Read kutep Matiyu 23 Bible Online

Matiyu 23 - kutep bible

Matiyu 23

¹Yesu ri ira te ande ti funn atang ti atugbug-wu baa,

²“Ande ti ku kwen na ande icwe Rimam ti kumbub Farisi si ande ti a nda ba kuko ti a na ri te ande imbyi icwe Musa.[19]

³Ikyaen yine ni nae risu riben ti ni putsa ira ti a ri te ni meme. Amaa, ni putsa-ni ajwo wande-ba be, ikyaen ti, aba ku nde-ba iken ti aba ku kwen na ande be.

⁴Aba ye usu ti rob timambe nae tsa ande ukwae, amaa, aba ti risu-ba cwe-ba ti a u sa kukyikyin kujwo ndeya ande ti su usu yi be.

⁵Aba ku nde iken-ba meme ikyaen ti ande na nung. Nasi ti a pu bae kyi fe uwe-ba ti ajwo-ba yaen skeb ana ande meme. A ku kyae nyang unju atupwa-ba ti ande na nung.

⁶Aba ku sha kob ti a u som kutugbug ti site rurob yi uwog ukwab, ti kutugbug ti tinyang uwae kusog Rimam.

⁷Aba ku sha ti ande na kunnji ba ira uwae ritug baa, ‘Unde ti uwe.’

⁸Ni cwe-ni ti ande a kunn ni baa, unde ti uwe be, ikyaen ti, ani si ameinja atso u site nyang unde ti uwe kinjo amam.

⁹Ni kunn-ni unde iki baa ‘Ite’ uwae utense ike be, ikyaen ti, Ite-ni si nyang kinjo amam, awu ti ta apupwen.

¹⁰Ni cwe-ni ti a kunn ni baa, ‘Unde ti ku kwen iken’ be, ikyaen ti, unde ti ku kwen iken-ni si nyang Kristi amam.

¹¹Unde ti ko siskeb uwae-ni ā si upyi-ni.

¹²Unde ti a ndub risu, a u shir wu si yi riben. Unde ti a nae risu riben ama, a u shir ra wu tso yi apupwen.

¹³“Ayae-ni, ani ande ti kumbub Farisi ti ani ande ti ku kwen na ande ira Icwe. Ani ande ti kufur! Ani cwunnkyi ufu kusog Kujwokwe ti apupwen ayib ande, amaa ani ti risu-ni, i si-yi ti ani u sang-ni be, cwucwo ande ti kwab ti a u sang, ani byang kyi ba fengo.[20]

¹⁵“Ayae-ni ande ti kumbub Farisi ti ani ande ti ku kwen na ande ira Icwe! Ani ande ti kufur! Ani ku yen uyinn ku kyang kyife uten meme ku sha ti ni u shir ande ba fengo Rimam, ama kiye ti awu a ba putsa pu wu Rimam, ani ku sa wu kafe unde ti skeb ni skeb ti ira titibi, rikaen-wu ama uwae urwa ti ku jim-wu jim be u ba beb skeb ana-ni atsepu ifaen.

¹⁶“I si iken ti ku nde risi uwog-ni! Ani mbub ayib u ku tae ande iki tae. Ani ku kwen na ande baa, ‘Asiti unde a ben uben yi Kusog Rimam, uben-wu ayi u nde-yi iken iki be, amaa asiti awu a ben te zinariya ti a pu tsi kusog Rimam atang, uben-wu u ye wu.’

¹⁷Ani ande ti kuskwab ti mbub ayib, awu Kusog Rimam site-wu rurob skeb-wu zinariya ti ta uwae-yi be a? I si Kusog Rimam ti ku nda zinariya wu kafe iken ti rurob.

¹⁸Ani ku kwen na kyi ande baa, ‘Asiti unde a ben uben yi kuta ti a ku twen iken atang na Rimam, uben-wu ayi u ye-wu be, amaa asiti awu a ben te rinyangwae ti a cwutsa risu kuta wu, uben na u ye.’

¹⁹Ani ande ti mbub ayib! Iken ti ko skeb si rinyangwae ree, re kuta atxom ti nda rinyangwae wu kafe iken ti rurob?

²⁰Asiti unde a ku ben uben ti kuta kutxom, awu ku ben ren fwa ti rinyangwae ti cwutsa risu-wu meme.

²¹Cwucwo asiti unde a ben uben ti kusog Rimam, awu ku ben kusog wu ti Rimam ti ta uwae kusog wu.

