Read kutep Yohana 10 Bible Online

Yohana 10 - kutep bible

Yohana 10

¹“Ame ku ri te ni kubenti, asiti unde a ku sha ti wu na sang rukug mbawen, awu a sang-wu ufu rukug mbawen be, u ru ka tso kiye iki, unde wune si unde ti riyib.

²Unde ti a ru tsa ufu rukug wu sang, awu ti si unde ti ku shi mbawen yi.

³Unde ti ku tsi kyi ufu kusog atang ku mbubta na wu ufu ko kiye titini. Mbawen yi ku fxen afxenjwin-wu. Awu ku kunn yi ti rinyi-yi u ku pu yi ruye ise.

⁴Kiye ti awu a pu yi ruye tag pu wu ise, awu ku ta uwe. Ayi ku putsa wu, ikyaen ti, ayi nung pu yi afxenjwin-wu.

⁵Ayi ku cwe-yi ti yi u putsa unde ti rikyen be. Ayi u ter wu ter ikyaen ti, ayi fxen ye-yi afxenjwin-wu be.”

⁶Yesu sunn na ba ira yine amaa aba nungye-ba imbyi yi be.

⁷Ikyaen yine Yesu ri te ba baa, “Ame ku ri te ni kubenti, ame ti si ufu rukug mbawen ayi.

⁸Ande ti ru ba uwe-m meme-ba si ande ti riyib ama mbawen yi fxen-yi ira-ba be.

⁹Ame ti si ufu kusog. Unde titini ti a ru tsa uwog-m u sang uwae, awu u tu itinwangru. Awu u sang u ruye, ama u tu uwog ti irum shab pyipyipyab.

¹⁰Unde ti riyib ku ru ba ikyaen ti wu u yib iken. Awu ku wen unde. Awu ku ye iken ndembeb ndembeb ama. Ana-m ame ba ikyaen ti ande na tu unyang — unyang ti rimunn-yi.

¹¹“Ame ti si ukwe asinn ti ti shi. Unde ti ku nungkyi asinn nyinyang ku cwe ti wu na u cwu ikyaen iken ti shi-wu.

¹²Unde ti a yiyae ba, mbawen yi si-yi ana-wu be. Kiye ti awu a nung mbuku ru ku ba, awu u ter ru u ya iwen yi ta. Ama mbuku ba ku ye mbawen yi, ayi ama u ter yaen shag kyi fe kutur meme.

¹³Awu unde wu ku ter ru ikyaen ti, awu si unde ti a kunn wu kunn ru ba ku nde wande aser amam. Awu u sa uwae tsi-wu risu iwen yi be.

¹⁴Ame ti si ukwe asinn ti ti shi. Ame nung pu m mbawen-m ayi. Ayi ama nung pu yi ame.

¹⁵Pangma ti Itse-m nung me, ame ama nung Itse-m. Ame cwe ti m na u cwu ikyaen ti aba na nwangru.

¹⁶Mbawen-m iki ta atang ti ta-ba uwae kumbub wune be. Ame u ka pu yi ba kang. Ayi u fxen afxenjwin-m, ayi u ru ba te ayine u si kumbub kinjo, unde ti ku shi yi shi ama u si kinjo.

¹⁷“Itse-m site ure te m ikyaen ti, ame cwe pu m ti m na u cwu. Ame cwe ikyaen ti m u tu kyi unyang-m cwucwo.

¹⁸Si-yi unde iki ti u sa ruye unyang-m be. Ame ti cwe u sa ruye wu ti kujwo-m. Ame site kuko ti m u sa ruye unyang wu, ame site kuko ti ame u sa wu kafe sang ti atang. Itse-m ti nda m kuko yine.”

¹⁹Ira yi ti awu ri ne na itikanta sang ba kyi kutampwa na Mbayawuda cwucwo.

²⁰Ariki yang-ba akwen uwae-ba ku ri ira risu Yesu baa, “Awu site rijwen titibi, risu-wu ka fife. Imi ti nde titawe ati ku fxen ira-wu?”

²¹Ama ariki ku ri baa, “Unde ti site rijwen titibi ku ri ira pangma ti unde wune ku ri ne njwaa? Kusung titibi u mbubta tu ayib ande ti mbumbub a.”

