Read kutep Matiyu 27 Bible Online

Matiyu 27 - kutep bible

Matiyu 27

¹Ti kiskinn fifae, meme akwen tiyang ti ande ndufu yer unju tetso risu Yesu ti a na u wen wu.

²Aba yir wu ajwo u tae wu ru yi uwog gomna, ti rinyi-wu si Bilatus.

³Kiye ti Yawuda unde ti ye Yesu jabci nung baa, a na yer mam pu ba unju ti a u wen Yesu, awu kafe utob-wu u pu aser yi ti a pae na wu risu Yesu kafe ru ka na akwen tiyang ti ande ndufu. Aser yi ka ayaen azurfa rijwe ita.

⁴Awu ri te ba baa, “Ame raen pu m ira ti ame ye unde ti raen-wu ira be jabci na ni.” Aba ri te wu baa, “Ahoo, ira-ti iki fa atang a. Nde iken ti afu ku sha.”

⁵Ama Yawuda ye pu aser yi yaen mbub kusog Rimam atang u nwunn ru ka pu uji tso cwu.

⁶Ama ande ti uwe na akwen abane ye pu aser yi u ri baa, “Ayi nyang-yi ti ti u pu aser yine si fa aser kusog Rimam be, ayi si aser ti a jab anying unde atang.”

⁷Ikyaen yine aba myae ira u sa aser yi ru ka jab riben uwog ande ti ku mbye atutong ikyaen ti uwe ike, aba na u nji ande ti rikyen atang kiye ti aba a cwu.

⁸Rinyi uwog wune si Uwog Anying, sa ti kiye wu ba kwer ti yaka ne.

⁹Iken yine nde ikyaen ti ayi ú kumunn ira ti Irimiya atom Rimam ri kute baa, “A pu aser kujaeb-wu ayaen azurfa rijwe ita, aser ti Isirela yer tsi risu-wu ti kucang,

¹⁰ru ka jab ufu ritom uwog ande ti ku mbye atutong, pangma ti Rimam ri te m.”

¹¹Uwae kiye wu, Yesu tsi uwe gomna, gomna wu rang wu baa, “Afu ti si Ukwe Mbayawuda a.” Yesu ri te wu baa, “Afu ri pu fu.”

¹²Amaa, kiye ti akwen tiyang ti ande ndufu na uten ku ri ira ti tikong risu-wu, awu mbub-wu unju be.

¹³Bilatus rang wu baa, “Ira yi ti aba ku ri risu-fu ne afu ku fxen-fu be a.”

¹⁴Ama Yesu mbub-wu unju be ko ti kinjo. Ira yine fur gomna wu ayib si-yi ti ti ri be.

¹⁵Ayi si wande na gomna ko kiye na ukwab titini ti awu ā saen unde kinjo ti ta pursuna ta. Unde wune u si unde ti ujwunn ande ba ri te wu baa, awu na saen ta na ba.

¹⁶Unde titibi iki ta uwae pursuna atang ti rinyi-wu si Barabas.

¹⁷Kiye ti aba funn tag pu ba Bilatus rang ba baa, “Aye uwae ande bane ti ani ku sha ti m na saen ta na ni, Barabas ree, re Yesu ti a ku kunn wu baa, Unde ti Rimam Tsab Tsi?”

¹⁸Awu rang ira yine ikyaen ti, awu nungye pu wu baa, ayi na si kitsinn ti nde titawe aba ye wu.

¹⁹Cwucwo, kiye ti awu ku pwen Yesu rikwen, uwa-wu tom unde iki ba ri te wu baa, “Nde-fu iken iki te unde ti saen kyag wune be, ikyaen ti, ame ngwa rikaen yang-yi akwen uwae kurwa ikyaen-wu.”

²⁰Amaa, akwen tiyang, ti ande ndufu tur pu ande ba baa, aba na ri te Bilatus ti wu na ya ta na ba Barabas, ama ti wu na wen Yesu.

²¹Awu gomna rang kyi ba cwucwo baa, “Aye uwae ande ifaen abane ti ani ku sha ti m na ya ta na ni?” Aba ri baa, “Ati ku sha Barabas.”

²²Ama Bilatus rang ba baa, “Ame u nde imi te Yesu ti a ku kunn wu baa, Unde ti Rimam Tsab Tsi?” Meme-ba ri baa, “Ye wu kwer!”

