Read kutep Luka 23 Bible Online

Luka 23 - kutep bible

Luka 23

¹Meme kumbub ande ti funn atang nwunn u pu Yesu ru yi uwe Bilatus ti si gomna.

²Aba ka yer ira nae tsa wu atang baa, “Ati tu unde wune ku kyaefa ande-ti baa, aba na pae aser ukwe na-ba Kaisar be. Cwucwo awu ri baa, awu na si Unde wu ti Rimam Tsab Tsi, awu na si ukwe.”

³Bilatus rang Yesu baa, “Afu ti si ukwe Mbayawuda wu a?” Yesu cwe na wu baa, “Afu ri pu fu.”

⁴Tiri Bilatus ri te ande ti uwe ande ti ku fen Rimam ti ande ti tsitsi ti funn atang baa, “Ame tu-m riraen iki uwog unde wune be.”

⁵Amaa, aba tsikunn ti ti ri ti ribom baa, “Iken ti awu ku kwen na ande nda uten-ti meme kyirunn. Awu bag yi uwae Galili u nwunn kyang tag uwae uten Yawudiya meme. Tine awu sang ba pu wu ike.”

⁶Kiye ti Bilatus fxen ira yine awu rang ba baa, “Unde wune si unde ti Galili a?”

⁷Isim ti awu fxen baa, Yesu na ruye uten ti Herodus nae ukwe atang, awu pu Yesu tom ru ka na Herodus. Uwae kiye yi, Herodus ti risu-wu ta Urushelima.

⁸Ti Herodus nung Yesu awu tsen utob timambe, ikyaen ti awu fxen pu wu pu ira risu Yesu ti kucang akwen u ku kwab ti awu na sae Yesu ti ayib. Awu ku sha ti Yesu na nde na wu iken iki ti ku fur ayib ti awu na nung.

⁹Ikyaen yine awu rang Yesu ira ti tsotso, ama Yesu mbub na-wu awu unju be.

¹⁰Ande ndufu ti uwe na ande ti ku ten iken na Rimam te ande ti ku kwen na ande Icwe ko ru ba tsi uwe u yer tikong nae tsa Yesu ti ribom-ba.

¹¹Herodus ti akyirten-wu txir Yesu itxir u sae ru wu. A pu arun ukwe sī wu, u pu wu kafe ba na Bilatus.

¹²Bilatus ti Herodus si ande ti rika te atso ti kucang, amaa, usir wu aba kafe arwan atso.

¹³Bilatus kunn byir tag ande ndufu ti ku fen Rimam, ti akwe ti ande ndufu ti tsitsi

¹⁴u ri te ba baa, “Ani pu unde wune ru ba pu ni uwog-m u ri baa, awu na nde ku mbeb wu ande. Tine ame rang pu m awu ira ti ayib-ni ike u tu-m awu ti riraen iki uwae meme ira titibi ti ani ri risu-wu be.

¹⁵Herodus ama tu-wu awu te riraen iki be, ikyaen yine awu pu wu tom kafe ba na ti ti ike.

¹⁶Ikyaen na yine, ame u byinn wu kimbab amam u ya wu ta ti awu a ru.”[15]

¹⁷

¹⁸Ande ti funn atang meme taen ira tso ise baa, “Ni wen wu! Saen Barabas ta na ti.”

¹⁹Barabas si unde iki ti a pu sang pursuna ikyaen ti awu sa ufxaen si ande uwae uten u wen unde iki.

²⁰Bilatus ku sha ti awu na saen Yesu ta, ikyaen yine awu ri kyi ira te ande ba cwucwo.

²¹Amaa aba tsi kunn ku nyae ira baa, “Ni pu wu ka kwer.”

²²Bilatus rang kyi ba ti atsepu ita baa, “I si ira imi ti awu raen? Ame tu-m ira iki titibi uwog-wu ti a u wen wu be. Ikyaen yine ame u byinn nyang wu kimbab amam ti m ya wu ta.”

²³Ama aba tsikunn ira ti taen baa, a na pu Yesu na ru ka kwer risu kutuku ti cice. Ricwunnkyi-yi, a cwe ira ti taen-ba ayi.

²⁴Ikyaen yine Bilatus pwen Yesu rikwen iticwu, pangma ti aba ku sha.

²⁵Awu saen ta na ba unde wu ti aba ku sha, awu unde ti sa ufxaen si kutampwa ande u wen unde fa ti atang. Bilatus sa Yesu na ba ti aba na nde te wu iken ti aba ku sha.

²⁶A ye pu Yesu ru. Ti aba nwunn ru ku ye uwae uten, unde iki ti rinyi-wu si Siman, unde ti Kirene, ru ufang ku ba yi uwae uten. A ye wu u ye kutuku ti a kaa kwer Yesu atang nae tsa wu ukwae ti awu na su putsa Yesu isim.

²⁷Kumbub ande yang-yi putsa Yesu. Uwae-ba anda fa atang, aba ku jwub ku táe ikyaen-wu.

²⁸Yesu kafe uwe tag ba u ri te ba baa, “Ani anda ti Urushelima! Ni jwub-ni ira ikyaen na m be, ni jwub ikyaen risu-ni ti anyisu-ni.

