Read kutep Markus 6 Bible Online

Markus 6 - kutep bible

Markus 6

¹Yesu ya uwog wu ta u kafe ru ti uten-wu Nazareti. Atugbug-wu putsa wu.

²Ti usir ikyinn-ba nde pu wu, awu sang ka kusog Rimam ti ta atang ku kwen na ande. Ande yang akwen fxen ira ti awu ri. Aba sae ira yi fur ba ayib. Aba ku ri baa, “Uwog ti awu tu ira yine atang si aka? Aye ti nda wu ben-ayib yine? Awu nde rimang itawe ku nde iken ti ku fur ayib yine?

³Awu si-wu kafinta wu be a. Si-yi umbae Mberimu be a. Aba Yakubu ti Yusufu ti Yawuda ti Siman si-ba ameinja-wu be a. Ambakaya-wu ta te-ba ati ike be a.” Ama aba kafe isim ta wu.

⁴Ama Yesu ri te ba baa, “Unde ti ku ya iskin ira Rimam ku tu rurob uwog ande ko aka meme. Se uwae uten ti ana-wu ti ameinja-wu ti uwae ishikununn-wu awu u shanum rurob atang.”

⁵Yesu nde-wu wande iki ti ku fur ayib uwae uten atang be. Awu tu ande iki kpang amam u pu ajwo-wu nae tsa risu ande ti kicaeb iki u nwangru ba uwae acaeb-ba.

⁶Ti awu nung ti aba ru-ba uwae kinjo uwog wu be, ira yi fur wu ayib. Ama awu kyang ru ka sang kyi fe imbae uten ti nae pakob-ba atang meme u ku kwen na ande ira Rimam.

⁷Awu kunn byir ande-wu rijwe asu ifaen ti awu ku kwen na ba u tom ba ti ifaen ti ifaen shag kyife uwae uten atang meme. Awu nda ba kuko risu asung titibi.

⁸Awu ri te ba baa, “Ni kyang ikyin-ni, ni ye su-ni iken iki ru te yi be. Ni ye su-ni wuci, ko ukyig, ko aser be. Si nyang ukum amam ti ani u ye su kujwo.

⁹Ni tso apwafxen, amaa ni sī-ni atupwa ifaen be.”

¹⁰Awu ri te ba ama baa, “Asiti ani a sang uten iki, kusog ti ani a sang atang, ni som atang se kiye ti ani u nwunn atang.

¹¹Asiti ande ti uten iki a kyangte-ba ani be, ko aba a naa atong fxen-ba ira-ni be, ni ya ba ta. Ni fen ibung afxen-ni si ba ti atang, ti ni tso ba baa, ani na site-ni ira iki te ba cwucwo be.”

¹²Ama aba ru ka ya iskin ira Rimam te ande baa, a na ya ikentitibi na ta.

¹³Aba rwae ruye asung titibi yi ijwe ande yang akwen. Aba tu ande ti kicaeb yang-ba akwen ama u sa kindob si ande ti kicaeb u nwangru ba.

¹⁴Ukwe Herodus fxen ira yi meme, ikyaen ti, iten Yesu shag kyi fe uwog meme. Ariki ku ri baa, Yesu na si Yohana ti ku nde batisma ti a wen kute, ti na kafe ba. Né iken ti nde, Yesu ku nde iken-wu ti kuko ahan.

¹⁵Ariki ri baa, iyee, ayi na si Eliya ti kafe ba. Ariki cwucwo ri baa, Yesu na si unde iki tishe ti ku ya iskin ira Rimam ti na pangma ande ti ku ri ira Rimam te ande ti kute.

¹⁶Amaa, kiye ti Ukwe Herodus fxen ira yi, awu ri baa, “Awu si kang Yohana ti ame pye ra pu m risu-wu. Awu ti kafe u shwur.”

¹⁷Ayi si Ukwe Herodus ti nde fengo ti a ye Yohana cwunnkyi uwae pursuna ti kute. Herodus nde ayine ikyaen ti, Yohana tu wu ti riraen risu Herodus ti awu mbe, ko ti unda wu si pu wu uwa inja-wu Filip.

