Read kutep Luka 22 Bible Online

Luka 22 - kutep bible

Luka 22

¹Kiye na ukwab tiyang na Mbayawuda ta ajwo. Ayi si ukwab ti a ku kunn wu baa, Ukwab Itiyafe, nee a ku ci buredi ti a nde-ba yi te yisiti be.

²Akwen Rimam tiyang ti ande ti ku kwen na ande Icwe Rimam ku kwab ku sha fengo ti kitam ti a wen Yesu, ikyaen ti, ikyenricwu ande ye ba.

³Tiri Shetann sang utob Yawuda ti a ku kunn wu baa Iskariyoti, kinjo uwae ande ti putsa Yesu rijwe asu ifaen.

⁴Awu nwunn u ru ka yer unju te ande ti uwe na akwen Rimam te ande ti ku nungkyi Kusog Rimam u te ba sha fengo ti wu nde u sa Yesu jabci na ba.

⁵Ande ba tsen utob ti ira-wu ayi u yer unju baa, aba na u nda wu aser.

⁶Ikyaen yine awu cwe u sha riyae ti wu u ye Yesu na ba kiye ti ujwunn ande a ta-ba atang be.

⁷Usir ru ba pu wu ti a u wen imbae mbawen ikyaen Ukwab buredi ti yisiti si-yi atang be.

⁸Yesu tom Bitrus ti Yohana ru uwe u ri te ba baa, “Ni ru ti ni ka nde wuci na ukwab tsika ti, ti ati u ba ci.”

⁹Aba rang wu baa, “Aka ti afu ku sha baa, ati na ru ka nde wuci yi atang?”

¹⁰Awu ri te ba baa, “Ni nung! Kiye ti ani a ru ka sang pu ni uwae uten, ani u nung unde iki su kitutong ambyi ru ba tu ni. Ni putsa wu ru fe yi kununn uwog ti awu a ru ka sang atang.

¹¹Ni ri te unde ti kununn wu baa, ‘Unde ti uwe ku rang fu baa, aka ti ame te ande ti putsa-m u ci wuci ukwab atang?’

¹²Unde wu u tatso ni kusog ti apupwen tiyang ti a kyae wu nyinyang. I si uwog ti ani u kyae iken meme tsika ti.”

¹³Aba nwunn ru u ka tu meme iken yi pangma ti Yesu tsag te ba u nde wuci ukwab yi tsi.

¹⁴Ti kiye ti a ci wuci nde pu yi, Yesu ru ka som uwog wuci te ande ti putsa-wu.

¹⁵Awu ri te ba baa, “I tsi m ti utob ting ting ti m ci kang wuci ukwab yine te ni titawe ame u sang uwae rikaen-m.

¹⁶Kubenti ti ame ku ri te ni, ame u ci-m Ukwab Itiyafe iki cwucwo be, se kiye ti ati u ru ka ci Ukwab Itiyafe ti kubenti uwae kuru Rimam apupwen.”

¹⁷Tiri Yesu sa kitu ambyi anam u nde fxaefa na Rimam u ri baa, “Ni mbe ayine ti ni kan te atso.

¹⁸Kubenti, tsikunn ike ru fe yi uwe ame u ngwa-m ambyi anam iki cwucwo be, se kiye ti Rimam a ru ba nae ukwe-wu.”

¹⁹Isim ayine, awu sa buredi u nde fxaefa na Rimam, u nyangta wu u pu na ba u ri baa, “Awune si rimenn ijwe-m ti ame sa ku na ni. Uwe ike ni nde pangma ti ame ku nde ne, ti ni tangsom te m.”

²⁰Isim ti a ci pu ba wuci ama, awu txi ambyi anam fa kitu u ri baa, “Kitu ambyi anam yine ku tso unju ti yer tishe ti Rimam yer te ni. Ame sa anying-m yaen mbub ikyaen-ni ti ayi ā tso baa, unju ti yer yi na si kubenti.

²¹“Amaa ani sae! Unde ti u sa m jabci som te m risu tebur ike.

²²Rimam sa tsi pu wu baa, Umbae Unde na u cwu kang, amaa, ayi u beb timambe uwog unde wu ti u sa wu jabci.”

²³Aba nwunn ku rang atso baa, aye uwae-ba ti u nde iken yine bara?

²⁴Kiye wune ama, aba nwunn ishaen te atso baa, aye uwae-ba ti na skeb patag bara.

