Read kumam Lusi 3 Bible Online

Lusi 3 - kumam bible

Lusi 3

¹Ingei kare moro Naomi oko waco ne Lusi be, “Nyara, ango amito be iud icuo tetekeny ida ibed kede paco.

²Aso, ngei kiber be icuo anyinge Boasi no, kame in ibedo tic kede mon ace i poto mere, obedo wad me paco wa noni. Neningo, otieno me tin en ebino ot pieto mawele i diakal me canyo.

³Aso in bol di iko sut kede mo, di iko ngapo igoen ni abeco kalamo di iko ot i diakal me canyo kunono. Do kur imie engei be in itie kunono tuno di en etieko cam kede amata.

⁴Miero inen be ineno kakame en ebino ot buto iye, di do ka en etieko nino, in oti iko yabo esuka mere di iko buto katiene. En ebino waco ni gikame ipoore timo.”

⁵Lusi oko dwoko be, “Ango abino timo gi dedede kame in iwaco.”

⁶Aso, Lusi oko ot i diakal me canyo di eko timo gi dedede bala kame toto me cware owaco ne.

⁷Kakame Boasi otieko cam kede amata, oudo etie do kede yomcuny, di do eko ot buto i atukit me mawele. Di Lusi oko cede di eko yabo esuka ki tien Boasi di eda eko buto.

⁸Iesawa me i dier iwor Boasi oko lepun eko lokere di eko udo dako tie buto katiene.

⁹En eko penyere be, “In ngai?” En eko dwoko be, “Ango Lusi. In ibedo wad kiyapiyapi kede cwara, poore inyoma.”

¹⁰Boasi oko dwoko be, “Nyara, akwao Rwot mi winyo; wor kame inyuto na noni kalamo kame icako nyuto ne toto me cwari; likame in iyei ot mono awobi moro ace, angacan amoto kobaro.

¹¹Aso, nyara, nan kur ibed kede lworo, ango abino timo ni gi dedede kame in ipenyo, pien jo nango dedede ngeo be in ibedo dako aber.

¹²Bed bala ango abedo wad kiyapiyapi kede cwari, do tie icuo kobedo wad kiyapiyapi kede en kalamo ango.

¹³In do ber dong kan paka piny ru, di do diki odiko wan oko bino udo tam mere; ka eyei gwoki mano ber, do ka edagi gwoki ango alairo i nying Rwot kakuo be ango abino gwoki. Nan do in buti tuno piny ru.”

¹⁴Aso, Lusi oko buto katien Boasi tuno piny ru, do eko dilo yai di pwodi piny likame owalar tetekeny kur ngatamoro twer ngene, pien Boasi oudo likame mito be jo ngei be Lusi oudo obino kanono.

¹⁵Boasi oko waco ne be, “Gony egoe kame itie ngapo no iko yararo en.” En eko yararo en, di Boasi oko pimo ne kilo tomon me mawele di eko konyo Lusi rionge i epepet. Di do Lusi oko dok i bomba.

¹⁶Kakame Lusi otuno kede paco, da mere Naomi oko penye be, “Nyara, kop obedo ni benyo?” Di Lusi oko tatamo ne gi dedede kame Boasi otimo ne.

¹⁷Di eko meede be, “En ewaco na be likame apoore dwogo buti kede cinga nono, aso, en eko mina mawele noni dedede.”

¹⁸Naomi oko waco ne be, “Nyara, dari iko bino neno gikame bino timere. Tin Boasi likame bino wei tuno di etieko cobo kop nono.”