Read kutep Markus 9 Bible Online

Markus 9 - kutep bible

Markus 9

¹Awu ri te ba ama baa, “Kubenti ti ame ku ri te ni, ande iki ta uwae-ni ike ti a u cwu-ba cwu be, se iken ti a nung pu ba ti Rimam ye Kujwokwe-wu tsi pu wu ti kpakang itawe.”

²Isim usir itsongnjo, Yesu pu Bitrus ti Yakubu ti Yohana ru ka tso fe kitaen rikwen iki ti kob ken pu wu. Ande iki ta-ba atang be, nyang aba inje amam. Ama ti aba tsi atang ku sae, ijwe Yesu ti kutxuwe-wu kafe ku jijaen wurwur pangma usir uwe-ba.

³Atupwa-wu ama kafe titsen patag u jijaen wurwur. Unde ta-wu uwae utense ti u jwo saen atupwa ti ayi u saen pangma ana Yesu kiye wune be.

⁴Ama tiri, Eliya ti Musa tatso risu-ba atang, ku ri ira ti Yesu.

⁵Bitrus ye ra unju tso u ri te Yesu baa, “Unde ti uwe, ti ati ba ike ne, ayi nyang timambe! Cwe na ti, ati u sim afug ita ike, kinjo ikyaen na afu, kinjo ikyaen na Musa, kinjo ikyaen na Eliya.”

⁶Awu ri ahan ikyaen ti, ikyenricwu ye ba, ama Bitrus nung-wu ira ti awu u ri be.

⁷Ama kubyi si ba kukyi ba. Aba fxen afxenjwin uwae kubyi ri baa, “Awune si Umbae-m ti utob uwae-m. Ni naa atong ti ni fxen wu!”

⁸Ti ritsen aba kafe ku sae ayib, a nung-ba unde iki cwucwo be, nyang Yesu amam ti tsi te ba atang.

⁹Ti aba si rikwen ku ba, Yesu fwa ba kusen baa, aba na ri te-ba ande iki iken ti aba nung ne be, se awu Umbae Unde na a nwunn pu wu uwae iticwu itawe.

¹⁰Ikyaen na ayine, aba ye su ira yi uwae utob-ba, ku rang atso baa, imbyi na ira ti itinwunn uwae iticwu ti Yesu ku ri ne si imi?

¹¹Ama aba byib wu baa, “Imi ti nde nee ande ti ku kwen na ande Icwe Rimam ku ri baa, Eliya na u ba itawe, ama Unde wu ti Rimam Tsab Tsi na u ba ana wu isim?”

¹²Yesu ri te ba baa, “Kubenti, Eliya u ba kang itawe. Awu u kyae nyang iken meme.” Ama awu rang ba cwucwo baa, “A bae ira risu Umbae Unde baa, awu na u ngwa rikaen timambe, be a? Cwucwo ande na u sae ru wu, be a?

¹³Ame ku ri te ni, awu Eliya ru ba pu wu. Ande nde pu ba wu iken ti a ku sha utob-ba, pangma ti a bae uwae Kutsingken Rimam risu-wu.”

¹⁴Ti aba si rikwen ba uwog atugbug ti tsitsi, aba nung ande funn atang ting ting! Ande iki ti nung ira icwe ta atang, aba ku shaen ishaen te atugbug Yesu.

¹⁵Ti ande ti funn atang sae ye Yesu, ayib fur ba. Aba ter inyae ba kunnji wu ira.

¹⁶Yesu rang ande-wu baa, “Ira yi ti ani ku shaen ishaen atang si imi?”

¹⁷Unde kinjo uwae ande ti funn atang ri baa, “Unde ti uwe, ame pu umbae-m ti urom ba uwog-fu. Rijwen titibi tsi kyi wu unju.

¹⁸Kiye ti rijwen titibi wu a nwunn pu risu-wu, ko ayi a si aka, ayi ku sa wu jwunnsi riben. Ufunn ku ba kag wu unju. Awu ku kub inger. Ijwe-wu ku kwen kyi kyi. Ame jwam atugbug-fu ti a na rwae ru na wu rijwen titibi ne. Aba nde tu-ba be.”

¹⁹Yesu ri te ba baa, “Ani ande ti kiyuku ne kyang rimang u ru-ni uwae kinjo be? Ame u som te ni ka kwer isinn? Ame u ye utob te ni ka kwar isinn? Pu umbae wu ba na m ike.”

²⁰A pu umbae wu ba uwog-wu. Ti rijwen titibi wu nungye Yesu, ti ritsen, awu byinn ra umbae wu si riben. Ijwe-wu ku fufwer. Awu ku kaen riben. Ufunn ba kag wu unju.

²¹Yesu rang itse umbae wu baa, “Kiye titini ti kicaeb yine ye umbae wu?” Awu ri baa, “Kicaeb yi tu wu ti ti awu si umbae ti kitinying.

²²Kicaeb yi ku sa wu jwunnsi kob urwa ti uwae kukwae ambyi, ikyaen ti yi na wen wu. Afu a u nde tu pu fu, afu u nung ti ti ayibrisi, u ndeya ti.”

²³Yesu rang wu baa, “Afu nde rimang rang baa, asiti ame na u nde tu bara? Asiti unde a ru uwae kinjo, awu u nde tu iken meme.”

²⁴Ti ritsen itse umbae wu ye ra unju tso u ri te Yesu baa, “Ame ku ru uwae kinjo. Ndeya m ti uwae kinjo-m ā skeb ti kucang.”

