Read kutep Matiyu 12 Bible Online

Matiyu 12 - kutep bible

Matiyu 12

¹Kiye iki Yesu ku kyang ikyin ku ru uwae risaen alikama.[11] Usir wu si usir ikyinn-ba. Ama ande ti putsa wu ku fxen ti rimenn. Aba jwur ayaen alikama yi ku kub.

²Ande ti kumbub Farisi nung iken ti aba nde ne ama ri te Yesu baa, “Nung iken ti ande-fu ku nde. Ayi ku cwucwe ti a u nde itso iken yine Usir Ikyinn.”

³Yesu rang ba baa, “Ani nung-ni iken ti Ukwe Dawuda nde kiye ti awu ti ande-wu ku fxen ti rimenn be a.

⁴Awu sang ka kusog Rimam ka ci wuci ti akwen Rimam amam ti ku ci, ko ti ayi ku cwucwe u si icwe Rimam ama.

⁵Re ani fxen-ni uwae Icwe Musa risu andufu ti ku fen Rimam be a. Aba ku nyatsa icwe Rimam usir ikyinn ama Rimam ku nung-wu aba ti ikentitibi be.

⁶Ame ku ri te ni baa, ira iki nwunn pu yi tine ti site rurob skeb pu wu ira kusog Rimam wu ti ani ku ri ne.

⁷A bae uwae Kutsingken Rimam baa, Rimam na ku sha ti ande-wu na si ande ti ku nung risi ande. I si-yi iken ti ti twen ti awu ku sha be. Á baa, ani na nung imbyi ira Rimam yi ne, ani ú rimbeb-ni ande ti kubenti be.

⁸Ikyaen ti, ame Umbae Unde si Itsekuru na usir ikyinn.”

⁹Yesu nwunn uwog wu u ru yi kusog Rimam.

¹⁰Unde iki ta atang ti site kicaeb kujwo ti wam kyi. Ama aba ku sha ti a u ye Yesu te riraen. Ikyaen yine aba rang wu baa, “Ayi si icwe ti unde na nwangru unde ti kicaeb usir ikyinn a.”

¹¹Ama Yesu rang ba baa, “Asiti unde iki uwae-ni a site mbawen, ama mbawen wu a jwunnsi uwae kukwae usir ikyinn, awu u shir wu tso-wu be a.

¹²Unde skeb-wu mbawen be a. Ayine tatso baa, icwe nda ti riyae ti ti na ndeya ande usir ikyinn.”

¹³Ama awu ri te unde wu baa, “Ndab ta kujwo-fu.” Awu ndab ta wu, ama awu kyaenyang tsi pangma ti ifaen.

¹⁴Ande ba ti ta kumbub Farisi nwunn u ru u ka myae ira risu fengo ti a u wen Yesu.

¹⁵Yesu nungye pu wu iken ti aba ku nde u nwunn uwog wu. Ande tum atso putsa wu, awu ama ku nde jim kicaeb-ba

¹⁶ku fwa ba kusen baa, aba na ri-ba ira te unde iki risu-wu be.

¹⁷Iken yine nde ikyaen ti yi na u kumunn iken ti Ishaya atom Rimam ri tso unju-wu:

¹⁸“Nung upyi-m ti ame tsab tsi! Unde ti ame site ure te wu. Utob-m ama ku nae riben te wu. Ame u sa Kusung-m ba sang utob-wu. Awu u ya iskin ira rikwen-m uwog ande ti utense meme.

¹⁹Awu ku fwan-wu kubyag be, ku taen-wu ira be. A ku fxen-ba ufxenjwin-wu yi fengo kum be.

²⁰Kakong ti kpag-wu kpag be, awu u mber-wu ayi be Fitila ti jim ku si si, awu u jim yaen-wu be ba sang kiye ti awu u nda kubenti u ci rika.

²¹Ama yi rinyi-wu, ande ti utense meme u si te uwaetsi.”

²²Isim yine a pu unde iki ti mbub ayib u tsi unju ba na wu. Rijwen titibi ti sang ijwe unde wu. Ama Yesu nde jim kicaeb-wu yi, awu tu ayib ti sae, u ku ri ira pangma ti kucang.

²³Ayib fur meme ande ba, ama aba rang baa, “Si-yi awune ti si Umbae Dawuda wu be njwaa?[12]”

²⁴Kiye ti ande ti kumbub Farisi fxen ira yine, aba ri baa, “Ayi si kang ajwo wande na ukwe asung titibi Beyel Zebul ti awu tu tawe u ku rwae ruye rijwen titibi te yi.”

²⁵Ama Yesu nung tag pu wu ira ti kab-ba. Awu ri te ba baa, “Asiti ande ti ta imbyi ukwe a kata ifaen, uten wu u tsi-wu be. Ko uten ko kusog unde a katsen, uten wu ko kusog wu u tsi-wu tsi be.

²⁶Ama asiti uwae kujwokwe Shetann, apyi-wu iki ku rwae ruye ariki, awu kata pu wu ijwe. Awu u nde rimang tawe kusog-wu u tsi?

