Read kutep Luka 1 Bible Online

Luka 1 - kutep bible

Luka 1

¹Ande yang-ba akwen kwab u bae ira risu iken ti nde kutampwa-ti.

²Ira ti aba bae si sí ira ti ati kyangte uwog ande ti nung iken yi ti ayib-ba ti kucang u sa yi kyang ku ri te ande.

³Ikyaen yine, unde ti uwe, Teyofilos, ame tang baa, ayi na u nyang ti ame ama u bae ira risu iken yi ti imbyi ti imbyi na fu, ikyaen ti, ame nung putsa ira yi meme uwae asang yang-yi ti wur ru ne.

⁴Ame ku bae yi ikyaen ti afu na nung kubenti iken ti a kwen na fu.

⁵Uwae kiye na Herodus, Ukwe Yawudiya, unde iki ta atang, rinyi-wu si Zakariya, awu si kukwen Rimam u ta kumbub na Abija. Uwa-wu ama si rishi Aruna ti rinyi-wu si Elizabet.

⁶Zakariya ti uwa-wu som usom ti saen kyag uwe Rimam. Aba ku putsa icwe Rimam meme, u ta-ba te riraen be.

⁷Amaa a mbae-ba umbae be, ikyaen ti Elizabet si unda ti kunn utsob. Meme ifaen-ba kyaen tag pu ba, si-yi ti a u mbae tu anyisu cwucwo be.

⁸Usir iki Zakariya nwunn ku nde wande uwae kusog Rimam, ikyaen ti kumbub-wu ti ku fen Rimam kiye wu.

⁹Pangma ti ayi ta yi icwe na kukwen, a tsab Zakariya yi fengo iticaen, ti awu na sang ka ten iken ti ku nung kuyang uwae kusog Rimam.

¹⁰Ti awu ta uwae kusog atang, meme ande na Rimam funn ise ku jwam Rimam ikyaen ti, ayi si kiye ti a ku ten na Rimam iken ti ten.

¹¹Ama ti Zakariya u nunung, atom Rimam ti apupwen ru ba tsi te wu atang. Awu tsi kujwo rici na kuta ti a ku ten umung iken ti ku nung kuyang atang.

¹²Ti Zakariya nungye atom wu, unyang kunn wu, ayib fe wu, ikyenricwu ye wu.

¹³Ama atom wu ri te wu baa, “Zakariya, kyen-fu ikyenricwu be, ikyaen ti, a fxen pu ba ira ti jwam-fu. Uwa-fu Elizabet u mbae na fu umbae ti urom. Afu u fwa rinyi-wu baa, Yohana.

¹⁴Afu u tu utob ti tsen u pam ipam; ande iki yang akwen ama u kam ashwu ti a mbae umbae wune.

¹⁵Ikyaen ti, awu u si unde tiyang uwe Rimam. Awu u ngwa-wu iken ti ku nda unde shishaen be. Awu u munn te Kusung Rimam ti ti awu ta uwae rishwu iya-wu.

¹⁶Awu u nda ande ti Isirela yang-ba akwen kafe ba uwog Itsekuru-ba Rimam.

¹⁷Awu u ru uwe Itsekuru u site kpakang utob pangma ana Eliya, u kafe utob ana abitse ba uwog anyisu-ba, u sa ande ti kpag risu kafe ande ti ben ayib ana usom ti saen kyag, u kyaenyang utob ande ikyaen itiba ana Itsekuru.”

¹⁸Zakariya rang atom wu baa, “Ame u nung iken ayine rimang? Ame kyaen tag pu m, uwa-m ama kyaen tag pu wu.”

¹⁹Atom wu ri te wu baa, “Ame si Jibirilu ti ku tsi uwe Rimam. A tom me ti m na ru ba ri ira te fu, ama ti m na sa ira ti tinyang yine ru ba na fu.

²⁰Ira-m ayine u ba nde kang uwe ike, amaa ikyaen ti afu ru-fu kubenti uwae-yi be, afu u tsi kyi unju u ri tu-fu ira be, se usir ti iken yine a ru ba nde pu yi.”

²¹Ande ti funn ise som ku ji Zakariya. Aba ku kab iken ti nde itawe awu som yer uwae kusog Rimam.

²²Kiye ti awu ka ru ba yi ise, awu ri tu-wu ira unju cwucwo be. Aba nungye baa, Rimam na tatso wu ira ti kitam uwae Kusog Rimam atang. Awu ku tso nyáng kujwo, ikyaen ti, unju-wu tsikyi pu yi.

²³Kiye ti usir wande-wu yi mam tag, awu nwunn ru yi kununn-wu.

