Read kutep Luka 2 Bible Online

Luka 2 - kutep bible

Luka 2

¹Uwae kiye wune, Ukwe Kaisar Agusita sa icwe ruye baa, ande ti utense meme na ru ba ti ande ti uwe uten na bae rinyi-ba.

²Ayine si ande ti pwen ti kucang ti aba nde. A nde yi kiye ti Kiriniya si gomna na uten ti Siriya.

³Unde titini kafe ru ti uten-wu ikyaen ti wu na ka nda ba rinyi-wu ikyaen na ande ti pwen yi.

⁴Yusufu ama nwunn Nazareti ti ta uten Galili, u ru yi Betilami ti ta uten Yawudiya, uwog ti a mbae Ukwe Dawuda atang, ikyaen ti, awu ta uwae rishi Dawuda.

⁵Awu ku ru ti wu na sa rinyi-wu ru ka na ande ti ku pwen ande. Awu te uwa-wu Mberimu putsa atso. Kiye wune, Mberimu site rishwu.

⁶Kiye yi ti aba ta atang, Mberimu sang umbae ti pwe, ikyaen ti, rishwu-wu ben mam ti wu mbae umbae.

⁷Awu mbae umbae ti urom, umbae rifen-wu, u pu atupwa umbae ibyan burkyi wu u sa wu nae fa uwae kupam ti asinn ku ci wuci-yi atang, ikyaen ti, uwae kusog rikyen atang uwog ta-yi ti a u sang atang be.

⁸Uwae uten wu, ande ti ku shi mbawen ta atang. Aba nae fuyen na uten wu ku nungkyi asinn-ba utitang.

⁹Ti aba u nunung, atom Rimam sī ba tatso risu-wu uwog-ba, ama riyinn na Itsekuru pakob ba. Ikyenricwu ye ba si-yi ti ti ri be.

¹⁰Atom Rimam ri te ba baa, “Ni kyen-ni ikyenricwu be, ikyaen ti, ayi si ira ti tinyang ti ame sa ba ku na ni roo! Ayi si ira ti u nda ande meme patag tsen utob.

¹¹Yaka ne uwae uten na Ukwe Dawuda a mbae na pu ba ani unde ti u nwangru ni. Awu ti si Unde wu ti Rimam Tsab Tsi! Awu ti si Itsekuru-ti.

¹²Iken ti u nda ni nungye baa, ira yine na si kubenti ta ri. Asiti ani a ka pu ni, ani u nung umbae wu nae fa uwae kupam ti asinn ku ci wuci atang. A bur wu ti atupwa umbae ibyan.”

¹³Ti awu u nunung, atom na Rimam iki yang-ba akwen si ba tu atom wu ti tsi ne, aba ku teb Rimam ku ri baa,

¹⁴“Rurob ā si ana Rimam ti skeb tag patag. Kujimshwur ā ba uwog ande ti awu ku tsen utob te ba uwae utense.”

¹⁵Isim ti atom ba kafe tso yi apupwen u ya ba ta, ande ba ti ku shi asinn ri ira te atso baa, “Ti ru yi Betilami ti ti ru ka nung iken yi ti Itsekuru ri te ti ne.”

¹⁶Ikyaen ayine aba nwunn ti kufe u ru ka nung Mberimu ti Yusufu, ti umbae ibyan wu ti nae fa uwae kupam ara.

¹⁷Kiye ti aba nung mam pu ba umbae wu, aba tsag te aba Yusufu ira ti aba fxen uwog atom Rimam risu umbae wu.

¹⁸Meme ande ti ta atang, ti aba fxen ira yi ti ande ti ku shi iken ri te ba, ayib fur ba!

¹⁹Mberimu ti risu-wu sa ira yi meme tsi riyaen utob-wu u ku myae yi myae.

²⁰Ande ba ti ku shi iken kafe ru, u tsi kunn ti ku teb rinyi Rimam ikyaen meme iken ti aba fxen u nung, si ti mbwe-yi ti atom Rimam ri te ba.

²¹Uwae usir ti itsongta, a tsen na umbae wu kutxin u fwa rinyi-wu baa Yesu, rinyi ti atom Rimam ri te ba ti ti a kyaen-ba rishwu-wu khika be.

²²Kiye nde pu yi ti a kaa jwo saen ijwe-ba pangma ti Icwe Musa ri, ama aba tso yi Urushelima. Aba sa umbae wu tso yi atang ama, ikyaen ti aba sa wu ru ba tso Rimam.

²³A nde yine ikyaen ti, a bae uwae icwe Rimam baa, meme umbae ti kucang ti urom ti a mbae, a na sa wu na Rimam.

²⁴Aba ru ama ikyaen ti a kaa yerwen iken na Rimam pangma ti a ri uwae icwe na Rimam baa, “Imbae akwae ifaen ko imbae abeb ifaen.”

²⁵Unde iki ta Urushelima ti a ku kunn wu baa Simeyon. Unde wune si unde ti ku nde iken ti tinyang uwe Rimam ama som usom ti saen kyag u som ku ji unde ti u nwangru Isirela. Kusung ti Saen Kyag te wu ta tetso.

