Read kutep Luka 9 Bible Online

Luka 9 - kutep bible

Luka 9

¹Awu kunn funn ande ti putsa-wu rijwe asu ifaen u nda ba kpakang ti kuko ti a na rwae ruye rijwen titibi meme, ti aba na nwangru ande ti kicaeb.

²Isim yine awu tom ba ru ti aba na ru ka ri ira Kujwokwe na Rimam te ande, ti aba na nwangru ande ti kicaeb.

³Awu ri te ba baa, “Ni ye su-ni iken iki uwae ikyin ti kyang-ni be, ko ukum, ko rikyig, ko wuci, ko aser. Ni sa kutupwa iki ye su-ni be.

⁴Kununn titini ti a kyangte ni atang, ni som ti kununn wu se usir ti ani a nwunn pu ni uwae uten wu.

⁵Ko aka ti a kyangte-ba ani be, kiye ti ani a ku nwunwunn uwae uten atang, ni fwer ibung afxen-ni si ba ti atang ti ayi ā tso ba baa, ira-ni iki na fa-yi atang be.”

⁶Tiri aba nwunn u ru tsa uwae imbae uten ti ta atang meme u ku ri te ande ira ti tinyang na Rimam u ku nwangru ande uwae kicaeb, meme uwog ti aba a ka atang.

⁷Kiye wune, Ukwe Herodus fxen tag iken meme ti nde. Ayib fur wu, ikyaen ti, awu ku fxen ariki ku ri baa, a na kunn shwur pu ba Yohana uwae iticwu.

⁸Ariki ama ku ri baa, ayi na si Eliya atom Rimam ti kafe ru ba ti unyang. Ande ti tsitsi ama ku ri ana-ba baa, ayi na si unde kinjo uwae ande ti ku ya iskin ira Rimam ti nwunn pu wu uwae kuskab.

⁹Herodus rang ijwe-wu baa, “Ame pye ra risu Yohana tika pu m, ama unde wu ti ame ku fxen ira risu iken ti awu ku nde na si kyi aye?” Ama awu kwab ti awu na nung Yesu.

¹⁰Ande ti atom ti Yesu tom ru kafe ru ba u ba tsag te wu meme iken ti aba nde. Isim yine, awu ye pura nyang aba amam ru yi imbae uten ti a ku kunn baa Betisaida.

¹¹Ti ande fxen baa, Yesu ti atom-wu na ru yi Betisaida, a nwunn u jae rifab-ba. Awu kyangte ba u kwen na ba ira risu Kujwokwe Rimam u nwangru ande ti nae kicaeb.

¹²Ru ba sang usir jwo ureb, ande ti putsa-wu ru ba uwog-wu u ba ri te wu baa, “Usir si ku te wu. Tē ande ba ti a ru yi anunn ande ti asaen ufang, ti a ru ka sha wuci ti uwog ti nae, ikyaen ti, iken iki ta-yi ike be.”

¹³Ama Yesu ri te ba baa, “Ani ti risu-ni, ni sha na ba iken ti ci.” Aba ri baa, “Ati site nyang abyi buredi itsong ti iwag ifaen amam. Afu ku sha ti ti na ru ka jab wuci na ba na meme ande bane a?”

¹⁴(Ande ti funn atang ka kumbub itsong.) Yesu ri te anyisu afxen-wu baa, “Ni nda ande ba ti a som uwae kumbub, kumbub. Kumbub titini ā si mae ifaen ru ka mbe rijwe.”

¹⁵Ande ti putsa-wu nde pangma ti awu ri te ba. A nda meme ande ba som riben.

¹⁶Yesu ye pu abyi buredi itsong yi ti iwag ifaen fa kujwo u txaen pu ayib tso yi apupwen u nde fxaefa na Rimam ikyaen na yi. Isim ayine awu kanta yi u pu na ande ti putsa-wu ti a na pu kan na ande.

¹⁷Meme-ba ci kyaen u num. Ama aba tob amumunn buredi ti tsitsi munn acika rijwe asu ifaen.

¹⁸Kiye iki ti Yesu ku jwam Rimam, ande ti putsa-wu amam te wu ta tetso. Awu rang ba baa, “Ande ku ri baa, ame na si aye?”

¹⁹A ri te wu baa, “Ande ku ri baa, afu na si Yohana unde ti ku nde batisma. Ariki ku ri baa, afu na si Eliya. Ariki ama ku ri baa, afu na si kinjo uwae ande ti ku ya iskin ira Rimam ti kute ti na nwunn uwae kuskab ti unyang.”