²⁹Ikyaen ti, usir ku ba ti ande u ba ri baa, ‘Itinyang si ana anda ti mbae ji-ba anyisu be! Itinyang ama si ana anda ti nyam ji-ba anyisu be.’

³⁰Ikyaen ti, uwae kiye wu ande u ri te rikwen baa, ‘Mbub si kyi ti.’ Aba u ri te abab rikwen baa, ‘Burkyi ti.’

³¹A u ri ahan ikyaen ti, asiti a ku nde iken yine te kutuku ti tirisub, ayi u ba si rimang ti ituku ti ti wam?”

³²A ye pu ande iki ifaen ru te ba ti a ka kwer ba te Yesu. Aba ande ifaen bane si ande ti riyib.

³³Ti aba ru ba sang uwog iki ti a ku kunn baa Golgota, a sa Yesu kwer risu kutuku atang te ande ti riyib bane, kinjo ta kujwo rici, kinjo ta kujwo ife-wu.

³⁴Yesu jwam Rimam risu ande ti sa wu kwer baa, “Itse, yata na ba. Aba nung-ba iken yi ti aba ku nde be.” Aba pu atupwa-wu kan na atso yi fengo iticaen.

³⁵Ande tsi atang u ku sae, amaa ande ti uwe ku txir Yesu itxir baa, “Awu ku nwangru ariki, ni ya wu ta ti wu nwangru risu-wu, asiti awu a si Unde wu ti Rimam Tsab Tsi[16] u tom ba ti wu na nwangru ande!”

³⁶Akyirten txir wu itxir ama. Aba ru ba uwog-wu u ba txi na wu ambyi anam ti fifab

³⁷u ri te wu baa, “Asiti afu a si ukwe Mbayawuda, nwangru risu-fu!”

³⁸A bae ira iki ijwe kutuku risu-wu baa, “Awune si Ukwe Mbayawuda.”

³⁹Kinjo uwae ande ti riyib ba ti a pu kwer te Yesu txun Yesu asu baa, “Afu si-fu unde wu ti u nwangru Mbayawuda be a. Nwangru risu-fu te ati!”

⁴⁰Amaa unde ti ifaen fwan utikucang kibyag baa, “Afu ku kyen-fu Rimam be a? A pwen ti rikwen iticwu meme-ti,

⁴¹amaa, ana-ti, a pwen ti rikwen pang atang. Ati ku bunn iken ti ati tom. Ana-wu, awu nde-wu iken iki titibi be.”

⁴²Awu ri te Yesu baa, “Yesu, tangsom te me kiye ti afu a ru ba nae ukwe-fu.”

⁴³Yesu ri te wu baa, “Ame ku ri te fu, yaka ne, afu u te m ta tetso Kuru ti tinyang apupwen.”

⁴⁴Kiye ti usir ta kitaen pam pam pam, kufub si kyi uten atang meme.

⁴⁵Usir tsen-wu cwucwo be ba kwar ti usir kujwo ureb. Uwae Kusog Rimam, kutupwa ti a sa yer kyi Kusog Rimam katsen ifaen.

⁴⁶Ama tiri Yesu jwub ira ti tso ritsen baa, “Itse-m, ame sa kusung-m ku na fu kujwo.” Ti awu ri mam ira yine, awu cwu.

⁴⁷Unde ti uwe akyirten nung iken yi ti nde ne u teb rinyi Rimam u ku ri baa, “Kubenti, unde wune nde-wu iken titibi be.”

⁴⁸Ande ti tsitsi ti ru ba funn atang ti a na ba sae iken yine ama, aba kafe ru yi kununn ti utob ti ndembeb.

⁴⁹Meme ande ti nung Yesu ben ben, fa ti anda ti putsa wu ru Galili ba, aba tsi ti fengo ti rwen u ku sae iken yi.

⁵⁰Unde iki ta atang ti rinyi-wu si Yusufu. Awu si urae Mbaibrane, awu ta uten ti Arimateya. Awu si kinjo uwae ande ti ku pwen rikwen. Awu si unde ti kubenti ti ku nde iken ti tinyang.

⁵¹Awu som ku ji kiye ti Rimam u ba nae ukwe-wu. Ko ti awu si kinjo uwae na ande ti ku pwen Yesu rikwén, awu cwe-wu ira-ba ti rikwén-ba ti a ku pwen be.

⁵²Awu ru ka tu Bilatus u jwam rukom na Yesu.

⁵³Isim ti a cwe na pu ba awu, awu ru ka saen rukom Yesu si yi riben u sa kutupwa rukom bur wu u ye wu ru ka nae uwáe kutxú[17] ti a pab tsi u nji-ba unde atang khika be.

⁵⁴Usir wu si usir ti a ku kyae ijwe-ba ikyaen Usir ikyinn.

⁵⁵Anda ti putsa Yesu ru Galili ba putsa Yusufu ru u ka nung kuskab wu, ti fengo ti a sa rukom Yesu nae uwae uwáe kutxú.

⁵⁶Isim yine aba kafe ru ba ti yi kununn u ba jab kindob ti usu iki ti ku nung kuyang ti a u shin rimenn-wu te yi. Usir ikyinn aba pu nyang pangma ti Icwe ri baa, a na nde.