Read kutep Luka 19 Bible Online

Luka 19 - kutep bible

Luka 19

¹Yesu nwunn sang fe yi uten Jeriko u ka ru tsa atang ku ru.

²Unde iki ta atang, rinyi-wu si Zaka. Awu si unde ti uwe ande ti ku mbe aser ukwe u si unde ti rifunn.

³Awu ku kwab ti wu nung kang Yesu ti ayib, amaa ikyaen ti awu si unde ti kipyir, awu tu fob-wu riyae ti awu u sae Yesu be ikyaen ti ande ti putsa Yesu ko pang-ba.

⁴Ikyaen yine awu ter inyae uwe, u ka tso kutuku kuyae ikyaen ti Yesu a ba ku ru ku tsa umbyi kuyae atang, awu na u sae wu.

⁵Kiye ti Yesu ru ba sang umbyi kutuku wu, awu txaen ayib tso u ri te Zaka baa, “Zaka, si ba fife, yaka ne ame u sang kang kununn-fu.”

⁶Zaka si ba yi riben fife u ba kyangte Yesu uwae kununn-wu ti utob titsen.

⁷Ande ti ta atang meme sae iken yine u nwunn ku pwen unju te atso baa, “Unde wune ru ka sang rikyen kununn unde ti ku nde ikentitibi.”

⁸Ti aba ta uwae kununn atang, Zaka fa sunwunn ritsen u ri te Yesu baa, “Itsekuru, kubenti, ame u kata rifunn-m ambub ifaen, u sa kumbub kinjo ka na ande ti rikaen. Asiti uwae wande-m ame ci iken unde iki tikong ame u pae na wu iken-wu ti atang ka atsepu inje.”

⁹Yesu ri baa, “Yaka ne unde wune ti kununn-wu meme nwangru pu ba, ikyaen ti, awu ama si umbae Ibrahim.

¹⁰Umbae Unde ru ba ikyaen ti wu u ba sha ande ti yag byibyinn u nwangru ba.”

¹¹Kiye ti Yesu ri ira yine te ande ba, aba kyang ku ba fer ti Urushelima. Ande ba ku kab ira baa, ayi na u tsi-yi tsi be ama a na u ye Kujwokwe Rimam tsi.

¹²Ikyaen yine awu sunn na ba ira iki baa, “Kiye iki unde iki ti a mbae wu kununn ti tinyang nwunn ru uten ti fengo ti rwen ikyaen ti unde ti uwe uten atang na nda wu kuko na ukwe. Awu a tu pu wu kuko-yi awu na u kafe ba-wu ti uten-wu.

¹³Ti awu ta itiru, awu kunn ande rijwe uwae apyi-wu ru ba, u ka na ba aser. Ko umbae titini tu aser iki ti kuko.[12] Awu ri te ba baa, ‘Ni kafe ajwo te yi se ti ame a ru ba.’

¹⁴Amaa ande ti uten-wu cwe-ba ira-wu be. Aba tom ande jae rifab-wu ti a na ru ka ri te unde ti uwe uten baa, ‘Ati ku sha-ti ti unde wune ā si ukwe-ti be.’

¹⁵“Amaa, a ka nae unde wu ukwe, awu ka kafe ba. Ti awu ka ru ba pu wu, awu kunn byir apyi-wu ti awu kan na ba aser ikyaen ti wu u nung iken ti aba tu som tsa risu aser ti aba mbe.

¹⁶Utikucang ru ba tsi u ri baa, ‘Itsekuru, ame kwab tu aser som tsa risu aser ti ame mbe, ka atsepu rijwe.’

¹⁷Awu Itsekuru-wu ri te wu baa, ‘Usuko umbae! Afu kwab pu fu! Ikyaen ti afu nde iken-fu ti uwae kubenti risu iken ti pang, ame u nda fu u ta risu uten rijwe.’

¹⁸Umbae ti putsa sunwunn u ri baa, ‘Itsekuru, ame kwab tu aser som tsa risu aser ti ame mbe, ka atsepu itsong.’

¹⁹Awu ri te umbae wune baa, ‘Afu u ta risu uten itsong.’

²⁰Umbae iki cwucwo ru ba ri te wu baa, ‘Itsekuru, aser ti afu nda m ta ri. Ame pu yi tam nyinyang ijwe kutupwa.

²¹Ikyaen ti, ame ku kyen ikyenricwu-fu, ira-fu caeb pang-yi. Iken ti si-yi ana-fu be afu ku sa-fu sa. Afu ku bunn uwog ti afu tom-fu be.’

²²Itsekuru-wu ri te wu baa, ‘Afu umbae titibi! Ira ti afu ri tso ne ye pu yi afu. Afu nung pu fu baa, ira-m na caeb pang-yi ama ame na ku sa iken ti si-yi ana-m be na ku bunn uwog ti ame na tom-m be,

²³ama imi ti nde titawe afu sa kiser wu nae-fu banki be? Á baa, afu na nde ayine, ame ú tu pu m iya aser-m fa ti iken iki risu-yi.’