²⁰Yesu rang ba ama baa, “Ana-ni ama re? Ani ku tang baa, ame na si aye?” Bitrus cwe ira unju baa, “Afu si Unde wu ti Rimam Tsab Tsi.”

²¹Ama Yesu fwa ba kusen baa, “Ni ka tsag ira yine te ni unde iki be.”

²²Awu ri kyi cwucwo baa, “Awu Umbae Unde u ngwa rikaen ko timambe. Ande ndufu ti ande ti uwe na akwen Rimam ti ande ti ku kwen na ande Icwe Rimam u sae ru wu u pyir wu. A u wen wu. Uwae usir ti ita awu u nwunn uwae kuskab.”

²³Cwucwo Yesu ri te ba atang meme baa, “Unde titini ti a ku sha ti wu putsa m, awu ā pyir risu-wu, ti awu ā cwe ti wu ye kutuku ti cice tso ukwae-wu, u ba putsa m.

²⁴Unde titini ti a ku sha ti wu txen unyang-wu txen, awu u shanum te wu, ama unde titini ti cwe ti wu u shanum unyang-wu ikyaen ira-m, awu u tu unyang-wu ti atang.

²⁵Asiti unde a tu tag iken ti utense patag u shanum te unyang-wu, kujwojang-wu si imi?

²⁶Asiti unde iki a ku wae rukwae-m ti iken ti kwen-m, Umbae Unde u ba wae rukwae-wu ama kiye ti awu a kafe ba ti kuko na Kujwokwe-wu ti ana Itse-wu Rimam ti ana atom-wu ti saen kyag.

²⁷Kubenti ti ame ku ri te ni, ande iki ta uwae-ni ike ti u cwu-ba be, se ti aba a nung pu ba Kujwokwe Rimam titawe.”

²⁸Usir itsongta isim ti Yesu ri te ba ira yine, awu pu Bitrus ti Yohana ti Yakubu tso yi kitaen rikwen iki ru ka jwam Rimam.

²⁹Kiye ti awu ku jwam Rimam kutxuwe-wu kafe ku jijaen wurwur. Atupwa-wu tsen por por ku jaen wur wur ama.

³⁰Ti ritsen, ande ifaen ru ba tu wu u ku ri ira te wu. Ande ba si Musa ti Eliya.

³¹Aba si apupwen ba u ba ku ri ira te Yesu risu iticwu-wu ti awu u cwu uwae uten Urushelima, ti u kumunn kumyae Rimam.

³²Kicwag ye ra Bitrus ti itaen ti ta te wu ru, amaa, aba ter ba pxem shwu u nung rimenn ijwe Yesu ku jaen wurwur. Aba nung ande ifaen ba ti tsi te wu.

³³Ti ande ba ya Yesu ta u nwunn ku ru, Bitrus ri te Yesu baa, “Itsekuru-m, i nyang ti ati ta ike. Ati u kyae afug ita, kinjo ā si ana-fu, kinjo ama ā si ana Musa, iti ita ama ā si ana Eliya.” Bitrus nung-wu imbyi ira yi ti awu ri be

³⁴Ti ira unju ti awu ri ne, kubyi si ba kukyi ba. Ti aba ku sisang kubyi ne, ikyenricwu ye ba.

³⁵Ama aba fxen afxenjwin uwae kubyi ku ri baa, “Awune si Umbae-m ti ame tsab ra. Ni fxen wu!”

³⁶Isim ti afxenjwin ri ira yine, aba nung Yesu tsi kinjo rikaen-wu. Ande ti putsa wu sa ira yine meme tsi riyaen utob-ba. Kiye wu, a tsag te-ba unde iki ira risu iken ti aba nung kitaen rikwen atang be.

³⁷Ucwefam-yi ti Yesu ti ande ti putsa-wu ita sī kitaen rikwen atang si ba, ande yang-ba ru ba tu Yesu.

³⁸Unde iki ye ra unju tso baa, “Unde tiyang, ame ku jwam fu risu uyin-m wune, awu kinjo-wu amam ti ame mbae.

³⁹Rijwen titibi ku byinn wu u ku nda wu ku taen ira u ku tug ufunn unju. Rijwen wu ku byinn wu si riben u ku nda wu shir yaen tag rimenn-wu meme u ku cwe-wu ti wu na u ruye ijwe umbae wu cwucwo be.

⁴⁰Ame jwam ande ti putsa-fu ama ti a na jae ruye rijwen titibi wu, ama aba nde num-ba.”

