Read kutep Matiyu 14 Bible Online

Matiyu 14 - kutep bible

Matiyu 14

¹Ama uwae kiye wune Herodus unde ti ta risu uten Galili fxen iten Yesu.

²Ama kiye ti awu fxen iten Yesu ne, awu ri te apyi-wu baa, “Unde wune si kang Yohana ti ku nde batisma. Awu kafe ba pu wu ti unyang. Ayine si iken ti nde nee awu tu kuko ku nde wande ti ku fur ayib yine.”

³Ti kucang-yi Herodus ye Yohana, u cwong wu, u pu cwunn pursuna ikyaen Hirodiya, uwa inja-wu Filip.

⁴Ikyaen ti, Yohana tsikunn ti ku ri te Herodus baa, ti awu na mbe uwa inja-wu né, awu na raen ira.

⁵Herodus sha ti wu wen Yohana, amaa, awu kyen ikyenricwu ande ti ta atang ikyaen ti, aba ku kunn Yohana baa, unde ti ku ya iskin ira Rimam.

⁶Amaa, kiye ti Herodus ba sang usir ti a mbae wu atang, awu nde ukwab u nda unda Herodus se ise ayib ujwunn ande ti funn atang. Ise mbawandab wune nyang uwae Herodus timambe.

⁷Awu yer unju te wu baa, meme iken ti mbawandab wu a jwam wu, awu na u nda wu.

⁸Ama iya mbawandab wu ri te wu baa, awu na ka jwam risu Yohana ti ku nde Batisma. Ikyaen yine, mbawandab wu ri te Herodus baa, “Nda m risu Yohana ijwe kupam.”

⁹Ira yi ndembeb Ukwe utob, amaa, ikyaen unju ti awu yer ayib ujwunn ande, awu nda apyi-wu unju baa, aba na nde.

¹⁰Awu tom ande ru ka pye risu Yohana uwae pursuna.

¹¹A sa risu Yohana nae fa ijwe kupam u sa ba na mbawandab wu, awu ama sa nwunn ru ka na iya-wu.

¹²Isim yine, ande ti imbyi Yohana ru ba su rukom-wu ka nji u ru ka ri te Yesu.

¹³Kiye ti Yesu fxen iten iticwu Yohana, awu nwunn u sang uwae kuyae u yen uyinn u ru fe yi uwog ti ande ta-ba atang be, u ka som atang kinjo-wu. Ama kiye ti ujwunn ande fxen baa awu na ta atang, aba ya uten-ba ta u kyang te afxen ba tu wu.

¹⁴Ti Yesu tsoye uwae kuyae, awu nung kumbub ande funn atang. Ama risi ye wu. Awu nwangru ande ti acaeb ti ta atang.

¹⁵Usir pang kujwo ureb, atugbug-wu ba tu wu u ri te wu baa, “Uwog byi ku kyi pu wu, anunn ande ta-yi ike be. Ati ku jwam fu, ri te ande bane ti a ru ka jab-ba wuci uwae imbae uten uten.”

¹⁶Yesu ri te ba baa, “Aba u ru-ba ahan amam be, ni sha na ba itici.”

¹⁷Aba ri te wu baa, “Ati site nyang abyi buredi itsong ti iwag ifaen amam.”

¹⁸Yesu ri te ba baa, “Ni pu yi ba ike.”

¹⁹Awu nda ande ba somtsa irim uwog ti wur iki. Awu pu abyi buredi itsong ti iwag ifaen yine fwa ajwo u sae ayib apupwen u nde fxaefa na Rimam. Isim yine, awu nyangta wuci ne u pu na ande-wu ti a na kan na ande ba.

²⁰Ande ba ci num wuci yi, ama a byir amumunn-yi munn atyika rijwe asu ifaen.

²¹Ujwunn ande ti ci wuci yi si kumbub itsong, a pwen-ba anda ti anyisu fa-ba atang be.

²²Isim yine Yesu ri te atugbug-wu baa, a na sang kuyae ti a na ru-ba ru uwe yi ukunn akwen uyinn, ti wu na u tē ande ti tsitsi.

²³Isim ti Yesu tē mam ande ti funn atang, awu tso yi kitaen rikwen kinjo rikaen-wu u ka jwam Rimam. Kiye ti usir pang kujwo ureb awu som atang awu amam.

²⁴Ande ti imbyi-wu ama ta uwae kuyae uwae uyinn. Aba ta fengo ti rwen. Ambyi ku su ra kuyae tsutso sisi ikyaen ti, ufunn ku kae ken tag.

²⁵Kiye ti mbakunn ba ku ta ira, Yesu ru ba tu ba uwae uyinn atang u ku kyang ikyin risu ambyi.

²⁶Ti a ter pu ayib sae awu kyang ikyin risu ambyi ku ba, ikyenricwu ye ba. A ri te atso baa, awu na si ricwu! Ama aba su ukunn tso.

²⁷Yesu ri te ba ti ritsen baa, “Ni kpag utob, ni kyen-ni ikyenricwu be, si ame ti ku ba.”

²⁸Tiri Bitrus ye ra unju tso baa, “Itsekuru, ayi a si afu kubenti, nda m ti m kyang putsa ambyi ba tu fu.”

²⁹Yesu cwe na wu baa, “Ba.” Bitrus ruye uwae kuyae u kyang ru ka putsa risu ambyi ru ka tu Yesu.

³⁰Ama kiye ti awu sae ye ufunn ku kae ti ribom, ikyenricwu ye wu, afxen-wu si ku byinn uwae ambyi. Awu taen ira baa, “Itsekuru, nwangru m.”

³¹Ti ritsen Yesu ndab ta kujwo u shir ra wu tso u rang wu baa, “Afu unde ti kubenti-fu ko-wu be, afu nde rimang ku kab uwae?”

³²Isim yine aba kafe ru ka sang uwae kuyae, ufunn ti ku kae ya ta.

³³Ande ti tsitsi ti ta uwae kuyae atang fen Yesu u ri baa, “Kubenti, afu si Umbae Rimam.”

³⁴Yesu ti ande-wu yen uyinn u ru ka sang uten Genesare.

³⁵Ti ande ti uten atang nungye Yesu, aba tom ande ru ka pu ande ti acaeb ti ta uten-ba meme ru ba uwog-wu.

³⁶Aba jwam wu baa, asiti awu na a cwe ira, ande ti acaeb bane na tekunn unju kutupwa-wu amam. Ama meme ande ti tekunn kutupwa-wu, kicaeb-ba jim.