Read kutep Luka 10 Bible Online

Luka 10 - kutep bible

Luka 10

¹Isim ayine Itsekuru-ti Yesu tsab ande mae ita ka mbe rijwe[3] u tom ba ru uwe-wu ba ku jiji. Awu tom ba ti ifaen ti ifaen ru yi uwae uten uten ti uwog titini ti awu ti risu-wu ku sha ti wu ru ka atang.

²Awu ri te ba baa, “Risaen yaen timambe, amaa, ande ti u bunn yi ko-ba be. Ni jwam unde ti risaen ti wu ā tom ande ru ba bunn wuci yi.

³Ni nwunn-ni tiri! Ame tom ni ku ru pangma imbae iwentam ti mbuku pakob yi ti rikob.

⁴Ni kyang su-ni aser be. Ni nya-ni ukyig ru te yi be. Ni tso-ni apwafxen be. Ani a kyang ku ru, ni kyaetsi-ni fengo ti ni kunnji ande ira be.

⁵Ko kununn titini ti ani a ka atang ni ri baa, ‘Kujimshwur ā sang ba uwae kununn wune.’

⁶Asiti unde iki ti si unde ti kujimshwur a ta atang, itinyang na kikunnji-ni ā som ti risu-wu. Ayi a si-yi ahan be, itinyang-ni ā kafe ba ti risu-ni.

⁷Ni som ti uwae kununn wu. Ni ci ti ni ngwa iken ti a pu na ni meme, ikyaen ti, ayi nyang ti unde ti ku nde wande ā tu kujwojang-wu. Ni nae kyi fe-ni anunn ande txi txi be.

⁸Kiye ti ani a sang uwae uten, asiti ande ti uten atang a kyangte ni ti ajwo ifaen, ni kab-ni uwae titawe ti ni ci wuci ti a pu na ni be.

⁹Ni nwangru ande ti nae acaeb ti ni ri te ande baa, ‘Kujwokwe Rimam ta fifer te ni!’

¹⁰Amaa, asiti ani a ru ka sang uten iki ti ande ba atang a kyangte-ba ani be, ni ru ka tsi fengo ukum ti ni ri te ba baa,

¹¹‘Ko ibung uten-ni ti bae ti ti afxen, ati fen si fa ni ti atang. Amaa ni tangsom baa, Kujwokwe Rimam kyang ku yaen ku pu wu!’

¹²Ame ku ri te ni, usir wu ti Rimam u pwen ande rikwen, awu u sae ande titibi ti ta uten Sodom ti ayibrisi skeb pu wu ande ti uten wune.

¹³“Ayae-ni ande ti Korazin! Ayae-ni ande ti Betisaida! Ana-ni num pu yi ani! A baa, wande ti Rimam nde uten-ni awu na nde yi uwae uten ti Tiire ti Sidon, ande ba ú ya ikentitibi-ba ta pu ba ti kucang akwen u pu arae atupwa si u ka nae uwae itong ku tso baa, aba na ya ikentitibi-ba na ta pu ba.

¹⁴Usir ti Rimam u ru ba pwen ande rikwén, awu u sae ayibrisi ba uwog Tiire ti Sidon skeb pu wu uwog-ni.

¹⁵Ani ande ti Kaparnawum! Ani ku tang baa, a na u pu ni tso yi kuru Rimam apupwen a. Iyee, ko ti kinjo! A u shir ni si yi uwog Kinjag.”

¹⁶Yesu ri te ande ti putsa-wu baa, “Unde titini ti a kyangte ira-ni, awu kyangte ira ti ana-m, ama unde titini ti a shaen ni, awu shaen m. Unde ti a shaen m, awu shaen unde ti tom me ru ba.”

¹⁷Isim ti aba ande mae ita ka mbe rijwe ka nde tag pu ba wande ti Yesu nda ba, aba kafe ba ti utob ti tsen si-yi ti ti ri be. Aba ri baa, “Itsekuru, uwae rinyi-fu ati nda rijwen titibi nae risu riben uwog-ti.”

¹⁸Yesu ri te ba baa, “Kiye ti ani ku nde wande-ni ame nung Shetann jwunnsi apupwen ku ba pangma imam ti jaen wur.

¹⁹Ni nung! Ame nda pu m ani kuko ikyaen ti ni na ceb tsa ajwae ti ikob ti anang, fa ti awu unde ti rika-ti. Kikin u nde-yi ani be.

²⁰Amaa ni tsen-ni utob ikyaen ti rijwen titibi nae risu riben uwog-ni be, ni tsen utob ikyaen ti a bae rinyi-ni kuru Rimam apupwen.”

²¹Uwae kiye wune Kusung Rimam nda Yesu utob ti tsen si-yi ti ti ri be. Tiri Yesu ri baa, “Itse-m, Itsekuru apupwen ti riben! Ame ku nde fu fxaefa ikyaen ti, afu sa ira ti tinyang-fu tso ande ti nung-ba iken be, amaa uwog ande ti iyii ti ande ti ben ayib, afu sa yi titam. Kubenti, Itse, ame ku nde fu fxaefa ikyaen ti, ayi nyang uwae-fu ti afu nde iken yine.”

