Read kutep Matiyu 13 Bible Online

Matiyu 13 - kutep bible

Matiyu 13

¹Ti uwae usir wu, Yesu ruye kununn u ru ka som unju uyinn.

²Ande yang-ba ru ba byir pakob-wu. Ikyaen yine, awu ru ka sang uwae kuyae u som atang, ande ba ama tsi ti ukunn uyinn.

³Awu ri te ba ira yang-yi yi fengo ira ti sunn baa, “Unde ti ritom iki nwunn ru ka u yag itso.

⁴Ti awu ku yag itso yine, itso iki jwunnsi fengo, ama inung ba tob pu yi ci.

⁵Itso iki si riben kusáng uwog ti ayi tu-yi isa yang-yi be. Ayi ruye ise ti kife ikyaen ti ayi si-yi te riben ti tinyang be.

⁶Ama kiye ti usir byag ba, ayi wam cwu, ama atsing-yi waen tika, ikyaen ti, ipab-yi si fob-yi riben be.

⁷“Itso iki tā ka sī uwog icwong, ama icwong ser tso u ba cwin wen yi.

⁸Itso iki ama tā ka sī riben ti tinyang, ama ayi waen awaen, uriki mae ande itsong. Uriki mae ande ita. Uriki rijwe ita.

⁹“Unde ti a site atong ti ku fxen ira, awu ā fxen.”

¹⁰Ama atugbug na Yesu ba rang wu baa, “Ikyaen imi ti afu ku ri kob ira te ba ti ira ti sunn?”

¹¹Awu ri te ba baa, “Ana-ni, a nda pu ba ani ti ni na nungye ira ti kitam na Kujwokwe Rimam ti apupwen. Amaa, uwog-ba, a nda-ba aba rinda wune be.

¹²“Uwog na unde ti site iken, a u sī na wu ko ra fufa, awu u site iken kuko. Unde ti si-wu te yi be, iken ti kpang ti awu site, a u mbe ra yi ru ru.

¹³Iken ti nde nee ame ri ira te ba yi uwae ira ti ti sunn si ikyaen ti, aba ku sae, amaa, a ku nung-ba be, aba ku naa atong, amaa, a ku fxen-ba be, ku nungye-ba be.

¹⁴Yi uwog-ba ama, a kumunn pu ba ira na Ishaya unde ti ku ya iskin ira Rimam ti ri baa, ‘Itifxen, ani u fxen amaa ani u kab tu-ni be.

¹⁵Ikyaen ti, utob ande bane cwunnkyi pu yi, aba tsi kyi atong-ba, aba burkyi ayib-ba. Aba cwe-ba ti a u sae uwog be. A cwe-ba ti a u fxen ira be. Aba cwe-ba ti a u si ande ti ku kab tu ira be. Aba ku sha-ba ti a u kafe ba uwog Rimam ti wu to ser ba be.’

¹⁶“Amaa, itinyang si ana ayib-ni ikyaen ti ayi ku sae, ti atong-ni ama, ikyaen ti ayi ku fxen ira.

¹⁷Kubenti, ame ku ri te ni, ande ti ku ya iskin ira Rimam ti ande ti kubenti yang-ba ku sha ti a na u nung iken ti ani na ku nung, aba nung-ba be, aba ku sha ti a na fxen iken ti ani ku fxen, aba tu-ba riyae be.

¹⁸“Ni naa atong ti m ri te ni ira risu unde ti ku yag itso.

¹⁹Kiye ti unde a fxen ira risu Kujwokwe Rimam, asiti awu a kab tu-wu ira yi be, awu Unde Titibi ku sang ba ku fxaen mbe ra iken ti a tso tsi utob-wu u sa ru. Ayine si pangma itso iken yi ti tā ka si ukur fengo.

