Read kutep Luka 24 Bible Online

Luka 24 - kutep bible

Luka 24

¹Ucwe fam-yi, usir ti kucang uwae kutsáb na ba, ti kiskinn fifae anda aba nwunn ti isu yi ti aba jab ye su ru yi kuskab Yesu.

²Aba ka sang atang, u tu kutxom ti burkyi uwáe wu kaen ru ka nae iyen.

³Aba sang fife uwae uwáe wu, amaa, aba tu-ba rukom Itsekuru-ti Yesu atang be.

⁴Ti aba tsi u nung-ba iken ti aba u nde be, ande ifaen iki ru ba tsi fer ba. Atupwa-ba tsen poriri u jaen wurwur.

⁵Ikyenricwu ye anda ba, aba ru ka ku riben. Ande ba rang ba baa, “Imi ti nde ani ku sha unde ti tsi user uwae ande ti cwucwu?

⁶Awu ta-wu ike be. Awu nwunn pu wu. Ni tangsom ti ira ti awu ri te ni kiye ti awu ta ti Galili baa,

⁷a na u sa Umbae Unde na kang ande titibi. Aba u kwer wu risu kutuku ti cice. Uwae usir ti fa ti ita awu u nwunn uwae iticwu ti unyang.”

⁸Tiri anda ba tangsom ira-wu ayi

⁹u kafe ru yi kununn u ru ka ri meme ira yi te ande ti putsa Yesu rijwe asu kinjo ti ande-ba ti tsitsi meme.

¹⁰Anda ba si Mberimu Magadalen, ti Yowana, ti Mberimu iya Yakubu. Aba ti anda iki ti tsitsi tsag ira yine ti atom na Yesu.

¹¹Amaa atom ba kab baa, ira ti anda bane na ri te ba na si ira ti ukaen. Aba ru-ba kubenti atang be.

¹²Amaa Bitrus fa sunwunn u ter inyae ru yi kuskab atang u ka pu ku u nung nyang atupwa amam. Isim yine awu kafe ru yi kununn u ku kab ira risu iken yine ti nde.

¹³Usir wu ande ifaen uwae-ba nwunn ku ru yi imbae uten ti a ku kunn baa, Emawusi ti tsi Urushelima ka atang ka lamba itsongfaen.

¹⁴Aba ku tsag rikaen risu meme iken yi ti nde uwae kiye wu.

¹⁵Ti aba ku ru ku tsag rikaen risu iken yi, Yesu ti risu-wu ko ba fer ba u putsa ku ru.

¹⁶Aba sae wu amaa ayib fur ba aba nungye-ba wu cwucwo be.

¹⁷Yesu rang ba baa, “Ani ku tsag-ni akaen risu imi?” Aba kyaetsi, u sae ayib kum utob ti beb.

¹⁸Kinjo uwae-ba ti rinyi-wu si Kileyopa ri baa, “A! A! Afu amam uwae ande ti ba Urushelima ti nung-fu iken yi ti nde usir ifaen yine be a?”

¹⁹Awu rang baa, “Iken yi si imi ti nde?” Aba ri te wu baa, “Iken ti a nde te Yesu unde ti Nazareti. Awu si unde ti ku ya iskin ira Rimam. Uwe ande ti uwe Rimam, awu si unde ti site kuko uwae ira-wu ti uwae wande-wu meme.

²⁰Akwen Rimam tiyang ti akwe ti ta risu-ti pwen wu rikwen iticwu u sa wu ru ka kwer risu kutuku.

²¹Ati ku tang baa, awu ti si unde wu ti ru ku ba ti wu ba nwangru ande ti Isirela! I si-yi nyang ayine amam be, usir ti yaka fa ti ita ti iken yi nde.

²²Ariki uwae anda ti ta te ti ru ba ri ira ti fur ti ayib. Aba nwunn ti kiskinn fifae ru ka kuskab,

²³ama a ru ka shanum rukom Yesu wu. Aba kafe ba u ba ri baa, aba na nung atom Rimam iki ti ri te ba baa, Yesu na nwunn pu wu ti unyang.

²⁴Ariki uwae-ti ru ka kuskab wu u ka nung iken ti anda ba ri, ayi si kubenti ara, aba nung-ba wu be.”

²⁵Yesu ri te ba baa, “Ani rob risu, ande-m! Ande ti ku ya iskin ira Rimam bae tag ira risu iken yine meme uwae Kutsingken-ba, ama utob-ni rob cwan, ani ru-ni kubenti atang fife be!

²⁶Unde wu ti Rimam Tsab Tsi ngwa kang rikaen titawe awu u tu kuko-wu.”

