio imitunu ot keda? Benyo, iparunu be ango pwodi abino nywalo awobe kame bino bedo kede wu?

¹²Anyira na, wun dokunu, pien ango atieko ti likame doko atwero nyomere. Do akadi bed bala oudo atie kede gen me nywal, di ango ako nyomere tin di ako nywalo awobe,

¹³benyo, koto wun idarunu gi tuno gin dongo? Benyo, koto idagunu nyomere kede jo apat pi daro gi? Likame kamano, anyira na, wun ingeunu be manono likame twerere. Cing Rwot odaa, manono obedo lit nango kalamo ne wun.”

¹⁴Di do gin kiko donyo koko bobo. Oropa oko noto lem toto me cware di emote pi pokere, do Lusi oko moko amoka i kom da mere Naomi.

¹⁵Aso Naomi oko waco be, “Neningo, nyeki otieko dok but jo mege kede but rubangan kame eworo; ida upere kede en idok turu.”

¹⁶Lusi oko dwoko be, “Kur idia weki! Weka aupere kedi. Kakame in ioto iye ada abino ot iye; kakame in ibedo iye ada abino bedo iye. Jo nin bino bedo jo nada, doko da Rubanga ni bino bedo Rubanga nada.

¹⁷Kakame in ibino to iye ada abino to iye; kanono en kame kobino yiko ada iye. Akwao Rwot mia twon alola ka ango apokere kedi, weko di to en kopoko wa!”

¹⁸Kakame Naomi oneno kede be Lusi oudo otieko moko i tam mere me ot kede, en eko ling likame doko eko waco kop moro.

¹⁹Gin kiko ot di kiko tuno Betelem. Kakame kituno kede kuno, jo dedede me bomba wi gi oko dubere pi yomcuny, di mon oko donyo penyere ken gi ken gi be, “Kom ateteni Naomi inononi?”

²⁰Do Naomi oko waco negi be, “Kur bobo ilwonganu be Naomi, do lwonganu be Mara,[1] pien Rubanga Won Twer omio kuo na obedo bala yat akec.

²¹Kakame ayai kede ki kan, oudo atie kede gi dedede, do nan Rwot oko dwoka kede cinga nono. Pinyo mio ilwonganu be Naomi do di Rwot otieko tera kirac rom kano?”

²²Manoni en epone kame Naomi odwogo kede i Moab, en karacel kede Lusi ci wode, en dano me Moab. Gin kituno Betelem i kare kame kocako nyaro kede mawele.