Read kutep Luka 15 Bible Online

Luka 15 - kutep bible

Luka 15

¹Usir iki ande ti ku mbe aser akwe, ti ande ti ku putsa-ba icwe be ru ba uwog Yesu ti a u fxen ira-wu.

²Ande ti kumbub Farisi ti ande ti ku kwen na ande Icwe nwunn u ku pwen unju tetso risu-wu baa, “Unde wune ku kyang te ande titibi u ku ci wuci te ba!”

³Ikyaen yine Yesu sunn na ba ira u ri te ba baa,

⁴“Asiti unde iki uwae-ni a site iwentam mae itsong, ama kinjo uwae-yi a yag byinn, awu u ya ayi ti tsitsi ne ta u ka sha awu kinjo ti yag byibyinn ne uwae kutur, se iken ti awu a tu pu wu awu.

⁵Kiye ti awu a sha tu pu wu mbawen kinjo wu ti yag ta ne, awu u ye wu nae tsa ukwae ti utob ti tsen

⁶u su wu ru ka yi kununn u ru ka kunn byir arwan-wu ti ande ice-wu u ri te ba baa, ‘Ni tsen yae m utob ikyaen na mbawen-m ti yag bibyinn né ame tu pu me awu.’ ”

⁷Yesu ri baa, “Ame ku ri te ni, ayi u si ahan ama, asiti unde kinjo ti ku nde ikentitibi a ya ikentitibi-wu ta, apupwen akwen a u tsen utob risu-wu skeb pu ba ande mae inje ka mbe rijwe asu itsongnje ti ku sae risu-ba baa, aba na ku nde-ba ikentitibi be.

⁸“A baa, unda iki site acwur aser azurfa rijwe, kinjo uwae-yi ama yag byinn, awu u nde rimang? Awu u teya wu ta-wu be. Awu u bae urwa u fen kusog-wu u sha wu sku se ti awu a tu pu wu awu.

⁹Kiye ti awu ru ka kyá wu, awu u kunn arwan-wu ti ande ice-wu ba funn u ri te ba baa, ‘Ni tsen yae m utob ikyaen riyaen aser-m ti yag byinn ne ame kya pu m awu.’ ”

¹⁰Yesu ri baa, “Ayi si ahan ama atom Rimam ti apupwen ku tsen utob risu unde kinjo rikaen ti ku nde ikentitibi ti kafe isim ta ikentitibi-wu u kafe ba uwog Rimam!”

¹¹Yesu ri kyi cwucwo baa, “Unde iki ta atang u site anyisu ti arom ifaen.

¹²Uyin-wu ti kitinying ri te itse-wu baa, ‘Itse, kata na m kutunn-m uwae rifunn-fu.’ Itse-wu cwe u pu rifunn-wu ka na anyisu-wu aba.

¹³Isim usir iki, uyin-wu ti kitinying byir tag isu-wu meme, u ru yi uten ti fengo ti rwen. Ti awu ka sang atang, awu pu aser-wu wen kuskwab kuskwab risu iken ti utense.

¹⁴Isim ti awu wen tag pu wu iken-wu ti awu site, rimenn pu uten atang si-yi ti ti ri be. Rikaen ye wu, awu shanum ti iken ti awu u ci. Awu nwùnn tag ti rimenn.

¹⁵“Ikyaen yine, awu nwunn ru ka sha wande uwog unde iki ti uten atang. Unde wu tom wu ru ti wu na ru ka shi ingog-wu ti ta ufang.

¹⁶Rimenn ku wen wu, ka kwar ti awu ku sha ti wu u kub acwu ikyir ti rogo ti ingog ku ci, amaa ande iki sha na-ba awu iken iki ti awu u ci be.

¹⁷Ricwunnkyi-yi awu ru ba tang ira ti tinyang riyaen utob-wu baa, ‘Meme ande ti ku nde wande na itse-m uwae kununn ku ci ku kyaen, ama ame ku cwu rimenn ike!

¹⁸Ame u nwunn ru ka tu itse-m u ri te wu baa, “Itse, ame nde pu me ikentitibi uwe Rimam ti kutxuwe-fu.

¹⁹Ame ko-m ti fu u kunn m baa umbae-fu cwucwo be. Ame mbyae ajwo, nda m wande pangma unde ti ku nde na fu wande kiser.” ’

²⁰Ikyaen yine awu nwunn u kafe ku ru yi kununn. “Ti ite-wu nungye wu ku ba ti fengo ti rwen, risi ye wu. Awu ter ru, u ka wangshi wu, u ye wu bur utob.

²¹Umbae wu ri baa, ‘Itse, ame nde pu m ikentitibi uwog Rimam ti uwog-fu. Ame ko-m ti fu u kunn m baa, uyin-fu cwucwo be.’

²²Ama itse-wu kunn apyi-wu u ri te ba baa, ‘Ni ter ru ka pu arun-m ti nyang skeb tag ba si umbae-m wune. Ni sha kunyang ba fwa-wu kujwo, ti ni pu apwa ba tso wu afxen.

²³Isim ayine, ni ye umbae indag wen, ti ti nde ukwab u kam ashwu!

²⁴Umbae-m wune ti cwu mam cwu mam ru ba shwur pu wu. Awu yag byibyinn, ama tine a tu pu ba wu.’ A nwunn ku nde ukwab.

²⁵“Uyin-wu ti ndufu ta uwae risaen kiye ti inja-wu ru ba. Ti awu kafe ku ba yi kununn, awu sa sa sa ba ku fer kununn u fxen a ku byinn itang u ku se ise.

²⁶Awu kunn kinjo uwae apyi itse-wu u rang wu baa, ‘Iken yi si imi ti ande ku nde uwae kununn?’

²⁷Upyi wu ri te wu baa, ‘Inja-fu ti ru ba. Ayine si iken ti nde né itse-fu wen umbae indag ti rikem ikyaen ti, inja-fu kafe ba sang pu wu kununn ti kujimshwur.’

²⁸“Ama rinae ye umbae ti ndufu wune. Awu shaen baa, awu u sang ka-wu uwae kununn cwucwo be. Ama itse-wu ru ba jwam wu ti wu na ru yi kununn.

²⁹Awu ri te ite-wu baa, ‘Afu nung yi ama meme asang ti ame nde wande na fu pangma upyi u bom-m risu te fu ko tikiyib be. Meme iken yine ti ame nde, imi ti afu nde na m? Ko umbae mbawen ahan, afu nda-fu ame ti ame ti arwa-m ā tsen utob te atso be!

³⁰Ama umbae-fu awune ti pu rifunn-fu ru ka yaen mbub risu iyaen u ka kafe ba, afu ye umbae indag ti rikem wen na wu!’

³¹Itse-wu ri te wu baa, ‘Uyin-m, afu ta te m uwae kununn ike ko kiye titini, meme iken ti ame site si ana-fu.

³²Ama ati u nde kang ukwab u kam ashwu, ikyaen ti, inja-fu wune cwu mam, ama tine awu site unyang. Awu yag bibyinn, ama tine a tu pu ba wu.’ ”