²⁷Asiti ame a ku rwae ruye rijwen titibi yi kujwo wande na Beyel zebul, ande ti imbyi-ni ama re? Aba ku rwae ana-ba ruye ti kujwo wande na aye? Wande ti aba ku nde tatso baa, ani raen pu ni ira uwae iken yine.

²⁸Amaa, asiti ayi a si ti kuko Kusung Rimam ti ame a ku rwae ruye asung titibi, ayi ku tso baa, Kujwokwe Rimam na ba pu wu uwog-ni.

²⁹“Ko unde u ndetu ti wu sang kusog unde ti kpakang u su pu isu unde wu ru, nee awu a cwong-wu unde wu afxen ti ajwo be a. A u yir kang wu nyinyang titawe u su pu isu yi ru.

³⁰“Unde titini ti a ta te-wu ame be, awu tsi ikub te m. Unde ti a ku byir ya-wu ame be, awu ku shag yi shag.

³¹Ikyaen na yine ame ku ri te ni baa,

³²ko aye ti ri ira titibi risu Umbae Unde, a u yata na wu. Amaa, ko aye ti a ri ira titibi risu Kusung Rimam, a u yata na-ba wu be, ko uwae kiye wune, ko uwae kiye ti ku ba uwe.

³³“Asiti kutuku a nyang, awaen-wu u nyang ama. Asiti kutuku a si titibi, awaen-wu ama si si titibi. Yi uwae awaen kutuku ati ku nungye utso kutuku wu.

³⁴Ani anyisu kufwang, ani nde rimang u ri ira ti tinyang, ti utob uwae-ni munn ti ira titibi? Ira titang ti munn uwae utob unde, si si ayi ti awu ku ri tso unju-wu.

³⁵Unde ti tinyang ku sa ruye iken ti tinyang yi uwae iken ti tinyang ti awu sa tsika. Unde titibi ama ku sa ruye iken titibi yi uwae iken titibi ti awu sa tsika.

³⁶Kubenti, ame ku ri te ni cwucwo baa, meme ira ti ukaen ti tso unju unde, a u pwen unde wu rikwen risu-yi uwae usir rikwen Rimam,

³⁷ikyaen ti, yi ira unju-fu, afu u nwangru, yi ira unju-fu ama, a u twenji fu.”

³⁸Ariki uwae ande ti ku kwen na ande icwe Rimam, ti ariki uwae ande ti kumbub Farisi tu wu. Aba ri baa, “Unde ti uwe, ati ku sha ti fu na nde na ti iken ti ku tso kuko na Rimam.”

³⁹Amaa, awu ri baa, “Ani ande ti kiyuku ne, ani ande titibi ti pyi ira Rimam, ani ku sha ti ni u nung iken ti ku tatso kuko Rimam. A u nde na-ba ani be, si nyang iken ti ku fur ayib ti a nde kiye Jona.

⁴⁰Pangma ti Jona nae uwae rishwu iwag ka usir ita ti utitang ita, Umbae Unde ama u ta uwae riben usir ita ti utitang ita.

⁴¹Usir Rikwen yi, ande ti Nineve u nwunn u rimbeb ni, ikyaen ti, Jona ri te ba ira Rimam, aba kafe isim ta ikentitibi-ba. Ira ti a ku ri te ni tine skeb pu yi ana Jona.

⁴²Usir rikwen wu, Ukwe ti Unda ti ta uten ti isku u nwunn u rimbeb ni ande ti kiyiku ne, ikyaen ti, awu ruye iyen na utense ba ti wu na u ba fxen ira ben-ayib na Solomon. Sae, ira ti ba uwog-ni tine ko skeb ira Solomon yi.

⁴³“Kiye ti rijwen titibi a ruye ijwe unde, rijwen wu kyang ku sha uwog ti wam ti wu u pu unyang atang, amaa, awu tu-wu be.

⁴⁴Ama awu ri baa, ‘Ame u kafe ru ti kusog-m ti ame som atang kucang.’ Ama awu a kafe ba, awu ku ba tu-wu iken iki atang be. A fen saen pu ba wu, u kyae tag pu ba iken ti ta uwae-wu.

⁴⁵Ama awu ku ru ka kunn byir asung iki itsongfaen ti beb skeb ru ba, ba som atang te wu. Ricwunnkyi-yi, aba ye usom ti som unde wu ka beb fa yaen. Ayine si iken ti u tu ande ti kiyiku ne.”

⁴⁶Ti ti awu ta ira ti ti ri te ande ba, iya-wu ti ameinja-wu ba atang. Aba tsi ise ku sha ti a na u ri ira te wu.

⁴⁷Unde iki uwae ande ba ti Yesu ku ri ira te ba, ri te wu baa, “Iya-fu ti ameinja-fu tsi ise akwen ku sha ti a u ri ira te fu.”

⁴⁸Amaa, Yesu rang unde wu baa, “Aye ti si iya-m ti ameinja-m?”

⁴⁹Awu ndabta kujwo ru yi uwog ande ti putsa wu u ri baa, “Nung iya-m ti ameinja-m ti ta ne!

⁵⁰Ikyaen ayine, ko aye ti ku nde iken ti Itse-m ti apupwen ku sha, awu ti si inja-m, ti mbiya-m, ti iya-m.”