²²Asiti unde a ben uben ti apwa apupwen, i si kutugbug na Rimam ti awu ku ben uben atang, ren fa te Rimam ti risu-wu, awu ti ku som tsa atang.

²³“Ayae-ni ani ande ti kumbub Farisi ti ani ande ti ku kwen na ande ira Icwe, ani ande ti kufur! Ani ku sa kinjo uwae rijwe ana Rimam ruye uwae iken-ni, ka ti atsing kitinyíng, amaa ani ku sha-ni ti ni u putsa Icwe Rimam ti si iken ti ko siskeb be. Wande ti kubenti, ayibrisi, uwae kinjo, ayine si iken ti ani ú nde kang titawe m ba nde kinjo uwae rijwe.[21]

²⁴A ku ri baa, ani na ku tatso ande fengo. Amaa ani si ande ti mbub ayib! Ani ku sa tsoye ikying ti jwunnsi uwae ambyi ti ngwa-ni, ama ku menn kakum si uwae!

²⁵“Iken ti ku nde risi! Ani ande ti kumbub Farisi ti ani ande ti ku kwen na ande ira Icwe! Ani ande ti kufur! Ani ku jwo saen ise atú, ama uwae-yi munn te kufum ti ira ti kab titibi.

²⁶Ani ande ti kumbub Farisi, ani ande ti mbub ayib! I nyang skeb ti ni ru ka jwosaen uwae atu titawe. Asiti ani a nde ahan, uwae-yi ti ise-yi meme u saen.

²⁷“I si iken ti ku nde risi uwog-ni ani ande ti kumbub Farisi ti ani ande ti nung ira Icwe. Ani ande ti kufur! Ani pangma kuskab ti a shi wu te pinti ama ise-wu nyang itisae, amaa, uwae-wu munn te akub ande ti cwucwu ti iken ti ajib ti rimang meme.

²⁸Ayi si ahan ama, ande ku sae ni baa, ani na si ande ti saen kyag, amaa, uwae-ni munn te ira ti kufur ti ira titibi.

²⁹“Iken ti nde risi! Ani ande ti kumbub Farisi ti ani ande ti ku kwen na ande ira Icwe! Ani ande ti kufur! Ani mbye askab ande ti ku ya iskin ira Rimam ama kyae nyang askab ande ti ku nde iken ti tinyang

³⁰ku ri tetso baa, ‘Á baa, a na mbae ti ayib abitse-ti ti kucang, ati ú ren-ti risu te ba u yaen mbub anying ande ti ku ya iskin ira Rimam be.’

³¹Ayine tso baa, ani cwe pu ni baa, ani na si rishi ande ti wen ande ti ku ya iskin ira Rimam ti kucang.

³²Ni ru-ni yi uwe ti ni kumunn kitu wande titibi ti abitse-ni bag!

³³Ani anyisu ajwae ti ikob! Fengo ti rimang ti ani u nwangru uwae rikwen na urwa ti ku twen u jim-wu jim be?

³⁴Ni fxen! Ame u tom ande ti ku ya iskin ira Rimam ba uwog-ni. Ame u tom ande ti ben ayib ti ande ti ku kwen na ande iken. Kubenti, ani u yerwen ariki u kwer wen ariki risu kutuku u byinn ariki kimbab uwae asog Rimam-ni u rwae ba ruye uwae uten uten.

³⁵Yi fengo yine anying na ande ti kubenti ti a wen meme ta risu-ni, tsi uwog Abila awu unde ti kubenti wune ba uwog Zakariya umbae Barakaya ti ani wen kutampwa Kusog Rimam tiyang ti kuta ikentitwen.

³⁶Kubenti ti ame ku ri te ni, meme iken yine u tu ande ti kiyuku ne.

³⁷“Ani ande ti Urushelima! Ani ande ti ku wen atom Rimam u ku pu atxom jwunn ande ti Rimam tom ba uwog-ni. Ko kiye titini, ame ku sha ti m u kunn byir-ni pangma ti mbakunn ku byir anyisu-wu yi asae-wu, amaa, ani cwe-ni be.

³⁸Sae, kusog-fu u kú ukaen.

³⁹Ikyaen yine, ani u nung-ni ayib-m cwucwo be, se usir ti ani a ri baa, ‘Itinyang ā si ana unde wu ti ku ba uwae rinyi Itsekuru-ti.’ ”