Read kutep Luka 16 Bible Online

Luka 16 - kutep bible

Luka 16

¹Yesu ri te ande ti putsa-wu baa, “Unde ti rifunn iki ta atang u site unde ti ku jabci usu-wu. Ama a ri te unde ti rifunn wu baa, unde wune na pu aser usu yi na wen ku tag wu.

²Ikyaen yine awu kunn unde wu ira u rang wu baa, ‘Afu ku nde-fu rimang nee ame ku fxen ira risu-fu? Tsag te m iken ti afu ku nde te usu-m. Pwen meme iken ti afu wen ti isu ti afu jabci, ikyaen ti, wande-fu mam pu yi.’

³Unde ti ku jabci te usu yi kab ira uwae utob-wu baa, ‘Imi ti ame u nde tine? Itsekuru-m ku jae m ruye unju wande-m. Ame bom ko-m ti m u tom ritom be. Ame ku wae rukwae ti m u jwam iken.

⁴Enheen! Ame nung pu m iken ti ame u nde ti ande u kyangte m uwae kununn-ba kiye ti a jae pu ba ame wande-m ne.’

⁵Awu kunn meme ande ti itsekuru-wu ku byib ba ripab, kinjo, kinjo. Awu rang unde ti kucang baa, ‘Itsekuru-m ku putsa fu imwa?’

⁶Unde wu ri baa, ‘Awu ku putsa m ripab kindob kukwer mae itsong.’ Awu ri te unde wu baa, ‘Iken ti afu u pae ta ri. Sa risiti-fu som riben ti bae kukwer mae ifaen ka mbe rijwe.’

⁷Awu rang unde ti ifaen baa, ‘Afu ama re? Ana-fu si imwa?’ Unde wu ri baa, ‘Ana-m si ayaen awum ibae ukob ifaen.’ Unde ti ku jabci usu wu ri te unde wu baa, ‘Iken ti afu u nde ta ri, sa risiti-fu bae ukob kinjo ti mae ita.’

⁸Kiye ti itsekuru unde ti kufur wune ba nung iken yine, awu teb wu ikyaen itsab-wu, ama ikyaen ti awu ku kab ira risu usom ti som-wu uwe ike. Ayi si ahan uwog ande ti utense. Itsab-ba ti a ku nde tetso skeb pu yi ana ande ti uwog ti saen.”

⁹Yesu ri ama baa, “Ikyaen yine, ame ku ri te ni, ni ye arwan te ande uwae rifunn-ni utense wune, ikyaen ti, kiye ti rifunn yi a ba mam pu yi, a u kyangte ni uwae kununn-ni apupwen.

¹⁰Unde titini ti a nde iken uwae kubenti risu iken ti kpang, awu u nde kubenti uwae iken ti si yang-yi ama.

¹¹Ama tine, asiti ani a ku nde-ni iken ti kubenti uwae rifunn ti utense be, aye ti u cwe u sa rifunn ti kubenti na ani?

¹²Cwucwo, asiti ani a ku fur kufur uwae iken ti si ana unde iki, aye ti u cwe u nda ni iken ti si ana-ni?

¹³“Unde u nde tu-wu ti u si upyi na itsekuru ifaen be. Asiti awu a site itsekuru ifaen, awu u ye ure te kinjo u pyir ira ti ifaen; awu u nae risu riben ti kinjo uwae-ba u sae ru ti ifaen. Afu u nde tu-fu ti fu u si upyi na Rimam ti upyi rifunn ti utense ti kipaen kinjo be.”

¹⁴Aba ande ti kumbub Farisi si ande ti ku ye ure ti aser timambe. Ti aba fxen ira yine, a ku txir Yesu txir risu ira yi ti awu ri.

¹⁵Yesu ri te ba baa, “Ani ku sha ti ande na tang baa, ani na si ande ti tinyang, amaa Rimam nung pu wu riyaen utob-ni. Iken ti ande ku nung baa, ayi na si iken ti tinyang, uwe Rimam ayi si iken ti ku txi iyib.

