Read kutep Matiyu 7 Bible Online

Matiyu 7 - kutep bible

Matiyu 7

¹“Ni pwen-ni atso rikwen be, be a u pwen ni rikwen.

²Ikyaen ti, a u pwen ni rikwen ti fengo ti ani pwen ariki, u myae na ni te kitu kumyae ti ani myae na ariki.

³Afu nde rimang nungye kirim ti ta uwae riyib inja-fu u nungye-fu kucwub kutuku ti ta riyib-fu be?

⁴Ko afu u kyang rimang ri te inja-fu baa, afu na u sa ruye kirim ti ta riyib-wu, kucwub kutuku ama ta riyib-fu?

⁵Afu unde ti kufur! Sa ru iken ti rikem ti ta uwae riyib-fu ne titawe afu u sae tu iken tikiyib ti ta uwae riyib inja-fu.

⁶“Pu iken ti saen kyag na-fu mbapxu be. Pu iken ti site aser ama jwunnsi-fu ingog be, be ayi u ceb ndembeb yi te afxen ama u kafe u kub fu anyi.

⁷“Jwam! A u nda ni iken. Sha! Ani u tu. Kwer kujwo ufu kusog! A u mbubta na ni.

⁸Ikyaen ti, unde titini ti a jwam, a u si na wu. Unde titini ti a sha, awu u tu, unde ti a kwer kujwo ufu kusog ama, a u mbubta na wu.

⁹Aye uwae-ni ti umbae-wu a jwam wu buredi, awu u sa kutxom na wu?

¹⁰Ko umbae wu a jwam wu iwag, awu u nda wu ikentibi?

¹¹Asiti ani ande ti ku nde ikentitibi a ku pu iken ti tinyang na anyisu-ni, Itse-ni ti ta apupwen ama re? Asiti ande a jwam iken uwog-wu, awu u nde na-wu aba be a.

¹²“Nde na ariki iken ti afu ku sha ti a na nde na fu. Ayine ti si imbyi Icwe Musa ti iken ti kwen na ande ti ku ya iskin ira Rimam.

¹³“Ni putsa ufu ti fifer sang, ikyaen ti, ufu ti ku sang yi uwog ititwenji yaen timambe, fengo-wu ama caeb-wu caeb be. Cwucwo, ande ti ku putsa fengo wune ko timambe.

¹⁴Amaa, ufu ti ku sang yi uwog unyang ti tsikukunn fer timambe, fengo ti ku tso yi atang ama site rikaen timambe, ande ti ku putsa atang ama ko-ba ko be.

¹⁵“Ni nung nyinyang ti ande ti ku ya iskin ti rifen. Aba ku ru ba uwog-ni pangma iwentam rimenn ijwe ise ike, amaa uwae utob-ba, aba si ibye anyi.

¹⁶Ani u nungye utso ande bane uwae ajwo wande-ba ti aba ku nde. Kutukog u waen awaen anam a. A u kwaen lemo ruye yi kutuku indag a.

¹⁷Kutuku ti tinyang ku waen awaen ti tinyang, amaa kutuku titibi ku waen awaen titibi ama.

¹⁸Kutuku ti tinyang ku waen-wu awaen titibi be, kutuku titibi ama ku waen-wu awaen ti tinyang be.

¹⁹Kutuku ti a waen-wu awaen ti tinyang be, a u yer wu si riben u sa jwunn sang uwae urwa.

²⁰Yi fengo wune, ani u nungye ande ti ku ya iskin ti rifen te ajwo wande-ba.

²¹“Ayi si-yi meme ande ti ku kunn me baa, ‘Itsekuru, Itsekuru,’ ti u sang Kujwe Ukwe Rimam ti apupwen be. Ande ti u sang si nyang ande ti ku nde wande Itse-m ti ta apupwen, aba amam.

²²Uwae usir rikwen, ande u funn u jwam m baa, ‘Itsekuru, Itsekuru! Ati ya-ti iskin uwae rinyi-fu, ama jae ruye-ti rijwen titibi rimenn ande uwae rinyi-fu be a. Ati nde wande ti ku fur ayib ko timambe uwae rinyi-fu!’

²³Tiri ame u ri te ba baa, ‘Ame nung-m ani usir iki be. Ni ko ru ru uwe-m ike, ani si ande ti ku nde wande titibi.’

²⁴“Ikyaen ayine, unde titini ti a fxen ira-m ayine u nde wande te yi, awu pangma unde ti ben ayib u ta umbyi kusog-wu ti kutxom.

²⁵Ama upwen tsa, uyinn munn ba yaen shag ise, ufunn kae ba tso tsa risu kusog wu. Ama awu mbub si-wu be, ikyaen ti, a ta umbyi-wu ti kutxom.

²⁶“Unde ti a fxen ira-m u nde-wu wande te yi be, awu u si pangma unde ti kuskwab ti mbye kusog-wu tsitsa isa ibung.

²⁷Upwen tsa, uyinn munn ba yaen shag ise, ufunn kae ba tso tsa kusog wu, ama kusog wu kyaen si tag sisaen, ko uwog iki tsitsi-wu be.”

²⁸Kiye ti Yesu ri mam ira yi, ayib fur ande ti putsa wu risu iken ti awu kwen na ba,

²⁹ikyaen ti, awu si-wu pangma ande ndufu-ba ti ku kwen na ba icwe Rimam be. Ana-wu, awu ku kwen na ba pangma unde ti sa icwe yi tsi.