Read kutep Matiyu 25 Bible Online

Matiyu 25 - kutep bible

Matiyu 25

¹“Kujwokwe ti apupwen si pangma anyisu wandab rijwe ti pu fitila-ba kaa kyangte ubaen unda ishe.

²Anyisu wandab itsong uwae-ba si ti askwab, itsong ti tsitsi ama ben ayib.

³Aba ti askwab bane kyangsu fitila, ama ye su-ba kindob iki fa atang be.

⁴Amaa, aba ti ben ayib ye su fitila fa ti kindob yi uwae kikwer-ba.

⁵Ubaen unda ishe wu ba-wu fife be, ama anyisu wandab ba skang kicwag ama kicwag ye pu ba ru.

⁶“Ti uka utitang, aba fxen ande ku shwu ushwu baa, ‘Ni sae ubaen unda ishe ba pu wu roo! Ni nwunn ti ni ka tu wu!’

⁷Anyisu wandab bane shwu kicwag meme-ba, unde titini ko urwa fitila-wu tso.

⁸Aba ti askwab ku jwam kindob uwog aba ti ben ayib baa, ‘Ni si ra kindob-ni na ti ti ati u sa si fitila-ti ama be fitila-ti jim ku si si.’

⁹Aba ti ben ayib abane ri te ba baa, ‘Ayi u ko-yi ati te ni be, ni ru yi uwog unde ti ku jabci yi ti ni ka jab.’

¹⁰Ti anyisu wandab ti askwab itsong abane ru ti a kaa jab kindob, ubaen unda ishe ka ba. Ama aba ti som ti ujwin te wu sang yi kusog ukwab unda ishe, ama a ye ufu cwunnkyi.

¹¹“Isim ayine, anyisu wandab ti kuskwab bane ba ku kwer kujwo ku ri baa, ‘Itsekuru, Itsekuru, mbub ta na ti ufu.’

¹²Ubaen unda ishe cwe baa, ‘Iyee. Ame ku ri te ni kubenti, ame nung-m ani be.’ ”

¹³Isim ira yine Yesu ri baa, “Ni som usom ti ujwin ikyaen ti ani nung-ni usir wu ti kiye wu be.

¹⁴“Kujwokwe Rimam si pangma ti unde iki ku ru yi fengo rikyen u kunn ande ti imbyi-wu ira u sa rifunn-wu na ba kujwo.

¹⁵Awu kunn unde ti kucang u nda wu ayaen zinariya itsong. Unde ti ifaen, awu nda wu ayaen ifaen, unde ti ita awu nda wu riyaen kinjo amam. Awu nda ba aser pang ti ribom-ba ama u ru-wu iken-wu tiri.

¹⁶Awu unde ti mbe ayaen itsong, sa kiser-wu ru ka kafe ajwo atang u tu ayaen itsong som tsa risu-yi.

¹⁷Unde ti mbe ayaen ifaen ru ka kafe ajwo atang u tu ayaen ifaen som tsa risu-yi ama.

¹⁸Amaa, unde ti mbe riyaen kinjo ru ka mum riben u sa aser unde ti kununn-wu tam atang.

¹⁹“Isim kiye yang-yi unde ti kununn-ba awu ka kafe ba. Awu kunn byir ba ti a na ba pwen na wu iken ti a na nde te aser yi.

²⁰Awu unde ti mbe ayaen itsong sa ayaen itsong som tsa risu-yi u sa ba uwe unde ti kununn-wu u ri baa, ‘Unde ti kununn, afu nda m ayaen itsong kiye ti afu ru ike. Ame kafe ajwo te yi u tu pu m ayaen itsong som tsa risu-yi, nee ayi ti ta ri.’

²¹“Itsekuru-wu ri te wu baa, ‘Suko ti itikwab, afu upyi-m ti tinyang ti kubenti! Afu nde wande ti kubenti te iken pang ti ame nda fu. Ikyaen yine ame u nda fu iken ti skeb ayine. Sang yi utob titsen ana itse-fu.’

²²“Unde wu ti mbe ayaen ifaen ama sa ru ba, u ri baa, ‘Itsekuru, afu pu na m ayaen ifaen, ame ka kafe ajwo te yi u tu ayaen ifaen som tsa risu-yi ta ri.’

²³“Unde ti kununn-wu ri te wu baa, ‘I nyang timambe, upyi-m ti tinyang ti kubenti. Afu kwab pu fu. Afu nde pu fu kubenti risu iken ti kpang ahan, ame u nda fu iken ti skeb ayine. Sang yi utob titsen ana Itsekuru-fu.’

²⁴“Unde ti mbe riyaen kinjo ru ba ana-wu ti riyaen kinjo ti a nda wu u ri te itsekuru-wu baa, ‘Itsekuru-m, ame nung ira-fu kpag pang-yi. Uwog ti afu a yag-fu be, afu ku ndub pu ru-fu ru amam. Ande a skae tag awum-ba tsi afu ku ru ka ndub pu yi ru-fu ru ama.