²⁷Tiri Yesu tsag te ba meme ira ti ta uwae Kutsingken Rimam risu-wu, bag ti ira ti Musa bae ru ka kwar ti meme ira na ande ti ku ya iskin ira Rimam.

²⁸Ti aba ru ba fer imbae uten ti aba ku ru yi atang, Yesu nde pangma awu na u wur ya fife.

²⁹Amaa aba ye wu tsi u ku yae wu baa, “Nae te ti ti ike, usir si yib pu wu, kufub si ku kyi pu wu.” Awu putsa ba sang ka som te ba.

³⁰Ti awu te ba som ku ci wuci te atso, awu sa buredi u jwam itinyang ru ba risu-yi u kanta yi na ba.

³¹Ti ritsen ayib-ba mbubta, aba nungye wu. Ama awu yag byinn ayib-ba. Aba nung-ba uwe-wu cwucwo be.

³²Aba ri baa, “Utob-ti ku kunn-yi tik tik kiye ti awu ku tsag akaen te ti u ku ri te ti ira uwae Kutsingken Rimam fengo akwen be a?”

³³Aba fa sunwunn ti ritsen u kafe ba ti yi Urushelima u ru ka tu ande ti putsa Yesu rijwe asu kinjo funn ti uwog kinjo ti ande ti putsa Yesu ti tsitsi.

³⁴Ariki ku ri baa, “Kubenti, Itsekuru-ti nwunn pu wu uwae kuskab! Awu tso risu-wu uwog Siman.”

³⁵Uwog ne, ande ifaen bane, tsag te ba iken ti nde ba fengo, ti fengo ti aba nungye Itsekuru uwae kiye ti awu nyangta buredi na ba.

³⁶Ti ande ifaen bane ku tsag te ba ira yine, Yesu ti risu-wu mbug ruye kutampwa-ba u kunnji ba ira baa, “Kujimshwur ā ru ba risu-ni.”

³⁷Ikyen ricwu ye ba, rijwen si ba ijwe, aba ku tang-ba baa, awu na si ricwu.

³⁸Amaa awu ri te ba baa, “Ani kyang rimang u ku kyen ikyenricwu? Imi ti nde ti ani ku kab uwae?

³⁹Ni sae afxen-m ti ajwo-m ti ni nungye baa, ayi na si ame. Ni sa kujwo tekunn m ti ni sae, ricwu site-wu amum ti akub pangma ti ani ku nung rimenn-m be.”

⁴⁰Awu ri ira yine u tatso ba ajwo-wu ti afxen-wu.

⁴¹Ko ti awu tatso ba iken yine meme, aba ru-ba kubenti uwae-yi be. Aba tsen utob, ama ayib fur ba fa atang. Awu rang ba baa, “Ani site wuci ti ci ike a?”

⁴²Aba nda wu iwag ti fufxab.

⁴³Awu sa ra wu u sa kub ti kutxuwe-ba atang.

⁴⁴Tiri awu ri te ba baa, “Iken ti ku nde ne si iken ti ame ri te ni kiye ti ame te ni ta tetso ti kucang, ti ame ri te ni baa, meme iken ti a bae risu-m uwae Icwe na Musa, ti uwae ira na ande ti ku ya iskin ira Rimam, ti uwae Kutsingken Akyang, ayi u si kang pu yi kubenti.”

⁴⁵Isim ayine awu mbubta ba riyaen utob ti a na nungye imbyi ira ti a bae uwae Kutsingken Rimam.

⁴⁶Awu ri te ba baa, “A bae uwae Kutsingken Rimam baa, ‘Unde wu ti Rimam Tsab Tsi u ngwa kang rikaen u cwu u nwunn uwae iticwu uwae usir ti fa ti ita.

⁴⁷Uwae rinyi-wu, a u ri te meme ande ti utense baa, aba na kafe isim ta ikentitibi ti Rimam na ya ta na ba. A u bag ira yine nwunn ti Urushelima ru fe yi ise.’

⁴⁸Ani nung pu ni iken yine ti ayib-ni.

⁴⁹Ayi u tsi-yi tsi be ame u tom na ni iken ti Itse-m yer unju risu-yi. Ama ni paji ti uwae uten ike, se usir ti ani a tu pu ni kuko Rimam si apupwen ba pu yi risu-ni titawe.”

⁵⁰Isim ayine awu pu ba ruye uwae uten ru ka fifer ti Betani u pu ajwo tso u jwam itinyang si ba risu-ba.

⁵¹Ti awu ku jwam itinyang si ba risu-ba, awu nwunn u ya ba ta, Rimam kyangte wu ku tso yi apupwen.

⁵²Aba fen wu u kafe ru yi Urushelima ti utob ti tsen.

⁵³Ko kiye titini aba ku ru ba ko Kusog Rimam u ku teb Rimam.