²⁵Ti Yesu nung ande yang akwen ku ba ku funn uwog-wu ti inyae, awu taen rijwen titibi ira ti ribom baa, “Afu rijwen titibi ti tsi kyi umbae wune unju ti atong, ame ku fwa fu kusen! Ya umbae wune ta! Kafe ba-fu uwog-wu cwucwo be!”

²⁶Rijwen titibi wu taen ira u nda ijwe-wu fwer si-yi ti ti ri be, ama ruye. Umbae wu nae riben pangma si rukom, ama ande ti ta atang ri baa, awu na cwu pu wu.

²⁷Amaa, Yesu ye kujwo umbae wu u shir wu nwunn ritsen, ama umbae wu tsi ritsen.

²⁸Isim-yi ti Yesu sang pu wu uwae kusog ti atugbug-wu kum aba amam, aba rang wu baa, “Imi ti nde ati rwae ru tu-ti rijwen titibi wu be?”

²⁹Yesu ri te ba baa, “Ani u nde tu-ni ti ni u rwae ruye rijwen titibi itso yine risu unde be, se ani a ku jwam Rimam titawe.”

³⁰Aba nwunn uwog wune u nyaetsa uten ti Galili. Yesu ku sha-wu ti ande na nung uwog ti awu na ta atang be,

³¹ikyaen ti, awu ku kwen na atugbug-wu baa, “A u sa Umbae Unde sang kujwo ande, aba u wen wu. Ti aba a wen mam fe wu, usir ti ita awu u nwunn uwae kuskab ti unyang.”

³²Ande na Yesu ba kab ye-ba imbyi ira yi ti awu ri te ba be. Amaa aba ku kyen ikyenricwu ti a u rang wu rang.

³³Aba ru ka sang uten ti Kaparnawum. Ti Yesu ta uwae kusog, awu rang ba baa, “Ira imi ti ani ku shaen ishaen te atso fengo ti ati ku ba?”

³⁴Aba som piin, ikyaen ti, ira yi ti aba shaen ishaen te atso risu-yi fengo ku ba si ti, unde ti site rurob siskeb uwae-ba si aye.

³⁵Yesu som riben u kunn ba ba, aba rijwe asu ifaen, u ri te ba baa, “Asiti unde a ku sha ti wu u si unde ti uwe, awu u si unde ti ricwunnkyi uwae-ba meme, ama u si upyi-ba meme.”

³⁶Yesu ye umbae iki tsi uwe-ba. Isim yine awu ye umbae wu fa ajwo u ri te ba baa,

³⁷“Unde ti a ku paembe umbae ti kitinying pangma anyisu tinying bane yi rinyi-m, si ame ti awu ku paembe. Cwucwo, unde titini ti a ku paembe m, si-yi ame ti wu ku paembe amam be. Awu ku paembe Rimam ti tom me ba.”

³⁸Yohana ri te wu baa, “Unde ti uwe, ati nung unde iki ti ku rwae ruye rijwen titibi risu ande yi rinyi na-fu. Ati byang kyi wu ikyaen ti, awu fa-wu uwae-ti be.”

³⁹Yesu ri te ba baa, “Ni byang kyi-ni awu be. Unde ti a ku nde iken ti ku fur ayib uwae rinyi-m ayi site rikaen uwe ike ti awu u ba ri ira titibi risu-m.

⁴⁰Unde ti a si-wu unde ti rika-ti be, awu si ana-ti.

⁴¹Kubenti ti ame ku ri te ni, unde titini ti a nda ni ambyi ti ngwa ikyaen ti ani si ana-m, awu u shanum-wu kujwojang-wu be, ko tikiyib.”

⁴²Yesu ri baa, “Uwae anyisu tinying bane ti ku ru uwae kinjo uwog-m, unde titini ti a kyaefa kinjo uwae-ba ti wu na nde ikentitibi, ayi nyang skeb uwog unde wu ti a u sa ricwo tiyang kya fa unde wu ti ukwae u sa wu jwunnsi uwae uyinn tiyang.

⁴³Asiti kujwo-fu a ku nda fu nde ikentitibi, yer ra wu tika. Ayi nyang skeb uwog-fu ti afu u sang kuru Rimam ti apupwen te kukum kujwo, ti ti afu u sang uwog urwa ti ku jim-wu jim be te ajwo ifaen.[12]

⁴⁴

⁴⁵Asiti kufxen-fu a nda fu ti fu nde ikentitibi, yer ra wu tika. Ayi nyang skeb uwog-fu ti fu u sang kuru Rimam ti apupwen ti kufxen ti kukum, ti ti a u sa fu jwunnsi uwog urwa ti afxen-fu meme ifaen-yi.[13]

⁴⁶

⁴⁷Asiti riyib-fu a nda fu ti fu u nde ikentitibi, wag ra wu tika. Ayi nyang skeb uwog-fu ti afu u sang kuru Rimam apupwen ti riyib kinjo ti ti aba u sa fu jwunnsi uwog urwa ti ayib-fu ifaen.

⁴⁸Uwog urwa wune, acwucwug ti ku kub ijwe ande ti a pu jwunnsi atang u cwu-yi cwu be. Urwa ama u jim-wu jim be.

⁴⁹“Rimam ku kyae nyang ande-wu ti urwa pangma ti rinwaen ku kyae nyang utong.

⁵⁰“Rinwaen si iken ti tinyang, amaa asiti awu a ya utug-wu ta, afu u nde rimang itawe fu ba kyae nyang wu ti wu u nyang kyi utug cwucwo? “Ame ku ri te ni baa, ni kyae nyang wande atso ti ayi ā si tinyang pangma rinwaen ti ku kyae nyang wuci. Cwucwo ni som usom ti jimshwur te atso!”