Read kutep Luka 17 Bible Online

Luka 17 - kutep bible

Luka 17

¹Yesu ri te ande ti putsa wu baa, “Iken ti ku nda ande nde ikentitibi u ru ba kang, amaa kufaen Rimam u ta risu unde wu ti ku sa kumbwa ba.

²Unde ti kyaefa kinjo uwae anyisu tinying bane ti a nde ikentitibi, á baa, a na ye ricwo tiyang kya fa wu ukwae u sa wu jwunnsi uwae uyinn, ayine ú nyang siskeb!

³Ni tsi ti ujwin! “Asiti inja-fu a nde fu ikentitibi, fwan wu kibyag; asiti awu a ya ikentitibi-wu ta, yata na wu.

⁴Asiti awu a nde fu ikentitibi ka atsepu itsongfaen uwae usir kinjo, ko kiye titini ti awu a nde fu ikentitibi u ru ba ri baa, ‘Ame raen pu m, ame u nde-m cwucwo be,’ yata na kang wu.”

⁵Ande ti atom na Itsekuru-ti Yesu jwam wu baa, “Nda uwae kinjo-ti ti ā ko fufa.”

⁶Yesu ri te ba baa, “Ko uwae kinjo-ni a yib pangma isinn utong musita, ani u nde tu ti ni ri te kutuku tiyang wune baa, ‘Mbub nwunn ti ipab imbyi-fu ti ru ka yen ijwe-fu tsi uwae uyinn,’ awu u nde pangma ti ani ri.

⁷“A baa, uriki uwae-ni na site umbae ti kununn ti ku tom na wu ritom ko ku shi na wu iwen, ama kiye ti umbae wu a ka ru uwog wande ba uwae kununn, unde ti kununn u ri rimang te wu? Ko awu u ri te umbae wu ti wu na ru ba fife ba ci wuci-wu a?

⁸Iyee. Awu u ri-wu baa, ‘Ru ka nde wuci, ti kyae ijwe-fu, ti su ba na m, ti m ci u ngwa titawe fu ru ka ci ana fu be a.’

⁹Cwucwo, unde ti kununn ku nde na umbae ti kununn-wu fxaefa isim ti upyi-wu a nae risu riben te ira-wu a.

¹⁰Ayi ā si ahan ama uwog-ni, kiye ti ani a nde mam pu ni wande ti a nda ni, i nyang skeb ti ni ri baa, ‘Ati si anyisu kununn ti ukaen. Ati nde nyang iken ti a tso ti amam!’ ”

¹¹Ti Yesu nwunn u kyang ku ru yi Urushelima, awu ru ba ru tsa ice ti kata uten Samariya ti Galili.

¹²Ti awu ku sisang imbae uten iki, awu tu ande rijwe ti site ti kicaeb ikum. Aba tsi ti fengo ti rwen

¹³u taen ira baa, “Yesu, Itsekuru-ti! Nung ti te ayibrisi!”

¹⁴Yesu nungye ba u ri te ba baa, “Ni ru ka uwog akwen Rimam, ti aba ā myae rimenn-ni.” Aba ande ti kicaeb ikum bane nwunn ku ru. Ti aba nwunn ku ru, kicaeb-ba yagta.

¹⁵Kinjo uwae-ba, kiye ti awu nung kicaeb-wu yagta pu yi, awu kafe ba ti isim u ku teb Rimam ti afxenjwin ti ribom.

¹⁶Awu ru ba jwunn ikyig uwe Yesu, ku tso wu fxaefa. Unde wu si urae Samariya, ti Mbayawuda ku saeruru.[9]

¹⁷Yesu rang baa, “A si-ba ande rijwe ti tu itinwangru uwae kicaeb-ba be a? Amaa itsongnje ti tsitsi ta-ba aka?

¹⁸Imi ti nde itawe kum unde ti rikyen wune kinjo-wu ti kafe ba ku tso Rimam fxaefa-wu?”

¹⁹Tiri Yesu ri te wu baa, “Sunwunn ritsen ti fu ru-fu iken-fu. Uwae kinjo-fu nwangru pu wu afu.”

²⁰Ande ti kumbub Farisi iki rang Yesu ira baa, isinn ti kujwokwe Rimam na u ru ba bara? Awu ri te ba baa, “Kujwokwe Rimam u ru ba-yi ti fengo ti ande u nungye itiba-yi atang be.

²¹Unde iki u ri-wu baa, ‘Ni sae ike, awu ta ri’ ko, ‘Ni nung, awu ta uwe akwen ta ri’ be. Kujwokwe Rimam ta kutampwa-ni tine.”

²²Isim ayine Yesu ri te ande ti putsa-wu baa, “Usir ku ba ti ani u ba sha ti ni u nung ayib Umbae Unde, ko uwae usir kinjo amam, amaa ayi u nde fob-yi be.

²³Ariki u ri te ni baa, ‘Ni sae, awu ti ta uwe akwen,’ ko ‘Ni nung, awu ti ta ri.’ Amaa ni ruye ka-ni uwog iki ti ni ka sha wu atang be.

²⁴Pangma ti imam ku jaen wur apwa apupwen, u ku nda apupwen meme tsi farang, ru iyenkyab ne ka kwer iyen ikyaeb akwen. Ti mbwe-yi ama usir ti Umbae Unde u kafe ru ba.

²⁵Ama awu tawe u ngwa kang rikaen ko tag. Ande ti utense wune u sae ru wu.

²⁶Iken ti nde kiye na Nuhu kute, si si ayi ti u nde kiye ti Umbae Unde u ru ba.

²⁷Kiye Nuhu, ande som kunn ku ci u ku ngwa, arom te anda ku mbe atso sa sa sa ba sang ti usir ti Nuhu sang uwae kuyae-wu. Ama tiri, upwen tsa munn kyi uwog u wen tag ba meme.

²⁸Cwucwo, ayi u nde pangma ti ayi nde kiye Lotu kute. Ande som kunn ku ci ku ngwa, ku jab kijab-ba u ku tom ritom-ba.

²⁹Ama usir ti Lotu nwunn u ya uten ti Sodom ta, urwa ti atxom ti ku tutwen[10] sī apupwen ba twenji ba meme.

³⁰“Kubenti, usir ti Umbae Unde u ru ba tso risu-wu, awu u kpugfa ba ahan ama.

³¹Usir wu, unde ti ta usen rukub ā si ba-wu riben ikyaen ti wu u pu isu-wu ti ta uwae kusog be. Unde ti ta uwae risaen ufang ama ā ru ba-wu kununn cwucwo be.

³²Ni tangsom ti iken ti tu uwa Lotu!

³³Unde titini ti a kwab baa, awu na u txin ijwe-wu txin, awu u yag byinn, amaa unde titini ti a sae ru ijwe-wu, awu u nwangru.

³⁴Ame ku ri te ni, utitang usir ti Umbae Unde a ba pu wu, ande ifaen u nae te atso ijwe iken ti nae, a u ye ra kinjo nwunn u ya itifaen ta ti atang.

³⁵Ande ifaen u ku pwa awum te atso ricwo, a u ye ra kinjo nwunn u ya itifaen ta.[11]”

³⁷Aba rang wu baa, “I si aka ti iken yine u nde?” Yesu ri te ba baa, “Uwog ti rukom a nae atang si uwog ti indo ku ru ba funn atang.”