¹⁸Yohana ku ri kob ira ti Herodus baa, i na nyang-yi ti Herodus na fxaen mbe uwa inja-wu be.

¹⁹Ikyaen ayine, unda wu, ti rinyi-wu si Herodus, ndembeb utob ti Yohana u myae wu itiwen. Awu tu-wu fengo be,

²⁰ikyaen ti, ubaen-wu Herodus ku kyen ikyenricwu Yohana. Awu nung Yohana si unde ti sisaen u si unde ti kubenti. Ikyaen ayine, awu ye su Yohana nyinyang. Awu ku sha kob ti wu na fxen ira ti Yohana ku ri, amaa, awu a fxen mam ira yi ayi ku ten wu utob timambe.

²¹Unda wu tu riyae usir ti Ukwe Herodus ku nde ukwab na usir ti mbae-wu. Herodus nde ukwab yine ikyaen meme ande tiyang na uten, ti ukwe rika, ti ande ndufu ti rurob na uten Galili patag.

²²Ama umbae Herodus ti unda sang ba ama u se ise ti nda Herodus ti ande-wu utob titsen. Herodus ri te mbawandab wu baa, “Ri te m iken ti afu ku sha, ame u nda fu.”

²³Awu yer unju te uben ti ben baa, “Ame u nda fu ko ayi a si imi ti afu a ku jwam m! Ko afu a baa, ame na kata kujwokwe-m u nda fu ripye-yi, ame cwe pu m!”

²⁴Mbawandab wu ruye atang u ka rang iya-wu Herodus baa, “Imi ti ame u jwam uwog Ukwe?” Iya-wu ri baa, “Jwam wu ti wu na nda fu risu Yohana unde ti ku nde batisma.”

²⁵Ti ritsen, mbawandab wu ter kafe ru ka tu ukwe u jwam wu baa, “Yer risu Yohana tine ti nda m uwae kutukwab.”

²⁶Ayine nda ukwe beb utob timambe. Amaa ikyaen uben ti awu ben, ti ikyaen ande ti rikyen-wu, awu ku sha-wu ti wu kafe ti isim ti unju ti yer-wu ti wandab-wu be.

²⁷Ti ritsen, ukwe tom ra atom-wu baa, awu na ka pyera risu Yohana na ba na wu. Ama awu ru ka pye ra risu Yohana yi pursuna,

²⁸u ndáe si uwae kutukwab u nda mbawandab wu. Mbawandab wu sa u sa ru ka na iya-wu Herodus.

²⁹Kiye ti atugbug Yohana fxen ira yi, aba ru ba ye rukom rimenn Yohana u sa ru ka nji.

³⁰Ande rijwe asu ifaen ti Yesu tom ba atom kafe ru ba uwog-wu. Aba ri te wu iken ti aba nde, ti iken ti aba kwen na ande.

³¹Yesu ri te ba baa, “Ande ko pang-ba ike. Ayi nyang skeb ti ni ya ba ta ti ni ru ka pu nyang kpang.” Awu ri ira yine ikyaen ti, ande ku sisang, ku ruru. Awu ti ande-wu tu fob-ba riyae ti a som u ci wuci be.

³²Ikyaen na ayine, aba si uwae kuyae u nwunn ru yi uwog ti ande iki ta-ba atang be.

³³Amaa ande yang akwen nung ba ti aba nwunn ku ru, ama aba nungye ba. Ikyaen yine aba nwunn ruye uwae uten atang ti inyae u rwae rifab-ba kyig kyig kyig ka unju uyinn tiyang. Aba ta uwe uwe ka sang uwog ti Yesu ti ande ti imbyi-wu ku ru yi atang.

³⁴Ti Yesu ruye uwae kuyae atang, awu nung ande yang akwen funn pu ba atang. Ama awu sae ba ayibrisi, ikyaen ti, aba som pangma iwen ti site-yi unde ti ku shi yi be. Ama awu nwunn u kwen na ba iken ti tsotso.

³⁵Ama ti usir si ku yib pu wu, atugbug-wu ru ba uwog-wu baa, “Usir si ku yib pu wu, ama uwog wune si uwae kutur.

³⁶Ayi nyang skeb ti fu u tē ande ba ti aba ā ru ka sang ufang, ti imbae uten ti fifer, ti aba ā jab wuci ti ā ci.”