²⁵Ikyaen yine, ame ku kyen ikyenricwu-fu u sa kiser-fu awu ru ka mum riben u sa tam-m atang nae ku ji fu ama. Nee kiser-fu ta ri.’

²⁶“Unde ti kununn-wu ri baa, ‘Afu upyi ti uyáng titibi! Afu nung baa, ame na ku bunn yi uwog ti si-yi ame ti tso be, ku ndub pu awum ti si-yi ame ti yag yi be ané?

²⁷Nee ayi a si ahan, afu ú sa kiser-m ka nae kusog aser, ti ame ba ne, ame u mbe yi fa ti tsan risu-wu.

²⁸“ ‘Ni mbe ra kiser wune ru kujwo-wu ti ni nda fa unde wu ti sa ayaen rijwe ba.

²⁹Ame ku ri te ni baa, unde ti a site iken kujwo, a u sha iken na fa-wu atang. Awu u site iken ko timambe. Amaa, unde ti si-wu te iken kujwo be, ko iken kpang ti awu site, a u mbe ra yi uwog-wu.

³⁰Ni ye upyi ti ukaen wune jwunn sang uwog ti byitang, uwog ti a u jwub ira u kub kujwo anyi atang.’

³¹“Kiye ti Umbae Unde u ba ti riyinn-wu ti meme atom-wu, awu u somtsa iken ti som-wu ti site riyinn.

³²A u byir tag ande ti utense wune meme uwe-wu, awu ama u kata ba pangma ti unde ti ku shi iken ku kata iwentam ti iwenten.

³³Awu u pu iwentam tsi kujwo rici-wu, ama iwenten, awu u pu tsi kujwo ife-wu.

³⁴“Isim ayi awu ukwe wu u ri te aba ti ta kujwo rici-wu baa, ‘Ni ru ba ti ni ba ci rifunn itse-ni ti nde tsika ni, ani ande ti tu risu tinyang uwe Itse-m. Ni ba ti ni ci. Awu kyae iken yine tsika ni ti ti a mam utense wune.

³⁵Ikyaen ti, ani nda m wuci kiye ti ame ku fxen ti rimenn. Kiye ti ame ku fxen ti unwaen ambyi ani nda m ambyi ame ngwa. Kiye ti ame sang rikyen kununn-ni, ani ye m ti ajwo ifaen.

³⁶Ame tsi ribam, ani pu atupwa kukyi m. Ame nae kicaeb, ani ka kunnji m ira. A ye m kwer pursuna, ani ba uwog-m.’

³⁷“Ande ba ti ku nde iken ti tinyang bane u rang wu baa, ‘Itsekuru-ti, ati tu-ti afu isinn ti afu shanum ti wuci ti afu ci, ne ati nda fu wuci? Ati tu fu isinn u nda fu ambyi ti ngwa?

³⁸Ati tu fu isinn u pu fu sang ba kununn-ti? Ko ati tu fu isinn ti afu tsi ribam, ama ati pu atupwa si fu?

³⁹Ati tu fu isinn ti afu nae kicaeb ko afu ta pursuna ama ati ba uwog-fu?’

⁴⁰“Ukwe-ba wu ama u cwe baa, ‘Ame ku ri te ni kubenti, ti ani nde iken yine te unde ti yib siskeb uwae ameinja-m abane, ani nde yi te m.’

⁴¹“Awu a ri mam ira yine, awu u ri te aba ande ti ta kujwo ife-wu baa, ‘Ni ko ru ru uwe-m ike, ani ande ti ku nde iken titibi! Ni ru yi uwog urwa ti tsi kukunn ti Rimam kyae tsiji Shetann ti atom-wu.

⁴²Ikyaen ti kiye ti ame ku cwu rimenn, ani nda-ni ame wuci be, ame ku cwu ti unwaen ambyi, ani nda-ni ame ambyi ti ngwa be.

⁴³Ame sang rikyen uten-ni, ani kyangte ni ame anunn-ni be. Ame ku kyang ribam ani sha kutupwa na-ni ame be, ame nae kicaeb, ame nae pursuna, ani ka-ni uwog-m be.’

⁴⁴“Tiri aba u ri baa, ‘Itsekuru, isinn ti ati nung fu ku fxen te rimenn, ko ti unwaen ambyi, ko ti afu sang rikyen, ko ti afu tsi ribam, ko ti afu nae kicaeb, ko ta-fu yi pursuna ama ati ndeya-ti afu be?’

⁴⁵“Awu u ri te ba baa, ‘Ame ku ri te ni kubenti, ti ani nde na-ni unde ti yib siskeb uwae ande bane be, ani nde na-ni ame be.’

⁴⁶“Ande bane u ru yi kusog urwa ti tsikukunn, ama ande ti som usom ti ti kubenti u ru yi kusog unyang ti tsikukunn.”