Read kutep Matiyu 10 Bible Online

Matiyu 10 - kutep bible

Matiyu 10

¹Yesu kunn byir ande-wu rijwe asu ifaen ti awu ku kwen na ba iken u nda ba kuko ti a na jae ru rijwen titibi ijwe ande, ti a na nwangru ande uwae acaeb ti tsotso.

²Rinyi ande rijwe asu ifaen ba ta ri: Utikucang si Siman, ti a ku kunn wu baa Bitrus, ti inja-wu Andarawu; Yakubu ti inja-wu Yohana, aba si anyisu Zebedi;

³Filip ti Bartolomu; Toma ti Matiyu, unde ti ku mbe aser akwe; Yakubu umbae Alifas, ti Tadeyus;

⁴Siman ti a ri baa, awu na si unde ti site kitsinn ikyaen uten-wu, ti Yawuda Iskariyoti, unde ti sa Yesu jabci.

⁵Yesu tom atom-wu rijwe asu ifaen bane ru u fwa ba kusen baa, “Ni ka-ni uwae uka na ande ti nung-ba Rimam be, ko uwae uka na Samariya iki be.

⁶Ni ru yi uwog rishi Isirela, aba iwen ti yag fufa.

⁷Ni ru ka ri te ba baa, Kujwokwe Rimam na kyang ku yaen pu yi.

⁸Ni nwangru ande ti acaeb. Ni kunn shwur ande ti cwucwu. Ni nwangru ande ti kicaeb ikum. Ni rwae ruye rijwen titibi risu ande. Ani tu ana-ni ti rinyangwae, ni nda ande ti tsitsi ti rinyangwae ama.

⁹Ni ye su-ni azurfa ko zinariya, ko kiser iki uwae jifu be.

¹⁰Ni ye su-ni rikyig be. Ni ye su-ni atupwa ifaen be. Ni ye su-ni apwafxen ifaen be. Ni ye su-ni ukum be. Unde ti ku nde wande u tu kang iken ti awu ku sha.

¹¹“Kiye ti ani a ru ba sang uten iki ko imbae uten iki, ni sang ti ni sha unde ti u cwe u pu ni sang uwae kununn-wu, ti ni som atang se iken ti ani a nwunn pu ni uwae uten atang.

¹²Kununn ti ani a sang atang, ni ri na ba unju tinyang.

¹³Asiti ande ti kununn wu a kyangte ni ti ajwo ifaen, kikunnji na kujimshwur-ni ā te ba som te atso. Ama asiti aba a kyangte-ba ani be, kikunnji-ni ā kafe ba ti uwog-ni.

¹⁴Cwucwo asiti ande ti kuru iki ko uka iki a kyangte-ba ani be, ni ya uwog wu ta ti ni fwer ibung afxen-ni si ba ti atang.

¹⁵Kubenti ti ame ku ri te ni, usir rikwen, Rimam u nung risi ande ti uten Sodom ti Gomora skeb pu wu ande ti uten wune.

¹⁶“Nung, ame tom ni ku ru pangma iwentam ti a ku rwae yi sang yi kutampwa mbuku. Ni nung ijwe-ni nyinyang pangma ikentibi, ti ni nde wande-ni te kujimshwur pangma akwae.

¹⁷Ni som ti ujwin, ikyaen ti, ariki u pu ni ru yi kusog rikwen. Aba u byinn ni kimbab uwae asog Rimam-ba.

¹⁸Abikwe ti afaen-ba u pwen ni rikwén ikyaen-m. Ayine si ikyaen ti ni sa ira-m ti tinyang ri te ande ti ise.

¹⁹Kiye ti a pu ni ru ka uwog rikwen, ni kab-ni uwae risu ira ti ani u ri ko fengo ti ani u ri yi be, ikyaen ti, Rimam u sha na ni ira ti ani u ri uwae kiye wu.

²⁰Ira ti ani u ri meme u si-yi ana-ni be, ayi u ruye uwog Kusung na Itse-ni tso unju-ni.

²¹“Ande u ye ameinja-ba na ande ti a na pu ru ka wen. Abitse u nde ahan te anyisu-ba ama. Anyisu u ta rika te abitse-ba ti abiya-ba u pu ba yerwen.

²²Ande meme u sa ni kuka ikyaen-m. Amaa, unde ti a tsi ti kubenti ru ba sang usir ti ricwunnkyi, awu u nwangru.