²²Ishaen upaen ba pu yi, ama Yesu kafe ba ti Urushelima ti wu na u nde ukwab na Mbayawuda ti a ku tangsom ti kiye ti a yerkob kusog Rimam.

²³Usir iki awu ta kusog Rimam tiyang u ku kyang ikyin uwae ukag iki ti Ukwe Solomon mbye ren fa kusog Rimam.

²⁴Ande ti Yawuda funn pakob wu u ku ri baa, “Afu nde rimang u ya ti ta uwae kufub? Asiti afu a si Unde wu ti Rimam Tsab Tsi, ri te ti ti paenine.”

²⁵Yesu ri te ba baa, “Ame ri te pu m ani ti kucang akwen, ama ani ru-ni uwae kinjo be. Wande ti ku fur ayib ti ame ku nde yi rinyi na Itse-m, ayi ti ku tatso ni itso unde ti ame si.

²⁶Iken ti nde titawe ani ku ru-ni uwae kinjo uwog-m be si ikyaen ti, ani fa-ni uwae kumbub iwen-m be.

²⁷Iwen-m ku fxen afxenjwin-m, ame ama nung pu m aba, aba ama ku putsa m.

²⁸Ame ku nda ba unyang ti tsi kukunn, aba u cwu-ba cwu cwucwo be, ama unde iki ta-wu ti wu u rwae mbe ba ru uwog-m be ama.

²⁹Itse-m, awu ti sa ba na m kujwo, awu skeb pu wu iken meme ti kuko. Ikyaen yine, unde iki ta-wu ti wu u jae mbe yi ru kujwo Itse-m be.

³⁰Ame ti Itse-m si iken kinjo.”

³¹Ti aba ande ndufu uten fxen ira yine, aba tob kyi atxom cwucwo ti a na u jwunn wu atang.

³²Yesu ri te ba baa, “Itse-m nda m wande ti m na nde, ama ame nde pu m wande ti tinyang yang-yi akwen uwe-ni. Ititini uwae-yi ti ani ku sha ti ni u jwunn m atxom risu-yi?”

³³Aba ande ndufu ri te wu baa, “Ati ku jwunn-ti afu atxom ikyaen wande ti tinyang be, ati ku jwunn fu atxom yine ikyaen ti, afu ku rimbeb rinyi Rimam. Afu ti si unde, ama ku sha ti fu na u myae risu-fu ti Rimam!”

³⁴Yesu ri te ba baa, “Uwae Kutsingken na Icwe-ni a bae atang baa, Rimam na ri te ande iki baa, ‘Ani si anyisu Rimam[19].’

³⁵Ati nung pu ti baa, Ande ti awu ku kunn ba uwae Kutsingken-wu baa, anyisu Rimam, si nyáng ande amam. Fengo ta-yi ti Ira yine uwae Kutsingken Rimam u ka fife be. Ikyaen yine, asiti Rimam ri baa, aba ande ba ti paembe ira-wu na si anyisu Rimam,

³⁶ame ama re? Awu Itse-m tsab ra m u tom m sang ba yi utense. Ani nde rimang titawe u ku ri-ni baa, ame na rimbeb rinyi Rimam kiye ti ame ri baa, ame na si Umbae Rimam?

³⁷Asiti ame a ku nde-m wande Itse-m be, ni ru-ni uwae kinjo uwog-m be.

³⁸Amaa asiti ame a ku nde wande Itse-m, ko ani a ru-ni uwae kinjo uwog-m be, ni ru uwae kinjo uwae wande ti ku tso kuko Rimam ti ame ku nde. Ani a nde ahan, ani u nungye baa, Itse-m na ta uwae-m, ame na ta uwae Itse-m ama.”

³⁹Kiye wune aba ku kwab ti a na u ye kyi wu cwucwo, ama awu shinwang ru kutampwa-ba.

⁴⁰Yesu nwunn ya uwog wune ta u yen uyinn ti Yordan u kafe ru ti yi uwog ti Yohana ku nde na ande batisma atang ti kucang u ru ka som atang.

⁴¹Ande yang akwen ru ba tu wu atang u ku ri baa, “Yohana nde-wu wande iki ti ku tso kuko na Rimam be, amaa meme ira ti awu ri risu unde wune si kubenti!”

⁴²Ikyaen yine ande yang-ba ti ta atang ru uwae kinjo uwog-wu.