Read kutep Matiyu 8 Bible Online

Matiyu 8 - kutep bible

Matiyu 8

¹Kiye ti Yesu sī rikwen ba ande tum atso putsa wu.

²Ama unde ti kicaeb ikum iki ru ba ku riben uwe-wu u jwam wu baa, “Itsekuru-m, asiti afu a cwe ira, afu u nde tu ti fu u nwangru m.”

³Yesu sa kujwo tekunn wu u ri te wu baa, “Ame cwe pu m, tu itinwangru.” Ti ritsen unde wu nwangru uwae kicaeb ikum-wu ayi.

⁴Yesu fwa wu kusen baa, “Nung! Ri te-fu unde iki ira yine be. Ru ka tatso risu-fu uwog kukwen Rimam,[7] ti nda Rimam iken ti ten ti Musa ri tsi. Ayine u tatso ande meme baa, kicaeb-fu na ya ta pu yi.”

⁵Kiye ti Yesu ka sang uwae uka ti Kaparnawum, unde ti uwe akyirten ru ba tu wu u jwam wu baa,

⁶“Itsekuru, upyi-m nae kicaeb uwae kununn, awu wam afxen ti ajwo u ta uwae rikaen ko tag.”

⁷Yesu cwe na wu baa, “Ame u ru ka u nwangru wu.”

⁸Ama unde ti uwe akyirten wu ri te Yesu baa, “Itsekuru-m, ame ko-me ti m u kyangte fu uwae kununn-m be. Afu a ri ira amam, upyi-m u nwangru.

⁹Ame nung ayine ikyaen ti, ame ti risu-m, ame ta imbyi unde ti uwe-m. Ame ama site akyirten yang-ba ti ame skeb ba ti kuko. Ame a ri te awune baa, ‘Ru,’ awu u ru, ame a ri te uriki baa, ‘Ba,’ awu u ba.”

¹⁰Ira yine fur Yesu ayib. Ama awu ri te ande ti ku putsa wu baa, “Ame ku ri te ni kubenti, uwae ande ti Isirela ame tu ji-m unde ti site kubenti pangma unde ti rikyen wune be.

¹¹Kubenti, ande ko timambe u ru kujwo usir ti kiskinn ti ti ureb u ba ci ukwab na Kujwokwe Rimam. Aba u ba som te Ibrahim, ti Ishaku ti Yakubu.

¹²Amaa, ande ti si ti a ú sang Kujwokwe Rimam, a u pu ba jwunn sang uwae kufub uwog ti aba u jwub ira u kub kujwo anyi.”

¹³Isim yine Yesu ri te unde ti uwe akyirten wu baa, “Ru-fu yi kununn, iken ti afu ru kubenti atang, a u nde yi na fu.” Ti ira unju-wu ne upyi unde ti uwe akyirten wu tu itinwangru uwae kicaeb-wu.

¹⁴Kiye ti Yesu ru ka sang kununn Bitrus, awu sae iya uwa Siman nae kicaeb.

¹⁵Awu sa kujwo tekunn unda wu, ama kicaeb yi ya wu ta. Awu fa sunwunn ritsen u sha na ba wuci.

¹⁶Ureb usir wu, a pu ande ti rijwen titibi ta risu-ba ba uwog Yesu. Awu fwan ajwen titibi yine kubyag u jae ruye yi, ama u nwangru ande ti acaeb ti tsotso.

¹⁷Awu nde wande yine ikyaen ti ayi ā kumunn ira iki ti a ri pu ba ti kucang yi unju na Ishaya unde ti ku ya iskin ira Rimam baa, “Awu ti risu-wu paembe acaeb-ti. Awu su acaeb ti ta rimenn-ti ru.”

¹⁸Ti Yesu nung baa, ande na jwunn pakob wu, awu ri te ande-wu baa, aba na yen ru yi ukunn uyinn uwe akwen.

¹⁹Ama unde iki uwae ande ndufu ti ku kwen na ande icwe ba uwog Yesu u ri te wu baa, “Unde ti uwe, ame u putsa fu ru yi uwog ti afu ku ru yi atang meme.”

²⁰Yesu ri te wu baa, “Aswáe site uwáe ti ayi ku nae atang, inung ti ku pinn apupwen ama site afug-yi, amaa, Umbae Unde[8] site-wu ti uwog ti awu u nae atang be.”

²¹Unde iki cwucwo uwae ande ti ku sha ti a u putsa wu ri baa, “Itsekuru, afu a cwe ira ame u ru ka nji ite-m titawe.”

²²Ama Yesu ri te wu baa, “Putsa m, ti ya ande ti cwucwu ta ti a nji atso.”

²³Isim yine Yesu sang uwae kuyae, ama ande ti awu ku kwen na ba iken putsa wu.

²⁴Ti a nunung, ufunn ti ribom nwunn uwae uyinn atang ku nda kuyae ku txi pu ambyi txi pu ambyi u ku sha ti awu u fxaebur, ama Yesu nae kicwag.

²⁵Ande-wu nwunn u ka shwu wu u ri te wu baa, “Nwangru ti, Itsekuru! Ati ku cwu-ti.”

²⁶Yesu ri te ba baa, “Ande-m, ani nde rimang ku kyen ikyenricwu? Ani site-ni uwae kinjo ko tikiyib be a!” Isim yine awu nwunn u taen ufunn ira u fwan uyinn kubyag, ama uwog ka skirr.

²⁷Ayib fur ande ti ta uwae kuyae atang meme. A ku rang baa, “Awune si utso unde ti rimang, ti ufunn ku nae risu riben te wu?”

²⁸Kiye ti Yesu ka ukunn uyinn akwen, uten ande ti Gadara, ande iki ifaen ba tu wu. Aba si ande ti munn te rijwen titibi u ruye uwog ti a ku nji ande atang. Aba ku sae ayib kum urwa urwa amam u byag uwae si-yi ti ti ri be. Unde iki ko-wu ti wu u ru fengo atang be.

²⁹Ti ande ti munn te rijwen titibi bane nungye Yesu, aba taen ira ti ribom-ba baa, “Afu Umbae Rimam, afu nde rimang u ba uwog-ti ike? Afu ba ti fu nde ti rikaen ti ti kiye pang-wu khika be a.”

³⁰Uwog wune ande ba iki pu ingog-ba ku ci iken fifer ti uwog atang.

³¹Rijwen titibi ti ta uwae ande ti rijwen titibi bane jwam Yesu baa, “Asiti afu a jae ruye ti, nda ti ti ti u ru ka sang uwae ingog ti ta akwen ne.”

³²Yesu cwe na ba baa, aba na ru. Ama ajwen titibi yi ruye uwae ijwe ande ba u ru ka sang uwae ingog. Ama ti ritsen ingog yi meme pab ter ru ka jwunn si uyinn ti ta atang u si ka ngwa cwu uwae ambyi.

³³Ande ti ku shi ingog yi nwunn u ter ru ka sang uwae uten ti fer atang u ka ri ira yi te ande ti ta uwae uten atang. A ri te ba iken ti aba nung, fa ti iken ti tu ande ti kijaen abane.

³⁴Kiye ti ande ba fxen ira yine, meme-ba ter inyae ru ka tu Yesu. Ti aba nung wu, a jwam wu baa, awu na nwunn uwae uten-ba.