²³Awu rang ba baa, “Ikyaen imi? Iken titibi ti awu nde si imi?” Amaa, meme-ba nghae ira ti ribom baa, “Ye wu kwer!”

²⁴Kiye ti Bilatus nung baa, ande na ku fxen-ba awu cwucwo be, ama ira yi kafe-yi rika tiri, awu sa ambyi ba jwosaen ajwo-wu u ri baa, “Anying unde wune ta-yi risu-m be. I si ira-ni tiri.”

²⁵Meme ande ba cwe ti unju kinjo baa, “Anying-wu ā ta risu-ti ti anyisu-ti!”

²⁶Isim ayine Bilatus saen Barabas ta na ba u byinn Yesu kimbab titawe u sa wu na ba ti a na sa wu ru ka kwer.

²⁷Isim ayine akyirten na gomna pu Yesu sang kusog tiyang na gomna, u kunn byir tag ameinja-ba ti tsitsi meme.

²⁸Aba waen wu ribam u pu arun tibyaen iki pangma ana ukwe yab wu rimenn.

²⁹Aba ru ka kyae ikajwo pangma ubur ukwe u sa bur wu risu u sa ukum iki fae si kujwo rici-wu baa, awu na si ukum ukwe-wu. Ama aba ku fen wu u ku ri baa, “Ati ku nde fu suko, afu Ukwe Mbayawuda.”

³⁰Aba tub atsang si wu ti ayib u fxaen mbe ukum-wu u sa byinn wu ti kitaen risu.

³¹Kiye ti aba txir mam pu ba awu itxir, aba tunn pu atupwa yi tso u pu atupwa ti ana-wu si wu, u tae wu ru yi uwog ti aba u kwer wu atang.

³²Kiye ti aba ku ru ru yi uwog wu, aba tu unde iki, awu si urae Kirene ti rinyi-wu si Siman. Aba ye wu baa, awu na su kutuku ti cice na Yesu.

³³Aba ka fob uwog iki ti a kunn rinyi-wu baa, Golgota, ti imbyi-yi baa, “Uwog kukoto risu”.

³⁴Uwog wune aba sa ambyi anam kyikab fa ti acin iki ti nununn u nda wu baa, awu na ngwa, amaa kiye ti iken yi ba unju-wu awu pyir-wu ti wu u ngwa yi.

³⁵Isim ti aba kwer mam pu ba awu, aba caen iticaen u pu atupwa-wu ka fa atso kujwo.[26]

³⁶Isim ti aba nde tag pu ba iken yine, aba som riben atang ku kyir wu.

³⁷Aba sa kikin u bae riraen-wu atang, u sa kwer ijwe kutuku risu-wu, iken wune a bae baa, “Unde WUNE SI YESU, UKWE Mbayawuda.”

³⁸Aba pu ande ti riyib ifaen kwer risu ituku atang te wu, unde kinjo ta kujwo ife-wu, unde kinjo ama ta kujwo rici-wu.

³⁹Ande ti ku ru atang ku ri ndembeb wu ku jwunn risu-ba,

⁴⁰ku ri baa, “Afu unde ti ri baa, afu na u mbub kusog Rimam na u mbye wu uwae usir ita, asiti afu a si Umbae Rimam ti kubenti, nwangru risu-fu ama ti fu si risu kutuku ti cice ba riben.”

⁴¹Aba akwen tiyang, ti ande ti ku kwen icwe, ti ande ndufu ama, skaen wu ikyaen u ri baa,

⁴²“Awu nwangru ariki, ama nwangru tu-wu risu-wu be. Awu si Ukwe Isirela re, awu ā si kutuku ti cice ba tine ama ati u ru uwae kinjo uwog-wu.

⁴³Awu sa ijwe-wu konje Rimam; Rimam ā ba nwangru wu tine, awu a cwe ira. Awu ku ri kob baa, awu na si Umbae Rimam re.”

⁴⁴Aba ande ti riyib ba ti a ye ba kwer te wu ri unghae yine ama.

⁴⁵Iken ti tsi aser rijwe asu ifaen ti usir ta kitaen ba sang ti aser ita ti ureb, meme uten wu ta uwae kufub.

⁴⁶Ama kiye na aser ita ti usirtaen Yesu kunn ira te afxenjwin ti ribom unju uten-ba baa, “Eli, Eli, lema sabakatani.” Imbyi-yi baa, “Rimam-m, Rimam-m, imi ti nde ti afu ya m ta?”

