Read kutep Matiyu 5 Bible Online

Matiyu 5 - kutep bible

Matiyu 5

¹Ti Yesu sae ujwunn ande ti ku putsa wu, awu tso yi kibab rikwen iki u ka som riben. Atugbug-wu tso ba tu wu atang.

²Ama awu bag iken ti kwen baa,

³“Itinyang si ana ande ti saeru risu-ba uwe Rimam, ikyaen ti, Kujwokwe Rimam[6] si pu yi ana-ba.

⁴Itinyang si ana ande ti ku byir utob, ikyaen ti, Rimam u ri jim ba utob.

⁵Itinyang si ana ande ti ku nae risu riben, ikyaen ti, utense u si ana-ba.

⁶Itinyang si ana ande ti ku fxen te rimenn ti unwaen ana usom ti kubenti ikyaen ti, a u tu iken ti aba ku sha.”

⁷“Itinyang si ana ande ti ku nung ande te ayibrisi, ikyaen ti, Rimam u nung ba ti ayibrisi ama.

⁸Itinyang si ana ande ti utob-ba sisaen, ikyaen ti, aba u sae uwe Rimam.”

⁹“Itinyang si ana ande ti ku sa kujimshwur sang uwog, ikyaen ti, a u kunn ba baa, anyisu Rimam.”

¹⁰Itinyang si ana ande ti a ku nde ba rikaen ikyaen usom ti som-ba uwae kubenti, ikyaen ti, itinyang na Kujwokwe Rimam si pu yi ana-ba.

¹¹“Itinyang si ana-ni kiye ti ande a ku txir ni txir, ku nde ni rikaen, ku ri ira titibi ti ira tikong ti tsotso risu-ni ikyaen-m.

¹²Ni tsen utob ti ni shwu ashwu, ikyaen ti, rinyangwae tiyang tsi ku ji ni apupwen. A nde pu ba iken yine te ande ti ya iskin ira Rimam ti kute ama.”

¹³“Ani si rinwaen utense. Asiti rinwaen a site-yi utug cwucwo be, fengo ti utug rinwaen yi u kafe ba ta aka? Ayi kafe pu yi iken ti ukaen ti a u ye yi yaen mbub u ceb kyi yi te afxen.

¹⁴“Ani si uwog ti saen ana utense. Uka ti ta kibab rikwen ku tam-wu tam be.

¹⁵Ayi si ahan ama unde iki ta-wu ti u yen urwa u sa iken burkyi wu kyi be. Unde a yen urwa, awu u sa tsi tsa risu tebur ikyaen ti ande meme ti ta uwae kusog atang ā sae uwog paenine.

¹⁶Ayi si ahan ama, ni ya ta ti itinyang ti ta uwae-ni ā shag kyife uwog meme ikyaen ti ande ā sae iken tinyang-ni ayi, u sa rurob na Itse-ni ti ta apupwen.”

¹⁷“Ni tang-ni baa, ame na ba ti m na u wen Icwe Musa ti iken ti kwen ande ti ku ya iskin ira Rimam be! Ame ba-m ti m wen yi wen be. Ame ba ti m kumunn yi munn.

¹⁸Ame ku ri te ni kubenti, ti ti riben ti apupwen tsi ti atang, iken iki u ruye-yi uwae icwe yine be ko tikiyib, se ti icwe yi a nde tag pu yi wande-yi.

¹⁹Ikyaen yine, unde titini ti a nyatsa kinjo uwae icwe Rimam, ko ayi ti yib siskeb uwae-yi, ama ku kwen na ariki ti a na nyatsa icwe yi, unde wune u si unde ti yib siskeb uwae Kujwokwe Rimam. Amaa, asiti unde a ye su Icwe Rimam u kwen na ande ti tsitsi ti aba na ye su yi ama, awu u si unde ti kuko yi Kujwokwe Rimam.

²⁰Kubenti ti ame ku ri te ni, asiti ani a putsa-ni icwe Rimam yine skeb-ni ande ndufu ti nung ira icwe, ti ande ti kumbub Farisi be, ani u sang-ni Kujwokwe Rimam be ko tikiyib.”

²¹“Ani fxen pu ni kusen ti a fwa ande ti kucang baa, a na wen-ba ande be. Unde ti a wen unde, a na u pwen wu rikwen.

²²Amaa, ame ku ri te ni, unde ti a tso rinae amam te inja-wu, a u pwen wu rikwen. Unde ti a txun inja-wu asu, a u pwen wu rikwen uwe andufu. Unde ti a kunn inja-wu baa, kuskwab, a u pwen wu rikwen ti awu u sang urwa.”

²³“Ikyaen yine, asiti afu a sa rinyangwae ba ku na Rimam, ama u tangsom baa, inja-fu iki na site ira iki na te fu,

²⁴ya iken yi ta ti kusog Rimam atang, ti fu ru ka kyae nyang usom ti som-fu te inja-fu, titawe ti kafe ru ka nda rinyangwae-fu na Rimam.”