²⁴Isim ira ayine uwa-wu Elizabet kyaen rishwu. Awu nde ishaen itsong u ruye-wu ise be, u ku ri baa,

²⁵“Itsekuru-m Rimam ndeya pu wu ame tiri uwae rishwu ti ame kyaen ne. Awu sa ruye pu wu ame uwae rikwae ti wae ayib jwunn ande.”

²⁶Uwae ishaen ti fa ti itsongnjo na rishwu ti Elizabet kyaen, Rimam tom atom-wu ti rinyi-wu si Jibirilu ru ba kyi uwae imbae uten iki ti a ku kunn wu baa Nazareti, uwae uten ti Galili.

²⁷Awu ru ka tu mbawandab iki ti rinyi-wu si Mberimu. Unde iki ti rinyi-wu si Yusufu, ti rishi na Ukwe Dawuda ye mam pu wu isam risu-wu ti wu na u mbe wu mbe.

²⁸Atom wu ru ba uwog Mberimu u ba ri te wu baa, “Usuko! Itinyang si pu yi ana-fu. Rimam te fu ta te atso.”

²⁹Ti Mberimu fxen ira yine, ikyenricwu ye wu si-yi ti ti ri be. Awu ku kab uwae utob-wu baa, ayine si itso ira ti kunnji ti rimang bara.

³⁰Atom wu ri te wu baa, “Kyen-fu ikyenricwu be, Mberimu, ikyaen ti, afu tu pu fu risu ti tinyang uwe Rimam.

³¹Afu u kyaen rishwu, u mbae umbae ti urom. Afu u fwa rinyi-wu baa Yesu.

³²Awu u si unde tiyang. A u kunn wu baa, Umbae Rimam. Itsekuru-ti u nda wu Kujwokwe na itse-wu Dawuda.

³³Awu u nae ukwe risu rishi Yakubu tsi kukunn ike ru fife yi uwe. Itinae na ukwe-wu, ricwunnkyi-yi u ta-yi be.”

³⁴Mberimu rang atom wu baa, “Ama ame u mbae umbae rimang ti ame nung-m urom khika be?”

³⁵Atom wu ri te wu baa, “Kusung Rimam u si ba risu-fu. Kuko na Rimam u si ba munn fu munn. Ikyaen yine umbae wu ti afu u mbae, a u kunn wu baa Umbae ti sisaen, u si Umbae Rimam. Awu u site-wu ti ikentitibi be.

³⁶Cwucwo, mbiya-fu Elizabet ti kyáen tag ne kyaen pu wu rishwu ti wu mbae umbae ti urom. Awu ti ande ku kunn wu baa, unda ti kunn utsob, awu kyaen pu wu rishwu. Ushaen wune fa ti itsongnjo tine.

³⁷Uwog Rimam, iken meme kpag-yi kpag be.”

³⁸Mberimu ri baa, “Ame si upyi Rimam. Meme ira ti afu ri ne ā nde pangma ti afu ri.” Ama atom wu nwunn u ya wu ta.

³⁹Ayi tsi-yi tsi be, Mberimu nwunn, u ru fengo rikyen yi imbae uten iki ti ta imbyi rikwen uwae uten Yawuda. Elizabet ti ubaen-wu Zakariya ta imbae uten iki ti ta imbyi rikwen uwae uten Yawudiya atang.

⁴⁰Ti awu ka pu wu atang, awu sang kununn Zakariya, u ka kunnji Elizabet ira.

⁴¹Ti Elizabet fxen kikunnji Mberimu, umbae ti ta rishwu-wu Elizabet fxae kafe. Ama tiri Kusung Rimam si ba kumunn Elizabet.

⁴²Awu ri ira tso ti ribom baa, “Titinyang si ana-fu kutampwa anda, ti tinyang ama si ana umbae ti afu u mbae!

⁴³Ayi nde rimang ti iken yine nde te m ti iya Itsekuru-m ba ku nung m?

⁴⁴Ti ame fxen kikunnji-fu, umbae ti ta uwae rishwu-m fxae kafe ti ushwu ti shwu.

⁴⁵Afu u tu itinyang yine ikyaen ti, afu ru kubenti uwae ira ti Itsekuru-ti Rimam ri te fu.”

⁴⁶Ama Mberimu ri baa, “Ame ku teb rinyi Itsekuru-m ti utob-m meme.

⁴⁷Utob-m tsen ikyaen na Rimam ti nwangru m.

⁴⁸Ikyaen ti, awu nung risi-m, ko ti ame si-m iken iki be. Tsi ike ru yi uwe ande u kunn me baa, unda ti tu itinyang Rimam.

⁴⁹Awu ti skeb ande meme nde na pu wu ame wande tiyang. Rinyi-wu si itisaen kyag.

⁵⁰Ande ti ku kyen ikyenricwu wu, awu ku sae ba ti ayibrisi. Anyisu-ba ama u tu rinyangwae-wu, ti anyisu ti ku ba isim-ba ru fife yi uwe.