¹⁶“A kwen na ande iken uwae Icwe Musa ti uwae ira na ande ti ku ya iskin ira Rimam, sa sa sa ba sang ti kiye na Yohana unde ti ku nde batisma. Sa ti kiye Yohana, a ku ri ira ti tinyang na Kujwokwe Rimam te ande. Unde titini ku kwab ti wu u sang kang atang.

¹⁷Amaa wande na icwe Musa yaen-yi khika be. Ayi u tom skeb ti apupwen ti riben u wur ru ti ti a fen beb ira kinjo rikaen ti a bae uwae Icwe Musa.

¹⁸“Unde titini ti a jae ru uwa-wu u ka mbe itishe, awu nae pu wu amae. Cwucwo, unde ti a mbe unda ti kata te ubaen-wu, awu nae pu wu amae ama.”

¹⁹“Unde ti rifunn iki ta atang ti ku kyae ijwe-wu te atupwa ti aser u som u ku ci u ku ngwa ko usir titini.

²⁰Unde ti rikaen iki ti rinyi-wu si Lazaru, ta atang ama. Abang sa wu rimenn ci tag. A ku ye wu som ufu kusog unde ti rifunn wu.

²¹Awu ku sha kob amumunn wuci ti unde ti rifunn ku sa tika. Mbapxu ku ba jang kob abang-wu ayi.

²²Usir iki unde ti rikaen wu cwu. Atom Rimam ti apupwen ye ra wu ru ka som te Ibrahim, uwog ukwab ti apupwen. Unde ti rifunn sa cwu ama, a sa wu nji.

²³Awu ru ka sang uwae rikaen ti ken tag uwog urwa. Ti awu te pu ayib tso u sae ti fengo ti rwen, awu nungye Lazaru som rinwan Ibrahim.

²⁴Ikyaen yine, awu kunn ira baa, ‘Itse-m Ibrahim! Sae m te ayibrisi ti tom Lazaru ti wu sa kukyikyin kujwo swae ra ambyi ru ba si m afxenjwin, be, ame ku cwu-m uwae urwa ike.’

²⁵“Ama Ibrahim ri te wu baa, ‘Uyin-m, tangsom te kiye ti afu som te unyang. Uwae utense Rimam nda tag fu meme iken ti tinyang, ama Lazaru tu itibi. Ama tine awu ku tsen utob-wu ike, afu ama ta uwae rikaen.

²⁶Ayi si-yi nyang ayine amam be. Kukwae tiyang ta kutampwa-fu te ti. Unde ta-wu ike ti u yen ru ka ukunn akwen be. Ayi nde fob-yi ti ande u nwunn uwe akwen yen ru ba uwog-ti ike be ama.’

²⁷Unde ti rifunn ri baa, ‘Itse-m, ame ku jwam fu, afu a cwe ira, tom Lazaru ti awu ā ru yi kununn itse-m,

²⁸uwog ti ameinja-m itsong ta atang. Awu ā ru ka fa ba kusen ikyaen ti aba ā ru ba-ba uwog ti ame ta atang ne be.’

²⁹Ibrahim ri te wu baa, ‘Musa ti ande ti ku ya iskin ira Rimam ta atang ti a u fa ameinja-fu kusen. Aba ā naa atong te ira ti aba ku ri te ba.’

³⁰Unde ti rifunn-wu ri baa, ‘Itse-m Ibrahim, ayine ko-yi be! A baa, unde iki na nwunn uwae iticwu na ru ka uwog-ba, aba ú ya ikentitibi ta tsi-ba tsi be.’

³¹Ama Ibrahim ri baa, ‘Asiti aba a fxen-ba Musa ti ande ti ku ya iskin ira Rimam be, ko unde iki a nwunn uwae iticwu u ru ka uwog-ba rimang, aba ú ru-ba kubenti u ya ikentitibi-ba ta-ba be.’ ”