Read kutep Yohana 12 Bible Online

Yohana 12 - kutep bible

Yohana 12

¹Ayi tsitsi usir itsongnjo titawe ti aba u ci Ukwab Itiyafe. Yesu ru ka uten Betani, uwog ti Lazaru unde ti awu kunn nwunn wu uwae kuskab ku nae atang.

²Usir jwo ureb, Lazaru ti ambakaya-wu nde iken ti ci na wu atang. Marta ti ku kan wuci yi na ba. Lazaru ti Yesu ti ande ti putsa wu ta tetso uwog tebur atang.

³Tiri Mberimu ru ba ti iturbasa kindob iki ti a kyae yi ijwe ipab nardi. Kindob yine site aser ko timambe. Ama awu sa yi yaen si afxen Yesu u pu ikyinn risu-wu fen yi atang. Kuyang kindob yi shag kyi fe uwae kusog atang meme.

⁴Ama Yawuda Iskariyoti ti si kinjo uwae ande rijwe asu ifaen ba ti Yesu tsab, awu unde wu ti u ru ba ye Yesu jabci, ri baa,

⁵“A! A! Imi ti nde a sa kindob yine jabci-ba, ama ndeya ande ti rikaen te aser-yi be. Aser-yi u si ayaen aser azurfa ukob ita.[22]”

⁶Awu Yawuda ri ira yine ikyaen ti, awu si unde ti riyib, ayi si-yi ikyaen ti awu ku nung risi ande ti rikaen be. Awu ti si unde ti ku ye su aser na ande ti putsa Yesu. Awu ku ci kob aser iki atang ikyaen iken ti awu ku sha.

⁷Ama Yesu ri baa, “Ya wu ta! Awu sa kindob yine tsika ikyaen usir ti a u ba nji m atang.

⁸Ko kiye titini ande ti rikaen te ni ta tetso, amaa ame u te ni ta-m tetso ko kiye titini be.”

⁹Ande yang-ba akwen fxen baa, Yesu na ta uten Betani. Aba nwunn ru yi atang. I si-yi ikyaen Yesu amam ti a ter ru ba be. Aba ku sha ti a na u ru ka nung Lazaru unde ti Yesu kunn nwunn uwae itikicwu.

¹⁰Ikyaen yine akwen Rimam tiyang ku myae ira risu Lazaru ti a na u wen wu wen ama.

¹¹Ikyaen ti, ayi si ikyaen-wu nee ande yang akwen ter saen ba ku ta u ku ru uwae kinjo uwog Yesu.

¹²Ucwefam-yi, ande meme ti ru ba uwog Ukwab Itiyafe fxen baa, Yesu na ta fengo ru ku ba yi Urushelima.

¹³Ikyaen yine aba pye asaen itu u pu ti a na u ru ka kyang te wu fengo. Aba nyae ira baa, “Ti teb Rimam roo! Itinyang ā ta risu awu ti ba yi rinyi Rimam!”

¹⁴Yesu sha tu umbae ikyinnsu u tso ka som tsa atang, pangma ti a bae uwae Kutsingken Rimam baa,

¹⁵“Kyen-fu ikyenricwu be, afu Mbawandab Siyon! Ukwe-fu ru ku ba yi uwog-fu tine. Awu tso umbae ikyinnsu ru ku ba.”

¹⁶Kiye ti iken yine ku nde, ande ti putsa Yesu nungye-ba imbyi ira yine be, amaa isim ti Yesu nwunn pu wu uwae iticwu ti kuko ukwe-wu titawe aba tangsom baa, a na bae ira risu iken yine uwae Kutsingken Rimam, aba ama na nde pu ba iken yine ikyaen-wu.

¹⁷Ande ba ti te Yesu ta te atso kiye ti awu kunn nwunn Lazaru, sa ira yi kyang u ri te tag pu ba ande.

¹⁸Iken ti nde titawe ande yang akwen ru ba byir uwog wu, si ikyaen ti, aba fxen pu ba baa, awu na nde wande ti ku fur ayib wune.

¹⁹Ti ande ti kumbub Farisi nung iken yine, aba ku ri te atso baa, “Ni nung, ati nde tu-ti iken iki be. Ni nung, utense meme ter putsa wu ku ru.”

²⁰Ande ti Helene iki ta uwae ande ti tso ba Urushelima ikyaen ti a u fen Rimam kiye na ukwab.

²¹Aba ru ba uwog Filip, awu unde wu ti ru uten Betisaida yi uten Galili ba. Aba ri te wu baa, “Itse, ati ku sha ti ti u nung uwe Yesu.”