²⁶Ti kucang-yi Kusung Rimam tatso wu baa, awu na u cwu-wu be se ti awu a nung pu wu itiba na Unde wu ti Itsekuru-ti Rimam Tsab Tsi titawe.

²⁷Usir iki Kusung Rimam nda wu nwunn ru ba sang kusog Rimam tiyang. Ayi si sí kiye ti Yusufu ti Mberimu pu Yesu sang ba kusog Rimam ti a ba nde iken ti Icwe Rimam ri.

²⁸Simeyon ye ra umbae wu fa ajwo u teb rinyi Rimam baa,

²⁹“Itsekuru-m, yata ti upyi-fu ā cwu-wu tiri uwae kujimshwur pangma ti afu ri.

³⁰Ikyaen ti, ayib-m sae pu yi fengo itinwangru-fu

³¹ti afu kyae tsi ikyaen na ande ti utense meme.

³²Awu u si urwa ti u tatso ande ti si-ba ande-fu be fengo ti ana-fu. Ama awu u shir riyinn ba uwog ande-fu, ande Isirela.”

³³Ayib fur Yusufu ti Mberimu risu ira ti Simeyon ri risu umbae-ba.

³⁴Ama tiri Simeyon jwam itinyang na Rimam si ba risu-ba u ri te Mberimu, iya umbae wu baa, “Rimam tsab ra pu wu umbae wune ikyaen ti ande ti Isirela yang-ba na nwangru. Ikyaen na wu cwucwo ande yang-ba akwen ama u jwunnsi. Awu u si unde ti ku tso kuko na Rimam, amaa ande yang-ba akwen u rimbeb rinyi-wu,

³⁵ama ira ti kab ti ta utob ande kuko u nae ise. Afu ama, ayi u nde fu pangma a na ku ter fu kisim ti utob.”

³⁶Uwae kiye wu, unda ti ku ya iski ira Rimam iki ta atang ti a ku kunn wu baa, Anna. Itse-wu si Fanuwel ti rishi na Asher. Awu kyaen pu wu. Ti kucang awu nde asang itsongfaen te ubaen-wu itawe ubaen-wu cwu.

³⁷Isim ayine, awu som usom uwa icwu yine ka asang mae inje asu inje. Usirtaen ti utitang awu ku jwam Rimam, u ku fen Rimam u ku cwe unju uwae kusog Rimam tiyang.

³⁸Kiye ti a sa Yesu sang ba kusog Rimam, unda wune nde fxaefa na Rimam, u nwunn ku ri ira risu umbae wu te meme ande ti som ku ji usir ti Rimam na u sa ru ande ti Urushelima uwae rikaen.

³⁹Isim ti a nde mam pu ba iken ti a bae uwae Icwe Rimam, Yusufu ti Mberimu kafe ru ti uten Galili u ka ru fe kununn-ba Nazareti.

⁴⁰Umbae wu ser tso u bom. Awu ben ayib si-yi ti ti ri be, u tu risu tinyang uwe Rimam.

⁴¹Ko kusang titini, Yusufu ti Mberimu ku ru ka Urushelima ikyaen na Ukwab Itiyafe.

⁴²Kiye yi ti Yesu ka asang rijwe asu ifaen, aba nwunn tso yi Urushelima pangma ti aba ku nde kob.

⁴³Isim ti aba ci mam pu ba ukwab u nwunn kafe ku ru yi kununn, Yesu som-wu ti isim ti uwae Urushelima, ite-wu ti iya-wu nung-ba be.

⁴⁴Aba ku tang baa, awu na putsa pu wu kumbub ande iki ti kafe ku ru yi kununn ama. Ti aba kyang ikyin usir kinjo ba sang usir jwo ureb, aba sha rifab-wu uwae ameinja-ba ti ande ti ure-ba.

⁴⁵Amaa, aba tu-ba wu be. A kafe ba ti Urushelima, ku rang ku sha wu.

⁴⁶Isim usir ita ti a ku kyang ku sha wu, a ru ba tu wu uwae kusog Rimam. Awu som fa kutampwa ande ti ku kwen na ande iken, ku naa kutong ama ku rang ba ira.

⁴⁷Meme ande ti fxen wu nung ira yi ayi si iken ti ku fur ayib. Meme ande ti fxen wu, rijwen si ba ijwe ikyaen iken meme ti awu nungye, ti ira ti awu ku ri.

⁴⁸Kiye ti Yusufu ti Mberimu ru ba tu wu, ayib fur ba. Iya-wu rang wu baa, “Umbae, imi ti nde afu nda ti rikaen ahan? Ame ti ite-fu ndembeb utob ku sha fu ti kucang akwen.”

⁴⁹Awu ri te ba baa, “Ikyaen imi ti ani ku sha rifab m? Ani nung-ni ti ame u som kang uwae kusog Ite-m be a?”

⁵⁰Aba nungye-ba ira ti awu ri te ba ne be.

⁵¹Ama tiri awu nwunn u putsa ba si ba yi Nazareti. Awu nae risu riben te ba. Iya-wu sa iken yine meme tsi riyaen utob-wu.

⁵²Yesu ko ben. Ribom ijwe-wu ti ben-ayib-wu ko fufa. Ama awu tu risu tinyang uwog Rimam, ti uwog ande meme ko fufa ru yi uwe.