²²Uwog ne, Yesu ri te ande ti putsa wu baa, “Itse-m nda pu wu ame iken meme. Unde iki ta-wu ti nungye Umbae Rimam be, nyang Itse-wu amam. Cwucwo unde iki ta-wu ti nungye Rimam be, nyang Umbae-wu amam, fa ti ande ti awu ku cwe ira-ba u tatso ba.”

²³Tiri awu kafe uwe tag atom-wu u tam ri te ba baa, “Itinyang na Rimam ta risu-ni ande ti nung iken ti ani ku nung ne.

²⁴Ikyaen ti, ame ku ri te ni kubenti, ande yang-ba ti ku ya iskin ira Rimam, ti akwe, aba sa uwae tsi ti a na nung iken ti ani ku nung ne, amaa, a tu-ba riyae be. Iken ti ani ku fxen ama, aba tu u fxen-ba be.”

²⁵Isim ayine unde iki ti ku kwen na ande Icwe Rimam fa sunwunn ku sha ti wu myae Yesu kumyae. Awu rang Yesu baa, “Unde ti uwe, ame u nde rimang itawe ame u tu unyang ti tsikukunn?”

²⁶Yesu rang wu ama baa, “A bae imi uwae Kutsingken Rimam? Afu ku kwen na ande rimang risu-yi?”

²⁷Unde wu ri baa, “Ye ure te Itsekuru-fu Rimam ti utob-fu meme, ti unyang-fu meme, ti kpakang-fu meme, ti ira ti tang-fu meme. Cwucwo ‘Ye ure te unde ice-fu pangma ti afu ku ye ure te risu-fu.’ ”

²⁸Yesu cwe baa, “Afu ri pang atang! Nde iken yi ti afu pwen ne, afu u tu unyang ti tsikukunn.”

²⁹Ikyaen yine, unde wu ku sha ti wu kyae nyang risu-wu, awu rang Yesu baa, “Unde ice-m si aye?”

³⁰Yesu tsag te wu baa, “Unde iki nwunn Urushelima si ku ba yi Jeriko. Awu ru ba tu ande ti ku byinn fxaen mbe iken ande fengo. Ande ba waen tag wu atupwa ijwe u ye wu kum. Awu pu cwu, a teya wu ta u ye inyae-ba ter ru.

³¹Ama ayi nde ti, kukwen Rimam iki putsa fengo wu ku si. Kiye ti awu sa sa sa ba sang uwog ti a kum unde wune nae atang, awu pu ayib sae wu u yer kutur bur-wu u yafe.

³²Cwucwo Mbalawi iki ti ku nde wande kusog Rimam ru ba sang kyi uwog wu u nung unde wu u yer kutur bur wu u yaen ru u ka kotag fengo.

³³Amaa, urae Samariya iki, ti awu kyang ikyin-wu ku ru, ru ba sang kyi uwog wu. Kiye ti awu sae unde wu ti a kum wu nae, risi ye wu.

³⁴Awu nwunn ru ka uwog unde wu u ka jwo tag abang-wu u sha kindob shin wu atang u yir na wu abang ayi. Isim ayine awu ye unde wu som tsa ikyinnsu-wu u tae wu ru ba sang kununn uwog ti a u nungkyi wu atang.

³⁵Ucwefam-yi awu ye pu ayaen aser ifaen na unde ti kununn wu u ri te wu baa, ‘Nung kyi m awu. Meme iken ti afu a wen somtsa kyi risu yi, kiye ti ame a ka kafe ba, ame u ba pae na fu ti atang.’ ”

³⁶Yesu rang unde wu baa, “Uwae-ba ande ita ne, titini ti afu ku tang baa, awu na tso risu-wu baa, awu na si unde ice unde wu ti ande ti riyib kum wu ne?”

³⁷Awu ri te Yesu baa, “Unde ti sae ayibrisi ba uwog-wu.” Yesu ri te wu baa, “Ru ti ka nde pangma ti awu nde.”

³⁸Ti Yesu te ande ti putsa-wu nwunn u kyang pu ikyin-ba ku ru, a sa sa sa ba sang uwae uten iki uwog ti unda iki ti rinyi-wu si Marta ta atang. Awu kyangte Yesu ti ande-wu u pu ba ru ka sang kununn-wu.

³⁹Marta site kaya-wu ti rinyi-wu si Mberimu. Awu Mberimu som afxen Itsekuru ku naa atong uwae iken ti ti kwen-wu.

⁴⁰Marta nung wande-wu meme skeb-yi risu-wu, ama utob-wu ndembeb. Awu ru ka tu Yesu u ri te wu baa, “Itsekuru, afu ku tang baa, ayi na nyang ti kaya-m ú ya m ta, ame ku nde wande kinjo-m a? Ri te wu ti awu na ndeya m.”

⁴¹Ama Itsekuru-ti Yesu ri te wu baa, “Marta, afu ku ndembeb utob risu iken yang-yi akwen,

⁴²amaa iken kinjo ti afu shanum. Mberimu tsab sa pu wu kutunn ti tinyang. Ande u mbe-ba wu uwog-wu be.”