²⁰Iken ti tā ka si riben kusáng si pangma unde ti fxen ira Rimam u kyangte yi ti kufe ti utob titsen,

²¹amaa, awu si-wu te ipab be u som ra pang ahan, ama kiye ti rikaen nwunn, ko asiti ande a nde wu rikaen ikyaen ira Rimam ti awu putsa ne, ti ritsen, awu ter ya ira Rimam ta.

²²Itso iken ti tā ka si uwae icwong si unde ti mbe ira Rimam ti utob-wu, ama ira ti kab risu iken na ise ti rifunn fangkyi wu, ama awu tso-wu ajwo wande ti tinyang be.

²³Iken ti tā ka si riben ti tinyang ama, si unde ti fxen ira Rimam u ye su yi tsi utob-wu. Ayi waen awaen. Iki ikaen mae itsong, iki ikaen mae ita, iki ama si rijwe ita.”

²⁴Awu sunn kyi ira iki cwucwo te ba baa, Kujwokwe Rimam ti apupwen na pangma unde iki ti ru yi uwae rukong u ru ka yag itso ti tinyang atang.

²⁵Ama usir iki kiye ti ande meme ku cwag kicwag utitang, unde ti rika-wu ru ba pu arisab tso fa ti itso ti tinyang yine u ru-wu iken-wu tiri.

²⁶Kiye ti ayi ruye u ku ba kyaen rishwu tiri, arisab ta atang ama.

²⁷Apyi unde wu ba ri te wu baa, “Unde ti uwe, afu yag-fu itso ti tinyang yi uwae rukong-fu be a. Ama arisab ru kyi-yi aka ba ta uwae atang?”

²⁸Awu ri baa, “Ayi si kang unde ti rika-m iki ti yag iken yine.” Ama apyi-wu ri baa, “Afu ku sha ti ti na sub yi byir a.”

²⁹Awu ri baa, “Iyee. Iki be kiye ti ani a ku sub yi, ani u sub pu iti tinyang fa ti atang ama.

³⁰Ikyaen yine, ni ya yi ta ti yi ā ser tetso se kiye ti a u bunn yi bunn. À ba kiye itibunn, ame u ri te ande ti ku bunn yi ti aba ā byir yi, ti aba ā yir yi ukaen ukaen u twen mbub yi. Ama iti tinyang, a u pu ru ka si kurug-m.”

³¹Yesu sunn te kyi ba ira iki baa, “Kujwokwe Rimam si pangma isinn musita ti unde sa wu tso riben.

³²Itso wune yib siskeb uwae itso iken meme, amaa, kiye ti awu a ser tso fe, awu ku kafe kufub ti ko siskeb patag uwae iken ti ku shab riben. Awu u kafe kutuku ti inung ku ba kyae afug-yi ijwe ajwo-wu.”

³³Yesu sunn te kyi ba ira iki cwucwo baa, “Kujwokwe Rimam ti apupwen pangma yisiti ti unda sa pang ahan tsinn fa umung kitu kumyae ita, ama ayi ndub tso ba munn ti ijwe kitu.”

³⁴Yesu ri meme ira yine te ande ti funn uwog-wu yi ira ti sunn. A si-yi ira ti sunn be, awu ku ri-wu ira iki te ba be.

³⁵Awu nde yine ikyaen ti wu u kumunn ira ti unde ti ku ya iskin ira Rimam ri ti kute baa, “Ame u ri ira te ande ti ira ti sunn. Ame u ri tso ira ti a tam yi tam ti kiye ti a bag utense.”

³⁶Ama awu ya ande ba ta, u sang yi uwae kusog. Atugbug-wu ba tu wu u ri baa, “Ri te ti umbyi ira ayine risu arisab uwae risaen alikama.”

³⁷Awu ri te ba baa, “Unde ti ku ta itso ti tinyang yine si Umbae Unde.

³⁸Uwae rukong wu ama si utense ike. Itso ti tinyang ama si ande ti ta uwae Kujwokwe Rimam. Itso arisab ama si ande ti si ana unde titibi wu.

