Read kutep Matiyu 17 Bible Online

Matiyu 17 - kutep bible

Matiyu 17

¹Isim usir itsongnjo Yesu pu Bitrus te Yakubu te inja-wu Yohana tso yi kitaen rikwen iki ti rikob ka som atang aba amam.

²Ama ijwe Yesu kafife. Kutxuwe-wu kafe titsen u ku jaen ku wurwur pangma usir, atupwa-wu ama tsen porr.

³Ti ritsen ti aba u nunung, Eliya ti Musa si ba te Yesu ku ri ira.

⁴Ama Bitrus ri te Yesu baa, “Itsekuru, ayi nyang ti ati ta ike. Nee afu a cwe, ame u kyae afug ita rikwen ike, kinjo ikyaen-fu, kinjo ikyaen Musa kinjo ama u si ikyaen Eliya.”

⁵Ti Bitrus ku ri ira yine, kutakujwujwu si ba ta kyi ba. Kutakujwujwu wune jaen wurwur. Aba fxen afxenjwin uwae kutakujwujwu wu baa, “Awune si Umbae-m ti ame site ure te wu. Ame ku tsen utob te wu. Ni fxen wu.”

⁶Kiye ti atugbug na Yesu fxen afxenjwin wune, ikyenricwu ye ba timambe, aba pu uwe-ba si ka bur riben.

⁷Yesu ru ba tu ba u sa kujwo tekunn ba u ri baa, “Ni sunwunn ritsen! Ni kyen-ni ikyenricwu be!”

⁸Ti aba sae ayib tso ritsen, a nung-ba unde iki atang cwucwo be, se Yesu amam.

⁹Kiye ti aba sī kitaen rikwen atang ku ba Yesu fwa ba kusen baa, “Ni ri te-ni unde iki ira risu iken yi ti ani nung kitaen rikwen be, se iken ti Umbae Unde a shwur pu wu uwae iticwu itawe.”

¹⁰Aba rang wu baa, “Ande ti ku kwen na ande Icwe kyang rimang ku ri baa, Eliya na u ba titawe?”

¹¹Yesu ri te ba baa, “I si kubenti ti a bae baa, Eliya na u ba ti wu na kyae iken meme tsi ku jiji.

¹²Amaa, ame ku ri te ni kubenti, Eliya ba mam pu wu, ama ande nungye-ba awu be. A sae ru wu u nde iken ti aba ku sha te wu. Ti mbwe-yi ama, a u nde Umbae Unde rikaen ama.”

¹³Tiri aba nungye baa, awu na ku sunn ira risu Yohana ti ku nde batisma.

¹⁴Kiye ti Yesu ti atugbug-wu ita kafe si ba tu atugbug ti tsitsi meme, unde iki ru ba ku riben uwe Yesu

¹⁵u ri te wu baa, “Itsekuru, sae umbae-m te ayibrisi. Kicaeb kiku ku nde wu ira, awu ku ngwa rikaen timambe. Awu ku jwunnsi kob uwae urwa ko uwae ambyi.

¹⁶Ame pu wu ba tu atugbug-fu, amaa a nwangru-ba wu be.”

¹⁷Yesu ri te ba baa, “Ani ande ti kiyuku kwen utob, u kpag risu. Ame u som te ni ba kwer isinn? Ame u ye utob te ni ba kwer isinn? Ni pu umbae wu ba na m ike.”

¹⁸Yesu fwan rijwen titibi wu kibyag, ama awu ruye yi rimenn umbae wu. Ama ti ritsen, umbae wu tu itinwangru uwae kicaeb kiku-wu.

¹⁹Isim yine atugbug na Yesu tam ba tu wu u rang wu baa, “Imi ti nde nee ati jae ruye tu-ti rijwen titibi yi be?”

²⁰Yesu ri te ba baa, “Ikyaen uwae kinjo-ni ti ko-yi be. Ame ku ri te ni kubenti, á baa ani na site uwae kinjo ti ko pangma riyaen isinn musita ti yib siskeb, ani ú ndeye ti ni ri te rikwen ne baa, ‘Nwunn ru ike ka tsi akwen,’ awu u nwunn ru. Asiti ani a ru uwae kinjo, ani u nde tu iken meme[14].”

²²Kiye ti atugbug ba byir tag yi uten Galili, Yesu ri te ba baa, “Kiye pang ku pu wu ti a u sa Umbae Unde fa si kujwo ande.

²³A u wen wu, ama usir ti ita, awu u nwunn ti unyang.” Ti atugbug ba fxen ira yine, utob-ba ndembeb.

²⁴Kiye ti Yesu ti atugbug-wu ba sang uten Kaparnawum, ande ti ku mbe aser ukwē yi kusog Rimam ba tu Bitrus u rang wu baa, “Unde ti uwe-ni ku pae aser ukwē ti a ku kwē kusog Rimam a.”

²⁵Awu ri baa, “Een awu ku pae.” Ama kiye ti Bitrus sang ka uwae kusog, Yesu tawe rang baa, “Siman, afu ku kab baa imi? Yi kujwo aye ti abikwe na utense ku mbe aser ukwe? Yi kujwo anyisu-ba ree, re yi kujwo ande ti rikyen?”

²⁶Kiye ti Bitrus ri baa, “Kujwo ande ti rikyen.” Tiri Yesu ri baa, “Ayi a si ahan, ande ti uten u pae-ba aser ukwe be.

²⁷Amaa, ati ku sha-ti ti ti u nda ande bane ndembeb utob te ti be. Ikyaen yine, ru yi uwae unyim ti ta ishir. Iwag ti afu a shir tso ti kucang, afu a sa kujwo si unju-wu, afu u tu riyaen aser. Sa ka pae na ba ikyaen-fu te m.”