²⁵Yesu ri te ba baa, “Akwe na ande ti nung-ba Rimam be tso kob kuko risu ande-ba. Ariki ama ku nda ande-ba kunn ba baa, ande ti ku ndeya uten.

²⁶Amaa ayi ā si-yi ahan uwog-ni be. Uwog-ni unde ti skeb ti tag ā si pangma umbae ti ricwunnkyi, unde ti uwe ā si pangma upyi.

²⁷Aye ti siskeb, unde ti kununn ti som ku ci wuci ree, re upyi ti ku sha wuci ba na wu? I si-yi unde kununn ti skeb be a? Amaa, ame som te ni pangma unde ti ku kuku.

²⁸“Ani ti si ande ti som te m ti ti kucang u nung pu ni rikaen ti ame ngwa.

²⁹Tine, pangma ti Itse-m nda m nae ukwe, ame ama u nda ni nae ukwe.

³⁰Kiye ti ame a nae ukwe, ani u ci u ngwa te m uwae kuru-m. Ani u som tsa atxom ukwe u pwen rikwen risu kumbub rijwe asu ifaen na anyisu Isirela.

³¹“Siman! Naa kutong! Shetann mbe pu wu riyae ti wu skae ni pangma ti unda ku skae ru ifwen uwae ayaen awum.

³²Amaa ame jwam Rimam ikyaen-fu ikyaen ti fu kafe-fu ti isim be. Ama kiye ti afu a kafe ba sang pu fu fengo, ri bom ameinja-fu utob ama.”

³³Bitrus ri baa, “Itsekuru, ame cwe pu m ti m te fu ru kaa kusog pursuna tetso. Ame te fu u cwu tetso.”

³⁴Yesu ri te wu baa, “Bitrus, ame ku ri te fu, mbakunn u ta-wu ira yaka be, se ti afu a shaen pu fu ame atsepu ita baa, afu na nung ji-fu ame usir iki be.”

³⁵Tiri Yesu ri te ba baa, “Ti kucang ti ame tom ni ru, ama ani ye su-ni ukyig ko ibae ko apwafxen be, ani shanum iken iki a?” Aba ri baa, “Iyee.”

³⁶Yesu ri te ba baa, “Amaa tine, unde ti site ukyig ko ibae awu ā sa ye su. Unde ti a site-wu te kisim be, awu ā sa kutupwa-wu jabci ti awu ā pu aser-yi ru ka jab kisim atang.

³⁷A u kumunn kang ira ri a bae risu-m uwae Kutsingken Rimam baa, ‘A sa wu tsi pangma awu na si kinjo uwae ande ti ku nde ikentitibi.’ Een, ira ti a bae risu-m kute ku nde tine.”

³⁸Anyisu afxen-wu ri baa, “Itsekuru, nung, kisum wen ifaen ta ri.” Awu ri te ba baa, “Ayi pang pu yi.”

³⁹Yesu nwunn u ruye uwae uten u ru yi Rikwen Zetunn, pangma ti awu ku nde kob. Ande ti imbyi-wu nwunn u putsa wu.

⁴⁰Kiye ti aba ru ba sang uwog ti awu ku ka kob atang, awu ri te ba baa, “Ni jwam Rimam be ani u jwunnsi uwae kumyae ti ku ba risu-ni.”

⁴¹Isim ira yine, awu nwunn u ya ba ta u ko ru kpang u ru ka kú riben u jwam Rimam baa,

⁴²“Itse, afu a cwe ira, sa ra kitu rikaen wune ru uwog-m. Amaa, iken ti afu ku sha, ayi ā nde.”

⁴³Uwog wune, atom Rimam iki si apupwen ba u ba nda wu kpakang.

⁴⁴Ama anying yer wu utob si-yi ti ti ri be. Awu jwam Rimam ti ribom-wu skeb kyi ti kucang. Atsam ru wu ijwe u ku jang si riben pangma anying.

⁴⁵Ti awu jwam mam Rimam, awu sunwunn u kafe ru ka tu ande ti putsa wu aba ku cwag kicwag, ikyaen utob ti beb.

⁴⁶Awu rang ba baa, “Ani kyang rimang ku cwag-ni kicwag? Ni sunwunn ti ni jwam Rimam ikyaen ti ani ā nwangru uwae itimyae ti ku ba risu-ni.”

⁴⁷Ti ira unju ti awu ku ri ne, kumbub ande iki ba sang. Yawuda, kinjo uwae ande ti putsa Yesu rijwe asu ifaen pu ba ru ku ba. Awu ko ru ka fer ti wu ye Yesu bur utob,

⁴⁸amaa, Yesu ri te wu baa, “Yawuda, afu u ye Umbae Unde jabci fengo utob ti ye bur a.”

