Read kutep Markus 8 Bible Online

Markus 8 - kutep bible

Markus 8

¹Uwae kiye wu ande yang akwen ba funn kyi uwog Yesu cwucwo. Aba site-ba wuci be. Yesu kunn ande ti imbyi-wu ba uwog-wu u ri te ba baa,

²“Ame ku nung risi ande bane, ikyaen ti, yaka ne usir-ba si usir ita akwen uwog-m, a site-ba wuci be.

³Asiti ame a tē ba baa, aba na ru yi uwae kununn, rikob u ye ba fengo ikyaen ti, ariki uwae-ba ru fengo ti rwen ba.”

⁴Atugbug-wu rang wu baa, “Aka uwae kutur ike ti ati u tu wuci ti u ko ande bane?”

⁵Yesu rang ba baa, “Abyi buredi imwa ti ani site yi?” A ri baa, “Itsongfaen.”

⁶Ama Yesu ri te ande ti funn atang baa, aba na som riben. Awu ye abyi buredi itsongfaen ayi u nde na Rimam fxaefa u nyangta yi u ye na atugbug-wu ti a na kan na ande. Aba nde yi.

⁷Aba site iwag tikiyib kpang ama, ta atang cwucwo. Yesu tso fxaefa na Rimam ikyaen iwag yi u ri te ande ti imbyi-wu ti a na kan na kyi ande ti funn atang.

⁸Ande meme ci u kyaen. Ama ande ti putsa Yesu tob ripye wuci ti tsitsi, ayi munn acika itsongfaen.

⁹Ande ba ka ande kumbub inje. Isim ti Yesu tē ba ru,

¹⁰awu ci-wu kiye be, u si uwae kuyae ti atugbug-wu u ru yi uten ti Dalamanuta.

¹¹Ande ti kumbub Farisi ru ba uwog Yesu u bag ishaen ti shaen te wu. Aba ku sha ti wu na nde na ba iken ti ku fur ayib ti u tso baa, kuko-wu na ru uwog Rimam ba. Ayi si kutxae ti a txae wu.

¹²Yesu sī kiku ti ribom u ri baa, “Ande ti kiyuku ne nde rimang ku sha ti a u nung iken ti ku fur ayib? Kubenti ti ame ku ri te ni, ame u tatso-m ande bane iken ti ku fur ayib iki be.”

¹³Tiri awu ya ba ta, u kafe si uwae kuyae u yen ru yi ukunn akwen.

¹⁴Ti aba sang uwae kuyae ku ru, atugbug-wu tangsom baa, aba na ye su-ba wuci be, nyang kubyi buredi kinjo amam ti aba site yi uwae kuyae.

¹⁵Yesu ri te ba baa, “Ni kab ye ti ni nung afxen-ni riben nyinyang ti yisiti na ande ti kumbub Farisi ti ana ande ti putsa ira Herodus.”

¹⁶Ande ti imbyi-wu ku rang atso ira baa, “Ko iki be awu ri ira yine ikyaen ti ati ye su-ti buredi be ahoo.”

¹⁷Yesu fxen ye pu wu ira-ba ti aba ku ri. Awu byib ba baa, “Ani kyang rimang ku rang atso ira risu buredi ti ani site-ni ayi be. Ani nungye-ni khika be a? Ani ben-ni ayib khika be a. Utob-ni kwen kyikyi a.

¹⁸Ani site ayib, ayib-ni ku sae-yi be a. Ani site atong, atong-ni ku fxen-yi ira be a. Ani tangsom-ni

¹⁹te kiye ti ame kata abyi buredi itsong na ande kumbub itsong be a. Atyika imwa ti iken ti a ci tsitsi munn atang?” A ri baa, ayi na munn acika rijwe asu ifaen.

²⁰Awu rang kyi ba cwucwo, “Kiye ti ame kanta abyi kiraen itsongfaen na ande kumbub inje ama re. Atyika imwa na iken ti a ci tsitsi ti ani tob munn atang?” A ri baa, “Itsongfaen.”

