Read kutep Luka 21 Bible Online

Luka 21 - kutep bible

Luka 21

¹Yesu txaen ayib tso ritsen u nung ande ti rifunn ku pu rinyangwae-ba si uwae kitu Rimam u ku tso Rimam fxaefa-ba uwae Kusog Rimam tiyang.

²Ama uwa icwu ti rikaen ru ba atang. Awu pu ana-wu ayaen kobo ifaen ta.

³Tiri Yesu ri baa, “Kubenti ti ame ku ri te ni, iken ti uwa-icwu ti rikaen wune ta na Rimam skeb pu yi ana ande ti tsitsi meme.

⁴Ikyaen ti, ande bane ku ta iken kpang uwae rifunn yang-yi ti Rimam nda ba, amaa, uwa-icwu wune ti ta uwae rikaen nda Rimam meme iken ti awu site kujwo-wu.”

⁵Uwog wune ariki uwae ande ti putsa Yesu ku ri ira risu Kusog Rimam baa, a na mbye wu ti atxom tinyang u kyae nyang wu nyinyang ti iken ti ande nda Rimam. Ama Yesu ri te ba baa,

⁶“Meme iken ti ani ku sae ne, kiye iki ru ku ba ti ande u nung-ba ko kutxom kinjo risu uriki be. Meme-yi u kyaensi tag riben.”

⁷A rang Yesu baa, “Unde tiyang, isinn ti iken yine u nde? Imi ti u tso baa, kiye wu na ba pu yi ti iken yi u nde?”

⁸Yesu fa ba kusen baa, “Ni som te ujwin ikyaen ti unde iki ā kyaefa-wu ani fa be. Ande yang-ba akwen u ru ba yi rinyi-m baa, aba na si Unde ti Rimam Tsab Tsi. Cwucwo aba u ri baa, kiye wu na ba pu wu. Ni putsa-ni aba be.

⁹Ni kyen-ni ikyenricwu be. Kiye ti ani a fxen baa, ande na ku cwe-ba ira atso be u ku ta rika te atso, ni ndembeb-ni utob be. Iken yine u nde kang titawe, amaa ayi si-yi iken ti u tso ricwunnkyi utense khika be.

¹⁰“Uten ti uten u ta rika te atso. Akwe ti akwe u ta rika te atso.

¹¹Utense u kyi ijwe kyi fe uwog meme. Rimenn u pu uten ti tsotso. Acaeb u munn kyi uwog meme. Ani u nung iken apupwen ti u nda ande ikyenricwu ti iken ti u tso kuko Rimam ti ande nung-ba usir iki be.

¹²Ande u ye ni u nda ni rikaen titawe meme iken ti tsitsi yine u nde. A u pu ni ru yi asog Rimam-ba u ru ka pwen ni rikwen atang u pu ni ru ka kusog pursuna. Ikyaen na ira-m, a u shir ni ba tsi uwe akwe ti ande ti uwe uten.

¹³Ayine u si riyae ti ani u tu u ri te ande ira-m ti tinyang.

¹⁴Ni kab-ni uwae risu ira ti ani u ri kiye ti ani a ru ka tsi uwe-ba be,

¹⁵ikyaen ti, ame u sha na ni itinyang ti ben-ayib, ikyaen ti ko kinjo rikaen uwae ande ti rika-ni u tsi tu-wu uwe-ni ti wu u ci rika risu-ni be.

¹⁶Abitse-ni ti abiya-ni ti ameinja-ni, ti ande ti uten-ni ti arwan-ni u pu ni jabci na ande ti rika-ni. Aba u wen ariki uwae-ni.

¹⁷Ikyaen rinyi-m ande meme u sa ni khika.

¹⁸Amaa, ko ikyinn risu-ni kinjo u yag byinn-wu be.

¹⁹Asiti ani a yer-ni anying utob be, ani u nwangru.

²⁰“Kiye ti ani nung akyirten ru ba pakob Urushelima fa uwae, ani u nungye baa, ayi u tsi-yi tsi be a u byinn mbub wu si riben.