³⁷Yesu ri te ba baa, “Ani ti risu-ni, ni nda ba wuci.” Aba rang wu baa, “Ujwunn ande bane u ci buredi skeb denari ukob ishaen[8] na ishaen itsongta (skeb denari 180). Ati u jaeb tu na ba wuci ti u ko ba njwaa?”

³⁸Yesu rang ba baa, “Ani site abyi buredi imwa? Ni ru ka nung.” Isim-yi ti aba sae fe, a ri baa, “Abyi buredi itsong, ti iwag ifaen.”

³⁹Yesu ri te ba ti a na ri te ande meme ti a na som tsa irum ti tirisub atang ti kumbub ti kumbub.

⁴⁰Ama ande ba som fer atso som fer atso ru ka furu. Kumbub ana ande mae ande itsong som kumbub ana-ba, ti kumbub ana ande mae ifaen ka mbe rijwe som kumbub ana-ba.

⁴¹Ama Yesu mbe abyi buredi itsong yine ti iwag ifaen yine. Awu sae ayib apupwen u nde fxaefa na Rimam u nyangta buredi yi ti ajwo-wu u ye na atugbug-wu ti a pu kan na ande ba. Awu pu iwag ifaen kan na ande ba meme.

⁴²Ande patag ci wuci yi u kyaen.

⁴³Atugbug Yesu ru ka byir amumunn yi ti tsitsi, ti iwag ti tsitsi. Ayi munn atyika rijwe asu ifaen.

⁴⁴Uwae ande meme ti ci wuci atang arom amam ka kumbub itsong.

⁴⁵Uwog wune, Yesu nda ande ti putsa wu ti a na si uwae kuyae ti a na yen ru yi uten ti Betisaida uwe-wu, se awu na a tē pu-wu ande ti tsitsi titawe.

⁴⁶Isim yi ti awu tē pu-wu ande ba, awu tso yi rikwen ka u jwam Rimam atang.

⁴⁷Ti ayib ku fen fen, ande ti imbyi-wu aba ta uwae kuyae uwae uyinn tiyang. Yesu ta akaense kum awu kinjo-wu.

⁴⁸Awu nung baa, ande-wu na ku ngwa rikaen ti kuyae ti ti ter, ikyaen ti, ufunn ku tur ba ru ti isim. Ama, ti mbakunn ku ta ira ti kucang, awu nwunn u kyang ikyin risu ambyi ru ku ba yi uwog-ba. Awu ku ba ku nde pangma awu na u ba yafife.

⁴⁹Amaa ti aba nung wu, awu ku kyang risu ambyi, aba tang baa, awu na si ricwu. Aba mbub ukunn,

⁵⁰ikyaen ti, ti aba meme-ba nung wu, rijwen si ba ijwe. Ti ritsen Yesu ri ira te ba baa, “Ni ye utob! Ni kyen-ni ikyenricwu be! I si ame Yesu!”

⁵¹Ama awu sang kuyae te ba tiri. Ufunn ti ku kikae nae riben skirr. Unyang kunn ba si-yi ti ti ri be. A shanum ti iken ti aba u nde.

⁵²Aba kab ye-ba ira wuci ti Yesu sha na ba ti kute be, ikyaen ti, utob-ba cwunn kyi pu yi.

⁵³Ti aba yen ru ka sang uten ti Genesare, aba kya kuyae unju uyinn tiyang.

⁵⁴Ti aba ruye uwae kuyae atang, ti ritsen ande nungye pu ba Yesu.

⁵⁵Aba ter inyae sang kyi fe uten ti ta atang meme u su ande ti kicaeb uwae iken ti nae-ba ru fe yi uwog ti a fxen baa, Yesu na ta atang.

⁵⁶Uwog ti Yesu sang atang meme, ko uwae uten tiyang, ko uwae imbae uten, ko ufang, ande pu ande ti kicaeb ru yi ritug. Aba ku jwam wu ti a na u tekunn kutong kutupwa-wu. Meme ande ti a sa kujwo tekunn kutong kutupwa-wu, a tu itinwangru uwae kicaeb-ba.