Read kutep Matiyu 21 Bible Online

Matiyu 21 - kutep bible

Matiyu 21

¹Kiye ti aba ka ye Urushelima, a ru ba yi Betifaji, ti ta fer ti Rikwen Zetunn. Yesu tom ande-wu ifaen

²u ri te ba baa, “Ni ru yi imbae uten ti kú uwe-ni akwen. Ani a ka pu ni atang, ani u nung ikyinnsu iki ti umbae-wu kya tetso. Ni saen yi ti ni pu ba na m.

³Asiti unde iki a byib ni ira, ni ri te wu baa, Itsekuru na ku sha yi. Ama ti ritsen, awu u tom yi ru.”

⁴Iken yine nde ikyaen ti ayi ā kumunn ira ti unde ti ku ya iskin ira Rimam ri ti kute baa,

⁵“Ni ri te Mbawandab Siyon baa, ‘Sae, ukwe-fu ku ba yi uwog-fu ti risu ti nae riben. Awu tso ikyinnsu, u tso imbae ikyinnsu.’ ”

⁶Atugbug ifaen ba ru ka nde pangma ti Yesu ri te ba.

⁷A tae ikyinnsu wu ti umbae-wu ru ba u pu atupwa-ba ta ku tsa risu-yi. Yesu tso ka som tsa atang.

⁸Ujwunn ande pu atupwa-ba ta fengo, ariki ama pyer atsingken ituku u pu ta fengo.

⁹Ande ti ku ru uwe Yesu ti ande ti ta isim-wu tso ukunn u ri baa, “A teb rinyi Umbae Dawuda! Itinyang ā si ana unde ti ba yi rinyi na Itsekuru! Ititeb ā ta apupwen.”

¹⁰Ti Yesu kyang ba sang Urushelima, meme uten wu kyirunn. Aba ku rang atso baa, “Awune si aye?”

¹¹Ande ti ku putsa Yesu ku ri te ba baa, “Awu si Yesu unde ti ku ya iskin ira Rimam ti ruye Nazareti ti ta Galili.”

¹²Yesu sang ka utabshi kusog Rimam tiyang u ka rwae ruye ande ti ku jabci te isu ti ande ti ku jab isu uwae utabshi kusog Rimam atang, u ye tebur na ande ti ku fi aser fxaebur, u ye iken ti som ande ti ku jabci te akwae byinn shag.

¹³Awu ri te ba baa, “A bae uwae Kutsingken Rimam baa, Rimam na ri baa, kusog-wu na si uwog ti a na ku jwam wu atang. Amaa ani sa wu kafe uwog ti ande ti riyib ku tam atang.”

¹⁴Ande ti mbub ayib ti ande ti cwu afxen ti ajwo ru ba tu Yesu uwae kusog Rimam atang, ama awu nwangru ba.

¹⁵Amaa, akwen tiyang ti aba ti ku kwen na ande icwe tso rinae kiye ti aba nung iken ti fur ayib yi ti Yesu ku nde, u fxen anyisu tinying ku tso ukunn uwae kusog Rimam atang ku ri baa, “Ā teb rinyi Umbae Dawuda.”

¹⁶Aba rang Yesu baa, “Afu fxen ira ti anyisu bane ku ri a.” Yesu ri te ba baa, “Een. Ani nung-ni iken ti a bae uwae Kutsingken Rimam baa, ‘Afu nda ititeb ruye unju anyisu tinying ti aba ti ku nyam abyaen’ be a.”

¹⁷Yesu ya ba ta u ru yi Betani u ka nae atang.

¹⁸Ucwefam kiskinn ti Yesu kafe ru Betani ku ba yi Urushelima, rimenn ye wu.

¹⁹Awu nung kutuku kututung iki tsi iyen fengo atang. Ti awu ru ka umbyi kututung wu ama, awu tu-wu awaen iki atang be, se atsing-wu amam. Awu ri te kututung wu baa, “Afu u waen-fu awaen cwucwo be.” Ti ritsen, kututung wu wam cwu.

²⁰Ti atugbug Yesu nung iken yine, ayib fur ba, ama a rang wu baa, “Kututung wu nde rimang u wam cwu-wu ti ritsen ahan amam?”

²¹Yesu ri te ba baa, “Kubenti ti ame ku ri te ni, asiti ani a ru kubenti u kab-ni uwae be, ani u nde-ni nyang wande ti ame nde te kututung ne be. Ani a ri te rikwen ne baa, awu na nwunn ka jwunnsi uwae uyinn, ayi u nde.

²²Ame ku ri te ni baa, iken meme ti ani a ku jwam uwog Rimam, asiti ani a ru uwae kinjo, ani u tu yi.”

²³Yesu kafe ba ti kusog Rimam atang. Ti awu nwunn ku kwen na ande ira Rimam, akwen ti ande ndufu uten ru ba byib wu baa, “Afu tu kuko yi aka ku nde iken yine? Unde ti nda fu kuko yine si aye.”

²⁴Ama Yesu ri te ba baa, “Ame u rang ni ira kinjo ama. Asiti ani a ri te m imbyi-yi, ame ama u ri te ni itso kuko ti ame site titawe u ku nde iken yine.