²¹Awu rang ba baa, “Ba kwar tine ani nungye-ni khika be a?”

²²Yesu ti ande ti putsa wu ru ba uten ti Betisaida. Ande iki pu unde ti mbub ayib ba uwe-wu u ku jwam wu ti wu na sa kujwo na tekunn ijwe unde wu.

²³Yesu tae wu ru yi isim uten wu. Ti aba ka atang, Yesu tub atsang si unde wu ayib u sa kujwo nae tsa unde wu u rang wu ira baa, “Afu ku sae iken iki tine a?”

²⁴Unde wu te pu ayib tso u ri baa, “Ame ku sae ande, amaa aba pangma si ituku ti ku kyang ikyin.”

²⁵Yesu sa kujwo tekunn kyi ayib unde wu cwucwo. Awu shaen ayib, ama ayib-wu kafe ba pangma ti kucang. Awu sae uwog sisaen.

²⁶Yesu ri te wu baa, “Kafe ru yi uwae kununn-fu. Sang ka-fu uwae uten atang cwucwo be.”

²⁷Yesu ti atugbug-wu nwunn ru yi umbae uten iki ti ta uwae uten ti Kaisariya Filipi. Ti aba ta uwae ikyin ku ru, Yesu byib ba ira baa, “Ande ku nung m baa, ame na si aye?”

²⁸Atugbug-wu ri te wu baa, “Ariki ku ri baa, afu na si Yohana unde ti ku nde batisma, ti kafe ba ti unyang. Ariki ku ri baa, afu na si Eliya. Ariki ama ku ri baa, afu na si kinjo uwae ande ti ku ya iskin ira Rimam ti kute.”

²⁹Yesu rang ba baa, “Ani ama re, ani ku nung me baa, ame na si aye?” Bitrus ri baa, “Afu ti si Unde wu ti Rimam Tsab Tsi”[11].

³⁰Amaa Yesu fwa ba kusen baa, aba na ri ira yine te-ba unde iki be.

³¹Uwog wune, Yesu bag iken ti kwen na atugbug-wu baa, “Umbae Unde u ngwa kang rikaen timambe. Ande ndufu ti ku myae ira, ti akwen tiyang ti ande ti ku kwen na ande Icwe Rimam u pyir wu, a u wen wu, ama awu u nwunn uwae kukwae ti unyang usir ti fa ti ita.”

³²Yesu tatso ba ira yine sisaen. Ama Bitrus pu wu ru yi iyen kyaeb u fwan wu ira.

³³Amaa Yesu kafe u sae atugbug-wu ti tsitsi u fwan Bitrus ira baa, “Afu Shetann, ko ru ru uwe-m ike! Ira ti afu ku tang uwae-fu si-yi ana Rimam be, ayi si ana ande.”

³⁴Isim ayine Yesu kunn byir ande ti funn atang ira ba, fa te atugbug-wu. Awu ri te ba baa, “Unde titini ti a ku sha ti wu na u putsa m, se awu ā shaen risu-wu titawe. Cwucwo awu ā cwe ti wu ye kutuku ti cice tso ukwae-wu, u putsa m.

³⁵Unde titini ti ku sha ti wu u txen unyang-wu txen, awu u shanum unyang-wu. Unde titini ti a shanum unyang-wu ikyaen-m ti ikyaen ira-m ti awu ku ri te ande, awu u tu unyang ti tsikukunn.”

³⁶Awu byib ba baa, “Asiti unde a tu tag iken ti utense patag u shanum unyang-wu, iken yi u ndeya wu a?

³⁷Unde u fen mbe unyang-wu ti imi?

³⁸Ikyaen ti unde ti a wae rukwae-m, ti ira-m, uwae kiye titibi ne ti ande ku kyen-ba Rimam be, Umbae Unde u ba wae rukwae unde wu ama kiye ti awu a kafe si apupwen ku ba yi riyinn na Itse-wu, fa ti atom ti apupwen.”