Read kutep Matiyu 4 Bible Online

Matiyu 4 - kutep bible

Matiyu 4

¹Isim yine Kusung Rimam sa Yesu ru yi uwog iki uwae kutur khika. Kusung Rimam ti sa wu ru yi atang ti ukwe kukyaefa na ka myae wu kumyae.

²Awu nde usir mae ifaen ti utitang mae ifaen atang u cwe unju. Usirtaen ti utitang awu ci-wu wuci be. Isim yine rimenn ku wen wu.

³Ama Shetann ru ba tu wu u ri te wu baa, “Asiti afu a si Umbae Rimam, ri ira te atxom yine ti ayi ā kafe wuci.”

⁴Yesu ri te wu baa, “A bae uwae Kutsingken Rimam baa, ‘Ayi si-yi nyang wuci ti ku nda unde tsi ser be, se ira ti ku tso unju Rimam.’ ”

⁵Awu Ukwe Kukyaefa nwunn atang u pu Yesu ru yi Uka ti Saen Kyag, Urushelima, u sa wu ru ka tsi tsa risu kusog Rimam tiyang

⁶u ri te wu baa, “Asiti afu a si Umbae Rimam, mbyaesi yi riben, ikyaen ti, a bae uwae Kutsingken Rimam baa, ‘Rimam u ri te atom-wu baa, aba na nungkyi fu.’ Aba u kyangte fu ti apupwen, ikyaen ti fu na pu afxen-fu na byinn mber-fu ijwe atxom be.”

⁷Yesu ri te kyi wu cwucwo baa, “Aba bae ama baa, afu na myae-fu Itsekuru-fu Rimam myae be.”

⁸Ukwe kukyaefa pu wu nwunn kyi atang cwucwo u tso yi kitaen rikwen iki ti kob timambe u ka tatso tag wu ajwo ukwe utense ti riyinn-yi meme.

⁹Awu ri baa, “Asiti afu a ku riben na m u fen m, ame u pu iken yi ti afu sae ne meme na fu.”

¹⁰Ama Yesu ri te wu baa, “Ko ru uwe-m ike Shetann! A bae uwae Kutsingken Rimam baa, ‘Fen Itsekuru-fu Rimam, awu kinjo-wu amam ti afu u fen.’ ”

¹¹Uwog wune, awu ukwe kukyaefa ter ru u ya wu ta, ama ti ritsen, atom Rimam si apupwen ba tu wu, u ndeya wu.

¹²Ti Yesu fxen baa, a na ye Yohana[5] na cwunnkyi uwae pursuna, awu nwunn u kafe ba ti uten ti Galili.

¹³Awu ya uten Nazareti ta, u ru ka som uten Kaparnawum, unju uyinn, uwog ti rishi Zebulun ti Nafitali nae atang.

¹⁴Ayine nde ikyaen ti ayi na kumunn ira ti Rimam ri kute, yi unju Ishaya, unde ti ku ya iskin ira-wu Rimam baa,

¹⁵“Afu uten ti Zebulun! Afu uten ti Nafitali! Ani ti ta fengo uyinn tiyang, iyen akwen unyim ti Yordan. Ani ti ta Galili, Galili uten ande ti kufub!

¹⁶Ande ti ta uwae kufub tu pu ba uwog ti sisaen! Ande ti ta uwae kufub na kukwae iticwu, ucwe fam yae pu wu aba.”

¹⁷Iken ti tsi kiye wu ru fe yi uwe, Yesu bag ku ri te ande baa, “Ni kafe isim ta ikentitibi, be Kujwokwe Rimam fer mam pu yi!”

¹⁸Ti Yesu kyang putsa uyinn ti Galili, awu tu ande ifaen, aba si ameinja atso. Kinjo si Siman ti a ku kunn wu baa, Bitrus ama. Itifaen si Andarawu. Aba pu kukye-ba ku si uwae uyinn, ikyaen ti, aba si ande ti ku ye iwag.

¹⁹Yesu ri te ba baa, “Ni ba putsa m, ame u nda ni kafe ande ti ku pu ande ba uwog Rimam.”

²⁰Ti ritsen, aba ya akye-ba yi ta u nwunn putsa wu.

²¹Ti awu kyang putsa unju uyinn ti Galili, awu sae ameinja atso iki ifaen. Aba si anyisu Zebedi, rinyi kinjo si Yakubu, rinyi itifaen ama si Yohana. Aba ti ite-ba ta uwae kuyae tetso u ku kyaenyang akye-ba. Ama Yesu kunn ba ira.

²²Ti ritsen, a ter ya ite-ba ta ti uwae kuyae u nwunn ru ka putsa Yesu.

²³Yesu ku kyang kyi fe uwae uten ti Galili meme u ku kwen na ande iken uwae asog Rimam-ba u ku ya iskin ira ti tinyang risu Kujwokwe Rimam u ku nwangru ande ti kicaeb ti tsotso.

²⁴Iten wande-wu shag kyife uten ti Siriya meme. Ama a pu meme ande ti kicaeb ti tsotso ti tsotso ba uwog-wu. Ande ti rijwen titibi ku nde ba ira, ande ti kicaeb kiku, ande ti site rijwen titibi risu-ba, ande ti wam afxen ti ajwo, Yesu nwangru meme-ba.

²⁵Ama ande nwunn ti ujwunn-ba ruye uwae uten ti Galili ti uten Dekapoli, ti uten Urushelima ti Yawudiya ti iyen akwen unyim ti Yordan u ba putsa wu.