⁴⁷Ariki uwae ande ba ti tsi atang fxen ira-wu yi u ri tetso baa, “Awu ku kunn Eliya ira.”

⁴⁸Kinjo uwae-ba ter inyae ru ka sa sasó skib si uwae ambyi anam ti fufab u sa fae sang ukum iki u sa tur sang wu unju baa, awu na ngwa.

⁴⁹Ariki ama ku ri baa, “Ni tsi tum ti ti nung akwen baa, ko Eliya na u ba nwangru wu bara.”

⁵⁰Yesu ri kyi ira ti ribom-wu cwucwo ama u sa unyang-wu na-wu Rimam tiri.

⁵¹Kiye wune ama uwae kusog Rimam, kutupwa tiyang ti ta uwae kusog Rimam kata ifaen ti apupwen si ba furu ti riben. Utense meme kyi ijwe, atxom taenta taenta.

⁵²Askab ande mbubta, ama ande Rimam yang-ba akwen ti cwucwu ti kucang, nwunn uwae askab-ba.

⁵³Isim ti awu Yesu ti risu-wu nwunn uwae kuskab, ande ba ti nwunn uwae kuskab ne ru yi Urushelima u tso risu-ba uwog ande yang-ba akwen.

⁵⁴Kiye ti unde ti uwe na akyirten, ti ande umbyi-wu ti ku kyir kuskab Yesu nung utense ti kyi ijwe, fa ti meme iken yi ti nde, ikyenricwu ye ba si-yi ti ti ri be. Aba ri baa, “Ayi si kubenti, unde wune si Umbae Rimam.”

⁵⁵Ande yang-yi akwen ti putsa wu ru uten ti Galili ba tsi ti fengo ti rwen ku sae iken yi ti ku nde ne. Aba si anda ti ku ndeya wu ti wande.

⁵⁶Mberimu Magadalen ta uwae anda bane ama, ti Mberimu iya Yakubu ti Yusufu, ti iya anyisu Zebedi.

⁵⁷Usir kujwo ureb unde ti rifunn iki ru ba. Awu si unde ti Arimateya ti rinyi-wu si Yusufu. Unde wu si kinjo uwae ande ti putsa Yesu.

⁵⁸Unde wune ru yi uwog Bilatus u ka jwam wu ti wu na sa rukom Yesu na na wu. Bilatus ri te ande-wu baa, aba na nda wu ti wu na sa ru.

⁵⁹Yusufu sa rukom Yesu u ru ka bur tag wu uwae kutupwa ti titsen ti awu jaeb tishe.

⁶⁰Awu sa wu ru ka nae uwáe kutxu-wu ti awu ti risu-wu mum ti tishe. Isim ti awu nji mam pu wu awu uwae uwáe atang, awu kaen kutxom tiyang takyi unju uwáe wu, ama ru-wu.

⁶¹Mberimu Magadalen ti Mberimu ti ifaen ta atang ama. Aba som fer ti uwog kuskab wu.

⁶²Iken yine nde riben usir ukwab-ba kiye ti a ku kyae ijwe-ba tsi ku ji ukwab tiyang ti a u nde ucwefam-yi. Akwen tiyang ti kumbub Farisi byir atso uwog Bilatus.

⁶³A ri te wu baa, “Unde ti uwe, ati fxen ukwe kukyaefa wune ri ira iki kiye ti awu cwu-wu khika be baa, uwae usir ita awu na u nwunn uwae kuskab.

⁶⁴Ikyaen ayine ati ku jwam fu ti fu na nda ande iki ti a ru ka kyir unju kukwae kyir usir ita, bara be atugbug-wu u ba yib ra wu ru fe u ba ri te ande baa, awu na nwunn pu wu uwae iticwu. Asiti ira yi a si ahan ayi u beb skeb ira tikong-ba ti kucang.”

⁶⁵Bilatus ama ri te ba baa, “Ayi nyang. Ni pu akyirten ru ti ni ru ka kyir uwog wu. Ni kwab iken ti ani u nde tu.”

⁶⁶Aba ru ara u ru ka pu akyirten som kyi unju kuskab wu u sa hatimi ukwe bae ru ijwe kutxom wu. Yi fengo wune a nung baa, iken iki na u nde-wu ayi be.