Read kutep Matiyu 6 Bible Online

Matiyu 6 - kutep bible

Matiyu 6

¹“Ni nung nyinyang ti ni ndub-ni ijwe yi kutampwa ande risu wande ti tinyang ti ani ku nde be. Asiti ani a sa wande-ni ti tinyang pu iten, ani u shanum kujwojang Itse-ni ti ta apupwen.”

²“Ikyaen yine, kiye ti ani a ku nda rinda, ni nda-ni yi uwe ande pangma ti ande ti kufur ku nde yi uwae kusog Rimam ti fengo kum be. Aba ku nde yine ikyaen ti ande na teb ba. Ame ku ri te ni kubenti, a tu mam pu ba kujwojang-ba.

³“Kiye ti afu a ku nda rinda, kujwo ife-fu ā nungye iken ti kujwo rici-fu ku nde be,

⁴ikyaen ti Rimam amam ā nung rinda-fu ayi ama u nda fu kujwojang.”

⁵“Kiye ti ani a ku jwam Rimam, ni nde-ni pangma ande ti kufur be. Ikyaen ti, aba ku nwunn ritsen ku jwam Rimam uwae kusog Rimam ti fengo ukum ikyaen ti ande na sae ba. Kubenti ti ame ku ri te ni, a tu mam pu ba kujwojang-ba.

⁶Amaa kiye ti ani a ku jwam Rimam, ni sang uwae kusog-ni ti ni cwunnkyi ufu kusog titawe ti ni jwam Itse-ni Rimam uwae kitam. Ama, Itse-ni Rimam ti ku sae iken ti ani ku nde uwae kitam u nda ni kujwojang-ni.

⁷“Kiye ti ani a ku jwam Rimam, ni pu-ni ira ti ukaen sangfa atang pangma ti ande ti apxin ku nde be. Ande ti apxin ku nde yine ikyaen ti aba ku tang baa, Rimam na u fxen ba ikyaen ujwin ira ti ukaen ti aba ku pu sang atang.

⁸Ni si-ni pangma aba be. Itse-ni Rimam nung mam pu wu iken ti ani ku sha ti ti ani jwam-ni awu khika be.

⁹“Fengo ti ani u jwam Rimam ta ri. ‘Itse-ti ti ta apupwen, ande ā nda rinyi-fu rurob!

¹⁰Kujwokwe-fu ā ru ba. Ande ā nde iken ti afu ku sha utense ike, pangma ti a ku nde yi apupwen akwen.

¹¹Nda ti wuci ti yaka ne.

¹²Yata na ti ikentitibi-ti, pangma ti ati ku yata na ande ti ku nde ti ikentitibi.

¹³Pu ti ka-fu uwae kumyae be, amaa, nwangru ti uwae ira titibi.’

¹⁴“Asiti ani a ku yata na ande ikentitibi-ba, Itse-ni ti ta apupwen u yata na ni ikentitibi-ni ama.

¹⁵Asiti ani a ku yata na-ni ande ti raen ni ira be, Itse-ni ti ta apupwen ama u yata na-wu ani ikentitibi-ni be.

¹⁶“Kiye ti ani a ku cwe unju, ni yir kyi-ni uwe-ni pangma ti aba ande ti kufur ku nde be. Aba ku ye uwe-ba yir kyi ikyaen ti ande na nung baa, aba na ku cwe unju. Ame ku ri te ni kubenti, a tu mam pu ba kujwojang-ba.

¹⁷Amaa, ana-ni, ni fu uwe-ni ti ni fung kindob kiye ti ani a ku cwe unju,

¹⁸ikyaen ti ande ā nungye-ba ti ani na ku cwe unju be, se Itse-ni Rimam amam. Awu Itse-ni Rimam ti ku sae iken ti ani ku nde uwae kitam ti u nda ni kujwojang.

¹⁹“Ni byir rifunn-ni tsi-ni utense ike be. Ike, ibyaen ti acwucwug u ye yi ci ndembeb, ande ti riyib ama u byinn mbub u sang ká yib pu yi ru.

²⁰Ayi nyang skeb ti ni pu rifunn-ni tsi yi apupwen uwog ti ibyaen ti acwucwug u ci ndembeb-ba ayi be, ande ti riyib ama u byinn mbub-ba yi, u sang ka yib yi be.

²¹Ikyaen ti, uwog ti unde a pu rifunn-wu tsi atang, awu u sa utob-wu tsi atang ama.

²²“Ayib unde si fitila na rimenn ijwe unde wu. Asiti ayib unde a ku sae nyinyang, unde wu u munnkyi ti itisaen.

²³Amaa, asiti ayib unde a fúfú, uwog meme u si kufub yi uwe unde wu. Asiti ayib unde a fxeb kyikyi, kufub ti u si uwog unde wu u si-yi ti ti ri be.

²⁴“Unde u nde tu-wu wande upyi na ande ifaen be. Asiti awu a site itsekuru ifaen awu u ye ure te kinjo uwae-ba u pyir ira unde ti ifaen, ko awu u nae risu riben te kinjo u sae ru iti ifaen. Unde u nde-wu wande Rimam u nde ana rifunn ama be.

²⁵“Ikyaen ayine, ame ku ri te ni, ni kab-ni uwae risu itici ti itingwa ikyaen unyang-ni be, ko risu atupwa ti ani u pu si rimenn ijwe-ni be. Unyang si te rurob skeb-yi wuci be a. Ama rimenn ijwe nyangskeb-wu atupwa be a.

²⁶Ni sae inung ti ku pinn apupwen ne. Ayi ku tom-yi ritom be, u ku bunn wuci si-yi kurug be; Itse-ni ti ta apupwen ku sha na yi itici ti itingwa. Ani skeb-ni inung be a? Ani skeb tiyang akwen.

²⁷Unde iki uwae-ni u nde tu ti wu kora unyang-wu ru yi uwe ikyaen ira ti awu ku kab a.

²⁸“Ani kyang rimang ku kab ira risu atupwa? Ni sae afub ti ajwug tinyang ti shab uwae kutur. Ayi ku ndxob-yi atupwa ti ayi u pu si ijwe-yi be.

²⁹Ame ku ri te ni, ko Ukwe Solomon yi uwae meme riyinn-wu, awu sī-wu atupwa ti nyang pangma kinjo uwae afub ti ajwug yine be.

³⁰Ama asiti Rimam a ku pu atupwa si irum ti ku tsi-yi tsi be u wom cwu, awu u sha atupwa ti siskeb na-wu ani be a. Ani kyang rimang ru-ni uwae kinjo uwog-wu be?

³¹“Ikyaen yine, ni kab-ni uwae risu wuci ti ani u ci ko iken ti ngwa ti ani u ngwa ko atupwa ti ani u pu si ijwe-ni be.

³²Ikyaen ti, ayine si iken ti ande ti kufub sa uwae tsi risu-yi. Itse-ni ti ta apupwen nung pu wu baa, ani na ku sha iken yine.

³³Ana-ni, ni sha Kujwokwe Rimam, ti usom ti som ti pang atang uwe-wu, ama awu u pu meme iken yine txwafa ni.

³⁴Ikyaen yine, ni kab-ni uwae risu iken ti ucwe be, ucwe u site rikaen ti pang risu-wu. Ni ya usir titini ta ti rikaen-wu.