²⁴Isim yine itsekuru-wu ri te ande ti tsi atang baa, ‘Ni mbe ra kiser wu kujwo-wu ti ni nda umbae ti site ayaen aser kuko.’

²⁵Aba ri te wu baa, ‘Unde tiyang, mbaa, awu site pu wu rijwe re!’

²⁶Awu ri te ba baa, ‘Ame ku ri te ni, unde titini ti site iken, a u si na kyi wu cwucwo, amaa, unde ti site-wu iken be, ko iken kpang ti awu site, a u shir mbe ra wu uwog-wu.

²⁷Ama aba ande ti rika-m ti ku sha-ba ti m na si ukwe-ba be ne, ni ru ka pu ba ru ba ike ti ni wen ba uwe-m.’ ”

²⁸Isim ti awu ri mam ira yine, awu nwunn, u pu uwe ku tso yi Urushelima.

²⁹Ti awu ru ka ye Betifaji ti Betani, ti ta fifer ti umbyi Rikwen Zetunn, awu tom atugbug-wu ifaen ru uwe.

³⁰Awu ri te ba baa, “Ni ru yi uwae uten ti ta uwe akwen. Kiye ti ani a ru ka sang uwae uten atang ani u nung umbae ikyinnsu kya tsi atang. A tso ji-ba wu khika be. Ni saen wu ti ni tae wu ru ba ike.

³¹Asiti unde iki a rang ni, iken ti nde itawe ani ku saen wu, ni ri te wu baa, Itsekuru na ku sha ti wu u nde wande te wu.”

³²Aba nwunn ru u ka nung iken yi meme pangma ti Yesu ri te ba.

³³Kiye ti aba ku saen umbae ikyinnsu wu, ande ti ikyinnsu wu rang ba baa, “Imi ti nde ani ku saen wu saen?”

³⁴Aba ri baa, “Itsekuru ku sha ti wu na nde wande te wu.”

³⁵Ama a saen wu u tae ru ka na Yesu. Ti aba ru ba sang, aba pu atupwa-ba ta isim ikyinnsu wu u ye Yesu tso ka som tsa atang.

³⁶Ti awu tso ikyinnsu wu ku ru, ande ku nda wu kuko u ku pu atupwa-ba ta fengo uwe-wu.

³⁷Ti awu ru ba ku fer Urushelima, uwog ti fengo si yi ikyaeb ti Rikwèn Zetunn, meme ande ti putsa wu nwunn ku taen ira ku nde Rimam fxaefa u ku teb wu ikyaen meme iken tiyang tiyang ti ku fur ayib ti awu nde ti aba nung.

³⁸Aba ku ri baa, “Kujimshwur ā ta apupwen. Kuko ā si ana Rimam! Itinyang ā si ana Ukwe ti ku ba yi rinyi Itsekuru.”

³⁹Tiri ariki uwae kumbub na Farisi sa ra unju tso u jwam Yesu baa, “Unde tiyang, ri te ande ti putsa fu ti aba ā ri-ba itso ira yine be.”

⁴⁰Yesu ri baa, “Asiti aba a bwe tag skirr ama, ame ku ri te ni, atxom ti ta ne u taen ira u teb rinyi-m.”

⁴¹[13] Ti awu ru ka fer Urushelima, awu pu ayib sae uten wu, ama aten si wu ayib.

⁴²Awu ku jwub ku ri baa, “Á baa, yaka ne ani na nungye iken ti ku sa kujimshwur ba, Ayi ú nyang! Amaa, iyee! Ani u nungye-ni cwucwo be.

⁴³Ikyaen ti, usir ku ba ti ande ti rika-ni u ru ba pakob ni. Aba u mbye ukoh pakob uten-ni ti rikob. Ani u ruye tu-ni atang be.

⁴⁴Aba u twenji uka-ni fa ti ande ti ta uwae-yi meme. A u rug mbub tag asog-ni meme u twenji tag ni ikyaen ti, kiye ti Rimam ru ba uwog-ni, ani nungye-ni be.”

⁴⁵Ama tiri Yesu nwunn u sang uwae uten u ru yi Kusog Rimam tiyang u ka jae ru ande ti ku jab ci ti iken atang.

⁴⁶Awu ri te ba baa, “A bae uwae Kutsingken Rimam baa, ‘Kusog Rimam u si kusog ti ande ku jwam Rimam atang.’ Amaa ani sa wu kafe-ni uwog ti ande ti riyib ku tam atang.”

⁴⁷Yesu kwen na ande iken uwae Kusog Rimam tiyang ti usirsir. Akwen Rimam tiyang ti ande ti ku kwen na ande ira Icwe ti ande ti uwe ande meme ku kwab ti a u wen wu,

⁴⁸amaa aba tu-ba riyae ti a ye wu be, ikyaen ti, meme ande som kunn ku fxen wu. Meme-ba ku sha ti a u fxen tag ira yi ti awu ku ri.