⁵¹Awu nde wande tiyang te kujwo-wu u rwae shag tag pu wu ande ti ku ndub risu, ku sae ru ande ti tsitsi.

⁵²Awu shir ande ti uwe si pu wu riben. Ande ti nae risu riben ama, awu shir ba nwunn pu wu ritsen.

⁵³Awu sha wuci ti tinyang na pu wu ande ti rimenn ye ba. Awu jae ande ti rifunn ru ti ajwo ukaen.

⁵⁴Awu ndeya pu wu upyi-wu Isirela. Awu tangsom te ba u nung ba ti ayibrisi,

⁵⁵pangma ti awu yer unju te abitse-ti, ti Ibrahim, ti ande ti ru ba isim-wu ru fife yi uwe.”

⁵⁶Mberimu som te Elizabet ka ishaen ita u kafe ru ti yi kununn-wu.

⁵⁷Uwae kiye wune ama tiri rishwu Elizabet ben pang pu wu ti wu u mbae umbae. Awu mbae umbae ti urom.

⁵⁸Kiye ti ande Elizabet ti ande ice-wu fxen baa, Rimam na nde na pu awu itinyang, aba tsen utob te atso.

⁵⁹Usir ti fa ti itsongta aba sa umbae-wu ba ti a na tsen wu kutxin. A ku pwen ti a na u fwa rinyi-wu baa Zakariya pangma rinyi ite-wu.

⁶⁰Amaa iya-wu ri baa, “Iyee! A u kunn wu baa, Yohana.”

⁶¹A ri te wu baa, “Uwae rishi-ni, rinyi unde iki si ahan a?”

⁶²A ru ka pwen asae te Zakariya, ku sha ti a nung rinyi ti awu ku sha ti a na fwa na umbae wu.

⁶³Awu tso kujwo te ba baa, aba na nda wu iken ti a ku bae iken atang. Awu bae si uwae atang baa, “Rinyi-wu si Yohana.” Meme-ba, ayib fur ba timambe.

⁶⁴Ti ritsen unju Zakariya mbubta, awu ku ri ira ku teb nyang rinyi Rimam.

⁶⁵Ikyen ricwu ye meme ande ice-wu ti funn atang. Ira ayine shag kyi fe uwae uten Yawudiya meme. Unde titini ku ri yi.

⁶⁶Meme ande ti fxen ira yi, a ku kab ira atang. Ama a ku rang atso baa, “Umbae wune u ba si-wu rimang?” Ikyaen ti, itinyang ana Itsekuru-ti Rimam te wu ta te atso.

⁶⁷Uwog wune tiri, Kusung Rimam munn ite-wu Zakariya, awu nwunn ku ya iskin ira Rimam baa,

⁶⁸“Itinyang ā si ana Itsekuru Rimam, Rimam na Isirela awu ti ru ba nwangru pu wu ande-wu.

⁶⁹Awu ye nwunn pu wu unde ti u nwangru ti, ruye uwae rishi upyi-wu Ukwe Dawuda.

⁷⁰Pangma ti awu ri ti kucang yi unju atom-wu ti sisaen baa,

⁷¹awu na u nwangru ti uwae kujwo na ande ti rika-ti ti ande ti sa ti kuka.

⁷²Awu kumunn pu wu unju ti yer ti sisaen ti awu yer ti abitse-ti baa, awu na u nung risi-ti.

⁷³Awu nde pu wu iken ti awu yer unju te itse-ti Ibrahim baa,

⁷⁴awu na u nwangru ti uwae kujwo na ande ti rika-ti. Awu u nda ti riya ti ti u fen wu, ati u kyen-ti ikyenricwu unde iki be.

⁷⁵Ati na sisaen ama u som usom ti pang atang, tsi kunn ike ru fe yi uwe.

⁷⁶Amaa, afu umbae-m, a u kunn fu baa, unde ti ku ya iskin ira Rimam, Rimam ti skeb ti tag. Ikyaen ti, afu u ru uwe Itsekuru-ti u ka kyae nyang fengo tsi ku ji wu.

⁷⁷Afu u ka ri te ande-wu baa, a na u ya ta na ba ikentitibi-ba, aba na u nwangru uwae rikwen Rimam.

⁷⁸Ikyaen ti, awu site ayibrisi timambe. Pangma ti ucwefam ku yae ti kiskinn, ayi si ahan ama awu u ba ti itinwangru.

⁷⁹Awu u pu ande ti som uwae kufub ba sang uwog ti sisaen, ati ande ti ta uwae kusung iticwu, ikyaen ti wu na tatso ti fengo kujimshwur ti ti na kyang atang.”

⁸⁰Umbae wu ser ben, u kpag utob, ama som uwae kutur khika ba kwer ti usir ti awu ba tso risu-wu uwog ande na Isirela.