²³Asiti ande a ku nde ni rikaen uwae uten iki, ni ter ru atang ti ni ru yi uten iki. Ame ku ri te ni, ani u ka tag-ni uwae uten Isirela titawe Umbae Unde u ba be.

²⁴“Umbae ti ku kwen iken skeb-wu unde ti ku kwen na wu be. Upyi ma skeb-wu itsekuru-wu be.

²⁵Ayi pang pu yi ti umbae makanta ā kwab ti awu ti unde ti ku kwen-wu, ā pang atso, upyi ama ā kwab ti awu ti itsekuru-wu ā pang atso. Asiti ande a ku kunn unde ti kununn baa, Beyel Zebul,[10] rinyi ti a u kunn ni, ani ande ti kununn-m u beb siskeb.

²⁶“Ni kyen-ni ikyenricwu ande be. Iken ti titam, a u shaen umbyi-yi tso ba nae ise. Ira ti ku cwucwe meme, ande u fxen yi.

²⁷Ira ti ame ku ri te ni uwae kufub tine, ucwe a fam pu yi, ni ri yi ayib jwunn ande wurr. Meme ira ti ani fxen uwae kitam tine, ni tso usen rukub u sa yi ya iskin atang.

²⁸Ni kyen-ni ikyenricwu ande be. Aba ku wen nyang ijwe rimenn amam, aba wen fob-ba kusung be. Amaa ni kyen ikyenricwu Rimam ti site kuko ti u twenji rimenn ijwe ti kusung meme uwae urwa ti ku ten u ku jim-wu jim be.

²⁹A ku jab isen ifaen kobo, amaa, ko kinjo uwae-yi u jwunnsi-wu riben be, se iken ti Itse-ni Rimam a cwe tawe.

³⁰Ani ti risu-ni, Rimam pwen tag pu wu ikyinn risu-ni.

³¹Ani skeb-ni isen ti rurob uwe Rimam be a. Ani u nde rimang kyen ikyenricwu?

³²“Unde titini ti a ri tso kubenti te ande baa, ame na si Itsekuru-wu, ame u kunn rinyi-wu ama uwe Itse-m ti ta apupwen.

³³Amaa, unde ti a shaen ira-m ayib jwunn ande baa, awu na nung-wu ame be, ame u pyir ira-wu uwe Itse-m ti apupwen ama.

³⁴“Ani ku tang baa, ame na ba ti m na u sa kujimshwur sang utense a. Iyee, ame ba-m ti m sa kujimshwur sang utense be, ame ba te kisum wen.

³⁵Ame ru ba ti m ba nda anyisu arom ta rika te abitse-ba. Anyisu anda ma u ta rika te abiya-ba. Anda u ta rika te Abija abaen-ba. Abija ma u ta rika te awa byib-ba.

³⁶“Ande ti rika unde u ru kununn unde ti kununn wu.

³⁷Unde titini ti a ye ure te itse-wu ko iya-wu skeb me, unde wune ko-wu ti wu ru ba uwog-m be. Unde titini ti a ye ure te uyin-wu ko unda-wu skeb me, unde wune ko-wu ti wu ru ba uwog-m be.

³⁸Unde titini ti a su-wu kutuku ti cice-wu u putsa-wu ame be, unde wune ko-wu ti wu ru ba uwog-m be.

³⁹Unde titini ti a ku sha ti wu u txen unyang-wu txen, awu u shanum te wu, ama unde ti a sae ru unyang-wu ikyaen ira-m, awu u tu unyang ti tsi kukunn.

⁴⁰“Unde titini ti a kyangte ni, awu kyangte pu wu ame. Unde ti a kyangte m, awu kyangte pu wu Rimam ti tom m ba utense.

⁴¹Unde titini ti a kyangte atom Rimam ikyaen ti awu na si atom Rimam, unde wune te unde ti atom wu u tu kujwojang ti pang atso uwog Rimam. Cwucwo unde ti a kyangte unde ti kubenti sang uwae kununn-wu ikyaen ti unde wu na si unde ti kubenti, meme ifaen-ba u tu kujwojang ti pang atso uwog Rimam.

⁴²Cwucwo unde titini ti a ndeya umbae kinjo uwae anyisu ti putsa m ne, ko ti awu a txi ambyi isa na wu, asiti awu a nde yi ikyaen ti umbae wu na si unde ti ana-m, ame ku ri te ni kubenti, unde wune u shanum-wu te kujwojang-wu be.”