²¹Kiye ti ani a nung iken yine, ani ande ti uten Yawudiya, ni ter inyae tso yi rikwen ti ni ka titam. Ande ti ta uwae uten ā nwunn ruye kang uwae uten. Ande ti ruye pu ba uwae uten ā kafe sang-ba ti uwae uten cwucwo be.

²²Ikyaen ti, usir wune si usir ti Rimam u byinn ande kimbab atang. Ayine si ikyaen ti a u kumunn meme ira ti a bae risu usir rikwen uwae Kutsingken Rimam.

²³I si iken ti ku nde risi uwog anda ti site rishwu uwae kiye wu, ti anda ti ku nyám umbae ikyaen ti, rikaen ti u ru ba risu uten wune si-yi ti ti ri be. Rinae Rimam u ta risu ande bane.

²⁴A u cin wen ariki uwae-ba ti kisim. Ande ti uten ti iyen meme u ru ba ye ba ru usom apyi. Ande ti kufub u ba tsikunn ti ku byinn mbub Urushelima si riben, se kiye ti Rimam sa tsi na ba a mam pu yi.

²⁵“Kiye wu usir, ti ushaen, ti atitaen ti ta apupwen u tso iken ti ku fur ayib ti tsotso. Ikyenricwu u ye ambukwen ande utense. Ira ti kab-ba u shag faa ikyaen ambyi uyinn ti u kyeb tso ba mbub shag, ku túm ka ikyae ne ba ikyae ne.

²⁶Ande u pu cwu ikyaen ti aba ku kyen ikyenricwu ira titibi ti ru ku ba risu utense meme. Ikyaen ti, iken ti rurob ti ta apwa apupwen u kyi ijwe u ya fengo-yi ti kucang ta u putsa itishe.

²⁷Iken yine u nde itawe Umbae Unde u mbug ruye u si uwae kubyi ku ba ti riyinn Rimam, ti rurob.

²⁸Kiye ti iken yine a ru ba ku nde, ni fa sunwunn ritsen ti ni shir ra risu-ni nwunn ritsen ikyaen ti, itinwangru-ni kyang ku yaen pu-yi.”

²⁹Isim yine Yesu tsag na ba ira ti sunn iki baa, “Ni kwen iken uwog kutuku kututung ti ituku ti tsitsi.

³⁰Kiye ti ani a nung atsing-yi a shab ru ku ba ani nungye pu ni baa, ushaen upwen na kyang yaen pu yi.

³¹I si ahan ama, kiye ti ani a nung iken ti m ri ne ku nde, ni kab ye baa, Kujwokwe na Rimam na yaen pu yi ti ti ba.

³²“Kubenti ti ame ku ri te ni, iken yine meme u nde titawe ande ti tsi ti user ne u cwu.

³³Apupwen ti utense u wur ru ru, amaa ira ti tso unju-m u tsi kukunn.”

³⁴“Ni nung ijwe-ni nyinyang, be usom ti som ti ukaen, ti iken ti ngwa, ti rikaen utense wune u shir pu utob-ni ru, ama usir wu u ba kpugfa ni fa pangma kutxae.

³⁵Ikyaen ti, usir wu u ru ba kang uwog ande meme ti ta uwae utense patag.

³⁶Ni tsi ti ujwin ko kiye titini. Ni jwam Rimam ti wu nda ni ribom ijwe ti ni nwangruye uwae iken yine meme ti ku ba, ti ani u ru ba tsi kutxuwe Umbae Unde.”

³⁷Uwae kiye wune Yesu ku kwen na ande iken Kusog Rimam tiyang. A ba ye ureb awu ku ruye uwae uten u ku tso ka nae rikwen ti a ku kunn wu baa Rikwen Zetunn.

³⁸Kiskinn fifae ti usirsir ande ku ru ka som Kusog Rimam ikyaen ti a na fxen ira ti awu u kwen na ba.