⁴⁹Kiye ti ande ti putsa Yesu ti tsitsi nungye iken ti u nde, aba rang Yesu baa, “Itsekuru, ati pu rika kunn ba a. Kisim wen-ti ta ri.”

⁵⁰Kinjo uwae-ba nwaen ra ada u ru ka pye ra kutong ti kujwo rici na unde iki ti si upyi. Unde wu si upyi kukwen Rimam tiyang.

⁵¹Ama Yesu ri baa, “Ya ta. I pang pu yi.” Ama awu sa kujwo tekunn kutong unde wu, ribang wu ben kyi.

⁵²Uwog wune Yesu sae akwen Rimam tiyang, ti ande ti ku nungkyi Kusog Rimam, ti ande ndufu ti tsitsi ti ru ba ti a u ye wu ne, ama ri te ba baa, “Ani kyang rimang u pu iti ti asim ru ba pangma ame na si unde ti riyib?

⁵³Ti usirsir ame ku te ni som te atso Kusog Rimam, ani ye-ni ame be. Amaa, kiye wune si ana-ni ti ni nde wande-ni atang. Ayi si kiye na awu ukwe kufub.”

⁵⁴A ye Yesu u pu wu ku ru yi kununn kukwen Rimam tiyang. Bitrus ama putsa ba isim ti fengo ti rwen.

⁵⁵Ti aba ka sang pu ba atang, ariki jwu urwa cwe pu ba kutampwa utabshi. Bitrus ru ba som atang ama u ku wē urwa.

⁵⁶Umbae wandab iki ti ku nde wande kununn atang ru ba nungye wu som ku wē urwa. Umbae wandab wu pu ayib cwutsa Bitrus u ri baa, “Unde wune te Yesu ta te atso ama.”

⁵⁷Amaa, Bitrus txen-wu txen baa, “Ame nung-m awu be.”

⁵⁸A paji kpang unde iki nungye kyi wu u ri te wu baa, “Afu si kinjo uwae-ba.” Ama Bitrus ri te unde wu baa, “Si-yi ame be.”

⁵⁹Isim ti kiye kpang wur ru, unde iki tishe ka ru ba ri baa, “Kubenti, unde wune som te wu ikyaen ti, awu si unde ti Galili.”

⁶⁰Ama Bitrus ri te wu baa, “Ame nung nyang-m ira yi ti afu ku ri be.” Ti ritsen, ti awu tsi ku ri ira ne, mbakunn ta ira.

⁶¹Uwog ne, Itsekuru kafe ayib u sae Bitrus piin, ama Bitrus tangsom ti ira ti Itsekuru ri te wu baa, mbakunn u ta-wu ira utitang ne be, se iken ti awu Bitrus a txen wu txen ka atsepu ita baa, awu na nung-wu awu be titawe.

⁶²Bitrus ruye ka jwub ira aten si wu ayib.

⁶³Ande ba ti ku nungkyi Yesu ku txir wu txir u ku byinn wu iken.

⁶⁴A bur kyi wu ayib ti kutupwa u rang wu baa, “Aye ti byinn fu? Caen unde ti byinn fu!”

⁶⁵A txun tsi wu asu u ri ira titibi titibi ti tsotso risu-wu.

⁶⁶Ti ucwe fam yae, ande ndufu Mbayawuda ti ande ti uwe akwen Rimam ti ande ti ku kwen na ande Icwe ru ba funn u ka pu Yesu ru ba tsi uwe ande ti ku pwen rikwen.

⁶⁷Aba byib wu baa, “Ri te ti, afu ti si Unde wu ti Rimam Tsab Tsi ti u nwangru ti a?” Yesu ri te ba baa, “Asiti ame a ri te ni, ani u ru-ni kubenti uwae ira-m be.

⁶⁸Asiti ame a rang ni ira ama, ani u cwé-ni ame unju be.

⁶⁹Amaa sa tsikunn ike ru fe yi uwe Umbae Unde u som kujwo rici na Rimam ti skeb ti tag.”

⁷⁰Meme-ba rang wu baa, “Afu ti si Umbae Rimam wu a?” Awu ri baa, “Ani ri pu ni baa, ame si awu.”

⁷¹Tiri aba ri baa, “Ira-wu ayine pang-yi ati be a? Ati ti risu-ti fxen pu ti ira ti tso unju-wu ne.”