⁴¹Tiri Yesu ri baa, “A a! Ani ande ti kiyiku! Ani ku ru-ni kubenti be! Ani bom pang-ni risu. Ame u som te ni u ye utob te ni ka asang imwa?” Ama awu ri te ite umbae wu baa, “Pu uyin-fu ru ba ike!”

⁴²Ti ti umbae wu ru ku ba ahan, rijwen titibi wu byinn ra wu jwunnsi riben u nda wu ijwe-wu ku fufwer. Ama Yesu fwan rijwen titibi wu kibyag u nwangru umbae wu u sa wu kafe na ite-wu.

⁴³Ayib fur meme ande ti funn atang ikyaen ti, aba nung rurob na Rimam. Kiye ti ande ti funn ku kab iken ti fur ayib ti Yesu nde ne, awu ri te ande ti putsa-wu baa,

⁴⁴“Ni naa atong ti ni fxen ira-m yine. A u sa Umbae Unde jaebci!”

⁴⁵Amaa, aba nungye-ba imbyi ira yi ti Yesu ri ne be. A sa imbyi ira yi tam-ba tam ikyaen ti aba na nung-ba yi be. Ama ikyenricwu ye ba ti aba u rang wu rang.

⁴⁶Kiye iki ishaen ti shaen nwunn kutampwa ande ti putsa Yesu baa, aye ti na rob siskeb meme uwae-ba na.

⁴⁷Yesu nungye ira ti aba ku kab utob-ba u ye ra umbae kitinying iki ba tsi uwe-wu.

⁴⁸Awu ri te ande ti putsa-wu baa, “Unde ti a kyangte umbae uwae rinyi-m awu kyangte pu wu ame ama. Cwucwo unde ti a kyangte m, awu kyangte pu wu unde ti tom me ru ba, ikyaen ti, unde ti yib siskeb uwae-ni si unde ti ko siskeb uwe Rimam.”

⁴⁹Yohana sa ra unju tso baa, “Itsekuru, ati nung unde iki ku jae ru rijwen titibi ijwe ande yi rinyi-fu. Ati ri te wu baa, awu na ya ta, ikyaen ti, awu fa-wu uwae-ti be.”

⁵⁰Yesu ri te wu ti ande ti putsa-wu ti tsitsi baa, “Ni byang kyi-ni awu be, ikyaen ti, unde ti a si-wu unde ti rika-ni be, awu u si unde ti ure-ni.”

⁵¹Ti usir ti a u sa Yesu tso yi apupwen tiri kyang yaen pu yi, awu sa uwae tsi baa, awu na u ye fengo ti ku ru yi Urushelima.

⁵²Awu tom atom ru uwe. Ande bane ru ka sang uwae umbae uten ti Samariya iki ikyaen ti a na u ru ka sha uwog tsika wu.

⁵³Amaa, ti awu ka sang atang ande ti uwae uten atang kyangte-ba wu be, ikyaen ti, awu sa uwae tsi mam pu wu baa, awu na u ka Urushelima.

⁵⁴Kiye ti ande ti putsa-wu Yakubu ti Yohana sae iken yine, a ri baa, “Itsekuru, afu ku sha ti ti na jwam urwa si apupwen ba twenji ande bane a?”

⁵⁵Yesu kafe uwe tag ba u fwan ba kibyag.

⁵⁶Ama meme-ba nwunn u ru yi imbae uten iki.

⁵⁷Ti aba nwunn u kyang ku ru fengo, unde iki ri te Yesu baa, “Meme uwog ti afu a ku ru yi atang ame u putsa fu.”

⁵⁸Yesu ri te wu baa, “Ijwong ti kutur ta te iwae-yi, inung ama site afug-yi, amaa Umbae Unde site-wu uwog ti nae be.”

⁵⁹Awu ri te unde iki cwucwo baa, “Putsa m!” Amaa unde wu ri baa, “Itsekuru, ame u ru ka nji ite-m titawe.”

⁶⁰Yesu ri te wu baa, “Ya ande ti cwu pu ba ta ti a nji rukom atso. Ana-fu si ti fu na ru ti ka ri ira Kujwokwe Rimam te ande.”

⁶¹Unde iki cwucwo ri te Yesu baa, “Itsekuru, ame u putsa fu, amaa ame u ru ka tē ande ti kununn-m titawe.”

⁶²Yesu ri te wu baa, “Unde ti a kú, ku tom ritom u ku sae ayib isim, awu ko-wu ti wu sang Kujwokwe Rimam be.”