³⁹Unde ti rika wu ti tso iken yi ama si Shetann. Kiye itibunn ama si ricwunnkyi na utense wune. Ande ti ku bubunn ama si atom Rimam ti apupwen.

⁴⁰Pangma ti a byir arisab ru ka twen mbub urwa, ayi u si ahan ama kiye ti ricwunnkyi.

⁴¹Umbae Rimam u tom atom-wu ti apupwen kyang kyi fe uwae Kujwokwe-wu, ama aba u byir tag ande ti ku nda ni nde ikentitibi ti ande ti ku nde wande titibi meme.

⁴²Awu u pu ba ru ka jwunnsi uwae urwa uwog ti a u jwub ira u kub nger.

⁴³Ama ande ti som usom ti saen kyag u jijaen wur wur pangma usir yi Kujwokwe ana Itse-ba. Unde ti a site atong ti ku fxen ira, awu ā fxen.

⁴⁴“Kujwokwe Rimam ti apupwen pangma rifunn ti tam riben ti unde iki tu fe wu u tam kyi wu ti atang. Ikyaen utob titsen, awu ru ka pu iken ti awu ta te yi meme jabci u ba jab ra riben wune.

⁴⁵“Kujwokwe Rimam pangma unde ti ku kafe ajwo ku kyang ku sha atxom aser.

⁴⁶Kiye ti awu tu kutxom kinjo ti tinyang ti u shir aser yang-yi ba na wu, awu ru yi uwae kununn u ka pu isu-wu meme jabci u ba jaebra awune.

⁴⁷“Cwucwo Kujwokwe Rimam si pangma kukye ti a pu si uwae uyinn u ye iwag ti tsotso.

⁴⁸Kiye ti awu a munn pu wu, a ru ba shir wu tso yi ukunn uyinn u som riben u tsab ti tinyang si uwae atyika u pu ititibi tika.

⁴⁹Ti mbwe-yi ama kiye ti utense u cwunnkyi, atom Rimam ti apupwen u ba tsab ande ti ku nde iken ti tinyang ruye uwae ande ti ku nde ikentitibi.

⁵⁰Aba u pu aba ti ku nde ikentitibi jwunnsi uwae urwa uwog ti ande u jwub ira u kub nger.”

⁵¹Yesu rang ba baa, “Ani nungye pu ni umbyi ira yine a?” Aba ri baa, aba na nungye pu ba.

⁵²Ama awu ri te ba baa, “Ikyaen ayine, unde ti ku kwen na ande icwe Rimam, asiti a kwen na pu ba awu ira Kujwokwe Rimam fa atang, awu si pangma unde ti kununn ti ku sa ruye uwae rifunn-wu iken tishe ti itikyi meme.”

⁵³Kiye ti Yesu mam tag pu wu ira ti sunn yine, awu ya atang ta

⁵⁴u kafe ba uten ti ana-wu. Ti awu ku kwen iken kusog Rimam atang, ira-wu ayi fur ba ayib. Aba ri baa, “Unde wune tu-wu itsab ti iken ti ku fur ayib ayine aka? Awu nde rimang tawe awu ku nde wande ti ku fur ayib yine?

⁵⁵Awu si-wu umbae kafinta wu be a. Si-yi umbae ti rinyi iya-wu baa Mberimu be a? Aba Yakubu ti Yusufu ti Siman ti Yawuda si-ba ameinja-wu be a?

⁵⁶Meme ambakaya-wu ama ta te-ba ati ike be a. Awu ama ru ka tu-wu iken yine aka?”

⁵⁷Ama aba ndembeb utob te wu. Amaa Yesu ri te ba baa, “Unde ti ku ya iskin ira Rimam ku tu kuko uwog ande ko aka meme, se uwae uten-wu ti uwae kununn-wu ti awu u shanum kuko atang.”

⁵⁸Ama awu nde-wu wande ti ku fur ayib yang-yi atang be, ikyaen ti, aba ru-ba uwae kinjo be.