²⁵“Asiti unde iki a kunn fu rikwen u pu fu ku ru yi kusog rikwen, ni mam ira yi ti fengo ti kufe, be awu u pu fu ru ka na ande ti ku pwen rikwen, ama a u sa fu na itaen ti ku kyir uwog, aba ama u ye fu cwunnkyi pursuna.

²⁶Afu u som atang se ti afu a pae tag pu fu upae ti a kyeb na fu.”

²⁷“Ani fxen pu ni ti a ri baa, afu na nae-fu amae be.

²⁸Ame ku ri te ni baa, unde ti a pu ayib cwu tsa unda skirr u ku taen ayib ti wu na u nae te wu, unde wune nae mam pu wu amae te unda wu uwae riyaen utob-wu.

²⁹Ikyaen yine asiti riyib-fu ti kujwo rici a ku sha ti wu shir fu si uwae ikentitibi, wag ra wu tika. Ayi nyang skeb ti fu u shanum kujwo ikyaeb-fu iki ti ti afu ti rimenn-fu meme u ka sang uwae urwa ti ku twen u ku jim-wu jim be.

³⁰Asiti kujwo rici-fu a ku sha ti wu u shir fu si uwae ikentitibi, kumra wu jwunn tika! Ayi nyang skeb ti fu shanum kujwo ti ti afu ti rimenn-fu meme u ka sang uwae urwa ti ku ten u ku jim-wu jim be.”

³¹“Ani fxen pu ni cwucwo ti a ri te ande ti kute baa, unde ti a kata ribaen-wu te uwa-wu, awu na bae na unda wu kutsingken na itikanta iben.

³²Ame ku ri te ni, asiti unde iki a kata ribaen te uwa-wu, ne a si-yi ikyaen ti unda wu nae isa be, awu nda unda wu ku nae amae. Cwucwo, asiti unda wu a ka baen unde iki tishe, unde wu nae pu wu isa ama.”

³³“Cwucwo ani fxen pu ni ti a ri te abitse-ti ti kucang baa, aba na ben-ba uben tikong be. Aba na nde kang iken ti aba ben uben risu-yi uwe Rimam.

³⁴Ame ku ri te ni, ni ben-ni uben ama be. Kiye ti ani a ku yer unju, ni ben-ni apupwen be ikyaen ti, apupwen si uwog ti som na Rimam.

³⁵Ni ben-ni riben be ama, ikyaen ti, riben si uwog ti Rimam ku pu afxen-wu tsi atang. Cwucwo ni ben-ni Urushelima be, ikyaen ti Urushelima si uka ana Ukwe ti kuko!

³⁶Ni ben-ni risu-ni be ikyaen ti, ani u nde tu-ni ti ni u sa ikyinn kinjo kafe ititsen ko tibyir be.

³⁷Ana-ni, ira ti ku tso unju-ni ā si ‘Een’ ko ‘Iyee’, amam. Iken ti a txi ra te ayine si ikentitibi.”

³⁸“Ani fxen pu ni ti a ri baa, asiti unde a mbub fu riyib, afu na mbub ana-wu ama. Cwucwo unde a kyaeb fu kunyi, afu na kyaeb ana-wu ama.

³⁹Amaa ame ku ri te ni, ni pae-ni unde ti raen ni ira te ikentitibi be. Asiti unde iki a tae fu kujwo ti kutapaen ti kujwo rici, kafe na wu iti kujwo ife ti awu ā byinn kyi.

⁴⁰Asiti unde iki a kunn fu rikwen risu kutupwa ti afu sī uwae, tunn ti ifaen fa wu ti atang.

⁴¹Cwucwo asiti unde iki a ye fu ti ribom ti fu na te wu na kyang lamba kinjo, te wu kyang lamba ifaen.

⁴²Asiti unde iki a jwam fu iken iki, si na wu. Unde ti ku sha ripab uwog-fu ama, byang-fu awu be.”

⁴³“Ani fxen pu ni ti a ri baa, ‘Ye ure te ande ti ure-fu, ti fu ta rika te ande ti rika-fu.’

⁴⁴Tine ame ku ri te ni, ni ye ure te ande ti rika-ni ti ni jwam Rimam risu ande ti ku nde ni ira titibi.

⁴⁵Asiti ani a nde ayine, ani u si anyisu na Itse-ni ti ta apupwen. Awu ku nda usir tsi ikyaen ande ti ku nde iken titibi ti ande ti ku nde iken ti tinyang meme.

⁴⁶Asiti ani a ye ure te nyáng ande ti ure-ni amam, ani u tu-ni rinyangwae iki uwog Rimam be. Ni nde-ni pangma ande ti ku mbe aser ukwe ti ku ye ure tetso amam be.

⁴⁷Cwucwo asiti ani a kyangte nyang ameinja-ni amam, itinyang imi ti ani ku nde ti skeb ana ande ti tsitsi? Ayine si si iken ti ande ti kufub ku nde ama.

⁴⁸Ni kumunn yi usom ti som-ni pangma ti Itse-ni ti apupwen kumunn yi usom ti som-wu.”