Read kutep Matiyu 11 Bible Online

Matiyu 11 - kutep bible

Matiyu 11

¹Isim ti Yesu fa mam pu wu atugbug-wu rijwe asu ifaen kusen, awu nwunn u ya uwog atang ta u ru ka kwen na ande iken, ama u ri ira Rimam te ande uwae uten uten ti pakob atang.

²Uwae kiye wune Yohana unde ti ku nde batisma ta uwae pursuna. Ti awu fxen iten wande ti Yesu ku nde, awu tom ande-wu iki ru ka uwog Yesu.

³Aba ba rang wu baa, “Afu ti si unde wu ti Yohana ri baa, awu na ku ba ree, re awu ku ba ti uwe?”

⁴Yesu ri te ba baa, “Ni ru ka ri te Yohana ira ti ani fxen ti iken ti ani sae.

⁵Ande ti mbub ayib ku sae uwog, ande ti pxib afxen ku kyang ikyin, ande ti kicaeb ikum ku tu ijwe ti saen, ande ti tsi atong ku fxen ira, a ku kunn shwur ande ti cwucwu, ande ti rikaen tu ira tinyang ku fxen.

⁶Itinyang si ana unde titini ti kab-wu uwae risu-m be!”

⁷Kiye ti ande ti umbyi Yohana kafe ku ru, Yesu bag ira ti ti ri risu Yohana te ande ti munn atang. Awu rang ba baa, “Kiye ti ani ru ka sha rifab Yohana uwae kutur khika, imi ti ani ku kab baa, ani na u nung? Ani tang baa, ani na u nung ufunn ti ku kae uwae irum amam a?

⁸Ayi a si-yi ahan be, ani ru ti ni kaa sae imi tiri? Unde ti sī atupwa aser a. Sae, ande ti ku sī atupwa aser ku som uwae asog bikwe.

⁹Ayi a si-yi ahan be, imi ti ani kaa sae-ni? Unde ti ku ya iskin ira Rimam a. Een, ame ku ri te ni, unde wu ti ani nung uwae kutur atang ko skeb unde ti ku ya iskin ira Rimam.

¹⁰Yohana si unde wu ti a bae ira risu-wu uwae Kutsingken Rimam baa, ‘Nung, ame ku tom atom-m ru uwe-fu, awu u kyae nyang fengo-fu kú fu.’

¹¹Ame ku ri te ni, uwae ande meme ti anda mbae utense ne, unde ta-wu ti site rurob skeb Yohana be. Amaa, unde ti yib siskeb uwae Kujwokwe Rimam site rurob skeb pu wu Yohana.

¹²“Tsi kiye ti Yohana bag ku nde batisma ba sang tine, a ku ta rika te Kujwokwe Rimam. Ande ti ku nde iken ti ribom ku kwab ti a u shir mbe ra wu.

¹³Ikyaen ti, meme ande ti ya iskin ira Rimam fa te Icwe Musa, ri ira risu iken ti ku ba uwe, ba sang ti kiye ti Yohana ba.

¹⁴Asiti ani a ru kubenti uwae ira ti aba ri, Yohana ti si Eliya ti a ri baa, awu na ku ba.

¹⁵Unde ti a site atong ti ku fxen ira, awu ā fxen!

¹⁶“Ame u sa ande ti kiyiku ne myae te imi? Aba pangma anyisu tinying ti som uwae ritug. Kumbub iki ku ri te kumbub ti ifaen baa,

¹⁷‘Ati byinn na ni itang unda ishe, ani se-ni ise be. Ati kunn ikob ricwu, ani jwub-ni ira be.’

¹⁸Yohana ru ba u ci-wu wuci be u ngwa-wu iken ti fifab be, ani ri baa, awu na si unde ti kijaen.

¹⁹Umbae Unde ru ba u ci u ngwa te ande, ani ri baa, awu na ku ci ku kyaen-wu kyaen be, ama na ku ngwa ku num-wu num be, awu na si urwan ande ti ku mbe aser akwe ti ande ti ku nde ikentitibi. Ko ti ayi si ahan, ande u nungye ben-ayib Rimam uwae wande ti awu ku nde.”

²⁰Isim yine Yesu bag ku rimbeb uten uwog ti awu nde wande ti ku fur ayib atang, ikyaen ti, aba pyir ti a u kafe isim ta ikentitibi-ba.

²¹Awu ri baa, “Korazin, ayae-ni, Betisaida, ayae-ni ama! Á baa wande ti ku fur ayib ti a nde uwog-ni ne, a na nde yi uwog ande ti apxin ti ta uten ti Tiire ti Sidon, aba ú pu atupwa ibae si rimenn u pu itong mbub ijwe-ba u tso baa, aba na raen pu ba ti ikentitibi ti aba nde.

²²Ni tangsom baa, usir rikwen, Rimam u sae risi ande ti uten Tiire ti Sidon skeb pu wu ani.

²³Ani ande ti uten Kaparnawum, ani tang baa a na u pu ni tso ka apupwen a. Iyee! A u shir pu ni jwunnsi uwae urwa ti ku twen ku jim-wu jim be. Ikyaen ti, wande ti ku fur ayib ti a nde uwog-ni, á baa, a na nde yi uten Sodom, Sodom ú ta ti atang ba kwer yaka ne.

²⁴Amaa, ame ku ri te ni baa, usir rikwen, Rimam na u nung risi Sodom skeb ani.”

²⁵Uwae kiye wu Yesu ri baa, “Ame fxaefa te fu Itse, Itsekuru na apupwen ti riben, ikyaen ti afu sa ira-fu tam ande ti ben yib ti ande ti site iyii, ama u sa tatso ande ti nung-ba iken be.

²⁶Een, ayi nyang uwae-fu nee afu nde ayine.

²⁷“Itse-m nda pu wu ame iken meme. Unde iki nung-wu umbae Rimam be, si nyang Itse-wu amam. Unde iki ama nung-wu Itse ti apupwen be, si nyang umbae-wu amam ti ande ti awu a ku sha ti wu u tatso ba.

²⁸“Ni ba uwog-m, meme-ni ani ande ti ku ngwa rikaen, ti ani ande ti num pu ni ti usu rikaen-ni ti ti su, ame u nda ni unyang ti pu.

²⁹Ni ye usu ti ana-m tso risu-ni, ti ni kwen iken uwog-m, ikyaen ti, ame ku nde iken-m skuu skuu ti risu ti nae riben. Ni ba uwog-m ti ni pu unyang.

³⁰Ikyaen ti, wande-m bom-yi bom be, usu-m ama rob-yi rob be.”