²⁵Yohana ti ku nde batisma tu kuko-wu aka? Ayi ruye uwog Rimam ree, re ayi ruye uwog unde?” Aba sang ira ti skab kutampwa-ba, ku rang atso baa, “Asiti aba a ri baa, kuko na Yohana na ru uwog Rimam ba, Yesu na u rang ba baa, imi ti nde ne aba na ru-ba kubenti uwog Yohana be.

²⁶Amaa, asiti aba a ri baa, ayi na ru uwog unde ba, aba ku kyen ikyenricwu ujwunn ande ba ti ta ike ne, ikyaen ti, unde titini sa tsi baa, Yohana na si unde ti ku ya iskin ira Rimam.”

²⁷Ikyaen yine, aba ri te Yesu baa, “Ati nung-ti be.” Yesu ri te ba baa, “Ani a nung-ni be, ame ama u ri te-m ani uwog ti ame tu kuko na wande yine be.”

²⁸Yesu ri baa, “Ani ku kab baa, imi? Ame u rang ni ira iki. Unde iki site anyisu ifaen. Awu ri te umbae tikucang baa, ‘Uyin-m, ru ka nde wande uwae risaen ufang yaka.’

²⁹Umbae wu ri te ite-wu baa, ‘Ame u ka-m be.’ Ama isim-yi tiri, awu kab kyi ira u ru ka nde wande yi.

³⁰Unde wu nwunn u ru ka tu umbae wu ti ifaen u ri te wu baa, awu na ka nde wande risaen ufang. Umbae wu cwe baa, ‘Ame u ka, Itsekuru,’ ama u ka-wu be.

³¹Umbae titini uwae anyisu bane ti nde iken ti ite-wu ku sha?” Aba ri baa, “Umbae ti kucang.” Yesu ri te ba ama baa, “Ame ku ri te ni kubenti, ande ti ku mbe aser akwe ti iyaen ku sang Kujwokwe Rimam uwe-ni.

³²Yohana unde ti ku nde batisma ba uwog-ni u tatso ni usom ti som ti saen kyag, ani ru-ni uwae kinjo uwog-wu be. Amaa ande ti ku mbe aser akwe ti iyaen ru uwae kinjo uwog-wu. Isim yine, ko ti ani nung iken yine, ani kafe isim ta-ni ikentitibi-ni be. Ani ru-ni uwae kinjo uwog-wu be.”

³³Yesu ri baa, “Ni naa atong ti ni fxen kyi ira ti sunn iki. Unde iki ta atang u ru ka pye risaen-wu u yen ituku anam atang. Awu fae kundag pakob risaen wu, u kyae tag kukúm, uwog ti a u kum awaen yi atang, u kyae tag kitaen kujwin ti aba u som atang u nungkyi risaen wu. Isim ti awu nde tag iken yine, awu sa risaen wu na ande iki ti aba tom, u ru-wu iken-wu yi fengo rikyen.

³⁴Kiye ti awaen yi ben ku pu yi, unde wu tom apyi-wu ti aba na ka mbe kutunn-wu.

³⁵Ama ande ti ritom ti ta risaen atang ye apyi abane u byinn kinjo, u wen iki, u jwunn kinjo iki te atxom.

³⁶Unde wu tom kyi apyi iki skeb kyi aba ti kucang, ama ande ti ritom ba ye ba u byinn kyi pangma ti kucang.

³⁷Ti ricwunnkyi tiri, unde ti risaen tom umbae-wu ru yi ufang atang. Awu ri te ijwe-wu baa, ‘A fxen-ba apyi-m be. Aba u sa rurob na kang umbae-m!’

³⁸Ama ti ande ti ritom ba pu ayib nungye umbae wu, a ri te atso baa, ‘Nung umbae ti u ci rifunn unde wu ta ri. Ni ba ti ti wen wu, ti ti tso kyi rifunn-wu.’

³⁹Ama aba ye umbae wu u shir wu ruye uwae risaen atang u ka wen wu.

⁴⁰“Tine, ni ri te m, kiye ti unde ti risaen wu a ba, awu u nde ande ti ritom ba rimang?”

⁴¹A ri te wu baa, “Awu u wen tag ande titibi bane meme u sa risaen wu na ande tishe ti u pu kutunn-wu ba na wu kiye ti usen a fam pu wu.”

⁴²Yesu ri baa, “Ani nung ti a bae uwae Kutsingken Rimam baa, ‘Kutxom ti ande ti ku mbye asog sae ru wu ru, kutxom wune kafe kutxom ti a u mbye rikwerfe kusog atang. Rimam ti nde ayine ti ajwo-wu. Ayi si iken ti ku fur ayib uwog-ti.’ ”

⁴³“Ame ku ri te ni baa, ayi si ahan uwog-ni. A u ye ra Kujwokwe Rimam uwog-ni u nda unde ti ku waen awaen ana kujwokwe-wu.”

⁴⁴Unde ti a kaensi yi ijwe kutxom wune, awu u skaye skaye, ama unde ti kutxom wu a jwunnsi kwab wu, awu u shir nam wu.[18]

⁴⁵Ti akwen tiyang ti ande ti kumbub Farisi fxen ira ti sunn yine, a nungye baa, Yesu na ku ri ira risu-ba.

⁴⁶Ikyaen yine aba kwab ti a u ye wu, amaa, aba ku kyen ikyenricwu ande ti funn atang, ikyaen ti, ande ba sa tsi baa, Yesu na si unde ti ku ya iskin ira Rimam.