Read kutep Matiyu 20 Bible Online

Matiyu 20 - kutep bible

Matiyu 20

¹“Kujwokwe Rimam ti apupwen pangma unde ti risaen ti nwunn kiskinn fifae ti wu u ru ka sha ande ti u nde na wu wande uwae risaen ufang-wu.

²Awu yer unju te ba baa, awu na u pae ba aser ti pang usir kinjo, dinari kinjo. Isim yine awu tom ba ru yi risaen atang.

³Aser itsongnje ti kiskinn, awu nwunn u ru yi ritug u ka tu ande iki uwae ritug atang. Aba ku nde-ba iken iki be.

⁴Unde wu ri te ba baa, ‘Ni ru ka nde wande uwae risaen-m, ama ame u pae ni kiser ti pang atang.’ Ande ba nwunn u ru yi risaen atang.

⁵Ti awu ru kyi aser rijwe, ti aser ita, awu nde pangma ti kucang.

⁶Yi aser itsong ti ureb, awu ruye u ka tu ariki u rang ba baa, ‘Ani nde rimang som ti ukaen ahan?’

⁷Ande ba ri te wu baa, ‘Unde iki yae-wu ati wande be.’ Unde ti risaen wu ri te ba baa, ‘Ni ka nde wande uwae risaen-m ama.’

⁸“Kiye ti ayib wunn, unde ti risaen wu ri te unde ti uwe wande-wu baa, ‘Kunn ande ti nde wande bane byir ti uwog kinjo ti u pae ba aser wande-ba. Pae ande ti ba ti ricwunnkyi titawe ti ba pae ande ti kucang.’

⁹A pae ande ti ba aser itsong ti ureb dinari kinjo kinjo meme-ba.

¹⁰Kiye ti ande ti ba ti kiskinn sae iken yine, a tang baa, aba na u tu siskeb, amaa, a pae na ba dinari kinjo kinjo ama.

¹¹A mbe aser yine u sang unju ti pwen risu unde ti risaen wu.

¹²A ri te unde ti risaen wu baa, ‘Ande ba ti ba aser itsong ti ureb ne nde nyang wande kiye pang, ati nde wande ti kiskinn pu usir te rikwen ama afu pae ti pang atso.’

¹³Unde ti risaen wu ri te kinjo uwae-ba baa, ‘Urwan, ame ci-m ani ci be. Afu yer-fu unju te m baa, afu na u nde wande dinari kinjo uwae usir kinjo be a.

¹⁴Mbe aser-fu ti fu ru. Ame ti ku sha ti m u pae unde ti ame yae ti ricwunnkyi ne te fu pang atso.

¹⁵Ame site-m kuko ti m u nde iken ti m ku sha te aser-m be a. Ko afu ku tsinn kitsinn ikyaen ti ame ku ndeya ande a.’ ”

¹⁶Yesu ri kyi cwucwo baa, “Ayi si ahan ama, ande ti uwe u kafe ande ti isim, ande ti isim u ba kafe ande ti uwe.”

¹⁷Kiye ti Yesu ku tso yi uten ti Urushelima, awu kunn ande-wu ira ru iyen kyab. Ti aba kyang ku ru fengo, awu ri te ba baa,

¹⁸“Ni naa atong. Ati ku tso yi Urushelima, ama a u ye Umbae Unde na akwen tiyang ti ande ti ku kwen na ande icwe. Aba u pwen wu rikwen iticwu,

¹⁹ama u ye wu na ande ti nung-ba ira Rimam be. Aba u skaen wu ikyaen u byinn wu kimbab u sa wu kwer risu kutuku ti cice. Ama uwae usir ti ita awu u nwunn ti unyang.”

²⁰Uwa Zebedi ru ba uwog Yesu te anyisu-wu u ba ku riben uwe Yesu ama u jwam iken uwog-wu.

²¹Yesu rang wu baa, “Imi ti afu ku sha?” Unda wu ri tso baa, “Yer unju te m baa, anyisu ifaen bane na u som kujwo rici-fu ti kujwo ife-fu kiye ti afu a som yi kujwokwe-fu.”

²²Yesu ri te ba baa, “Ani nung-ni iken ti ani ku jwam be. Ani u ngwa tu rikaen ti ku ba uwe-m ne a.” A cwe baa, “Ati u ngwa tu.”

²³Awu ri te ba baa, “Een, ani u ngwa rikaen-m ayi ara. Amaa ame site-m kuko ti m u tsab ande ti u som kujwo rici ko kujwo ife-m be. Ayi si ana Itse-m Rimam ti awu u tsab ande ba ti u som uwog yine.”

²⁴Kiye ti ande-wu rijwe ti tsitsi fxen ira yine, aba tso rinae te anyisu Zebedi bane.

²⁵Ama Yesu kunn byir ba u ri te ba baa, “Ani nung pu ni baa, uwae uten na ande ti nung-ba Rimam be, afaen ukwe na site kuko risu ande ti aba nae ukwe risu-ba. Ande ti uwe-ba ye su-ba ti kpakang.

²⁶Ame ku ri te ni ti ayi u si-yi ahan uwog-ni ama be. Asiti unde uwae-ni a ku sha ti wu u nae ukwe, awu ā sa risu-wu tsi pangma upyi ande ti tsitsi.

²⁷Cwucwo asiti unde iki uwae-ni a ku sha ti awu u si unde ti uwe, awu ā sa ijwe-wu tsi pangma upyi ande ti tsitsi,

²⁸pangma ti Umbae Unde ti ba-wu ikyaen ti a u nde wande na wu be, amaa ti wu u nde wande ama u cwu ricwu ikyaen ti wu u nwangru ande yang-ba.”

²⁹Kiye ti aba ku nwunn Jeriko, kumbub ande yang-ba putsa Yesu.

³⁰Ande ti mbub ayib ifaen som iyen fengo atang. Kiye ti aba fxen baa, Yesu na ku ru fengo atang, a taen ira tso ritsen baa, “Umbae Dawuda, sae ti te ayibrisi!”

³¹Ujwunn ande fwan ba kibyag ti a na bwe tag skirr. Amaa aba taen ira tso skeb kyi ti kucang u ri baa, “Itsekuru! Umbae Dawuda, sae ti te ayibrisi!”

³²Yesu kyae tsi u kunn ba ira u rang ba baa, “Imi ti ani ku sha ti m na nde na ni?”

³³A ri te wu baa, “Itsekuru, ati ku sha ti ayib-ti na mbub tita.”

³⁴Yesu nung risi-ba u sa kujwo tekunn ayib-ba, ama ti ritsen aba sae uwog ama u putsa wu.