Read kumam Lusi 2 Bible Online

Lusi 2 - kumam bible

Lusi 2

¹Naomi bin tie kede wad gi cware kame nyinge Boasi; en oudo ebedo icuo kobaro kame koworo, en dano me ot ka Elimelek.

²Ceng moro acel Lusi oko waco ne Naomi be, “Yei na aoti i poto di ako donyo depo wit mawele kicen ngei ngatic moro kame kisa bino make keda.” Naomi oko dwoko be, “Nyara, ot gire.”

³Aso, Lusi oko ot di eko donyo depo wit mawele kicen ngei jo koudo tie nyaro mawele. Do iwinyo aber, en oudo eoto i poto ka Boasi, en dano me ot ka Elimelek.

⁴Inonono inonono Boasi oko bino ki Betelem di eko moto jotic mege be, “Rwot bed kede wu.” Gin kiko dwoko ne be, “Rwot mi winyo.”

⁵Boasi oko penyo ngat kame oudo lo jotic mege be, “Dako nyako nyako no en ngai?”

⁶Ngatic nono oko dwoko ne be, “En ebedo dako me Moab kodwogo kede Naomi.

⁷En oudo ekwa be ayei ne depo wit mawele kicen ngei jo kame tie kac. Aso, en eko bedo tic cako me odiko tuno nan abongo wei.”

⁸Di Boasi oko waco ne Lusi be, “Winyingo, nyara, kur doko ioti depo wit mawele i poto apat; kur iwek poto noni, do donyi i kom mon atio kanoni.

⁹Cik wangi i poto kakame kotie nyaro kiye mawele, di ida iko donyo lubo gi kicen. Ango atieko ciko cuo jotic na be kur kiloli. Ka orio oneki, oti imat pii kame gin kiweko i agune.”

¹⁰Di do Lusi oko riebere piny di eko waco ne Boasi be, “Pinyo komio iketo tam ni i koma di iko bedo kede cuny aber buta, do di ango abedo ngakumbor?”

¹¹Do Boasi oko dwoko ne be, “Ango atieko winyo kop i kom gikame in itimo ne toto me cwari cako i kare me to ka cwari, kede da epone kame in iweko kede papa ni kede toto ni kede lobo kame konywali iye, di iko bino bedo kede jo kame in oudo likame ingeo.

¹²Akwao Rwot culi pi tice ni. Akwao be Rwot Rubanga me jo me Isirael, ngat kame in iringini gwokere bute mi cul koromo.”

¹³Lusi oko waco be, “Ibedo kede cuny aber buta, adwong na, pien ikweo cunya di iyamo keda kede dwan me mwolo, bed bala likame ango abedo ngatic ni.”

¹⁴Iesawa me cam Boasi oko waco ne Lusi be, “Bia igam mugati iko damo kede bwini awac.” Aso, Lusi oko bedo karacel kede jotic di Boasi oko cwano ne mawele kame korereo i keno. En eko cam tuno yeng di cam mogo oko dong ne.

¹⁵Kakame Lusi oko yai kede pi ot depo mawele, Boasi oko ciko awobe jotic mege be, “Wekenu erar mawele kiton i kakame ijolong me mawele pwodi tie iye, kur igengenu.

¹⁶Doko medo i wi manono da, donyunu wowoto wit mawele mogo ki kom ijolong di iwekunu nen pi depo, kur icocokunu en.”

¹⁷Aso Lusi oko bedo raro wit mawele tuno piny yuto. En eko canyo mawele kame eraro di eko wok bala kilo tomon.

¹⁸En eko tero mawele nono i bomba di eko nyuto ne toto me cware rom me mawele kame eraro. Doko da eko mine cam kame en oudo ecamo oko dong.

¹⁹Naomi oko penye be, “In tin idepo mawele gi dedede ki tuai? Oudo itie tic i poto kangai? Akwao Rubanga emi icuo kotamo piri winyo!” Aso, Lusi oko waco ne Naomi be en oudo etio i poto me icuo anyinge Boasi.

²⁰Naomi oko waco ne Lusi be, “Akwao Rwot, ngat kame nakanaka gwoko cikere mere but jo akuo kede oto, emi Boasi winyo.” Di eko doko meede kede yamo be, “Icuo nono obedo wad kiyapiyapi kede wa, en ebedo ngat acel kame poore gwoko wa.”

²¹Di Lusi oko waco be, “Doko ewaco na be ameede bedo iyapiyapi but jotic mege di adepo mawele tuno gin tieko tic.”

²²Naomi oko waco ne Lusi be, “Nyara, eber ka in ioto tic kede mon atio i poto ka Boasi, pien ka ioto i poto apat cuo bino donyo loli.”

²³Aso Lusi oko donyo depo mawele kede mon nogo i poto ka Boasi tuno i kare kame kotieko nyaro kede mawele kede engano. En eko meede bedo kede toto me cware.