²²Filip nwunn u ru ka ri te Andarawu, ama meme ifaen-ba ru ka ri te Yesu.

²³Yesu ri te ba baa, “Kiye ru ba pu yi ti ande u nung kuko na Umbae Unde.

²⁴Ame ku ri te ni kubenti, riyáen awum u waen-wu awaen amen be, se iken ti aba a sa wu tso riben awu a nde ma awu na rwa mbub itawe. Asiti awu a rwa mbub u ru pu inja tawe awu u waen awaen tiyang.

²⁵Unde titini ti awu a sa uwae tsi skeb risu unyang-wu utense ike, awu u shanum unyang-wu ti kubenti. Amaa unde titini ti awu a ku pyir unyang-wu utense ike, awu u site unyang ti tsi kukunn.

²⁶Unde titini ti awu a baa, awu na u nde na m wande, awu ā putsa m, ikyaen ti, ko aka ti ame a kyang atang, awu umbae kufxen-m te me u ta te atso. Unde titini ti ru ba ku nde na m wande, Itse-m u nda wu kuko.”

²⁷Yesu ri ama baa, “Ame ku yer anying utob tine. Ame u ri ana-m baa imi? Ame u nde tu ti m u jwam Itse-m baa, ‘Itse-m, sa rikaen na kiye wune ru uwog-m,’ amaa ayi si ikyaen rikaen yine né ame ru ba utense ike.

²⁸Afu Itse-m, nde iken ti afu u tu rurob ukwe-fu atang.” Ti ritsen Rimam ri ira apupwen baa, “Ame tatso pu m rurob ukwe-m, ama ame u nde yi cwucwo.”

²⁹Ande ti funn tsi atang fxen afxenjwin-wu, a ku ri baa, “Imam ti taen!” Ariki ri baa, “Iyee. Atom Rimam ti apupwen ti ri ira te wu!”

³⁰Ama Yesu ri te ba baa, “Afxenjwin yi ti ri ira ne si-yi ikyaen na-m be, ayi si ikyaen-ni.

³¹Ayine ti si kiye ti a u pwen utense rikwen. Tine a u mbe ra ukwe na utense wune kujwo Shetann, u rwae wu ru ye.

³²Ama kiye ti a ye ra m nwunn ritsen ame u shir ande meme ru ba yi uwog-m.”

³³Awu ku ri ira yine ikyaen ti ande na nung itso iticwu ti awu u cwu.

³⁴Ande ti funn atang ri te wu baa, “A bae uwae icwe-ti baa, Unde wu ti Rimam Tsab Tsi na u som kukunn ti unyang. Imi ti nde titawe afu ku ri baa, aba na u ye wu na nwunn ritsen u wen wu? Umbae Unde ti afu ri ne awu si aye?”

³⁵Yesu ri te ba baa, “Uwog ti saen kyag u te ni ta tetso uwae kiye kpang ahan cwucwo. Kiye wune ti uwog ti saen kyag awune te ni ta tetso, ni kyang-ni ikyin-ni ti uwog ti saen paenine ti atang, ikyaen ti, unde ti ku kyang ikyin uwae kufub u ku nung-wu uwog ti awu ku ru yi atang be.

³⁶Ame ku ri te ni, ru uwae kinjo uwog unde wu ti si Uwog ti Sisaen ti ti awu te ni ta tetso, ikyaen ti ani ama ā si uwog ti sisaen uwog ande iki.” Isim ti Yesu ri mam ira yine awu nwunn u ru ka tam uwog ti ande na u tu-ba wu be.

³⁷Ko ti awu nde wande tiyang ti tsotso uwe ande, aba ru-ba uwae kinjo uwog-wu be.

³⁸Iken yine nde ikyaen ti ira ti Ishaya bae na ā ba kumunn. Awu ri baa, “Itsekuru, aye ti ru kubenti uwae ira ti ati ri? Afu tso kuko ukwe-fu, aye ti cwe?”

³⁹Ande bane ru-ba uwae kinjo be, pangma ti awu Ishaya ri kyi cwucwo baa:

⁴⁰“Rimam mbúb pu wu aba ayib, u yirkyi pu wu aba utob ikyaen ti aba ā sae tu-ba uwog cwucwo be, u kab ye-ba ira ti utob-ba be, be aba u kafe ba uwog-m ama ame ú nwangru ba uwae kicaeb-ba.”

⁴¹Ishaya ri ira yine ikyaen ti, awu sae pu wu riyinn Yesu ama ri ira risu-wu.

⁴²Ko ti ayi si ahan, ande ti uwe uten yang-ba akwen ru uwae kinjo uwog Yesu. Amaa ikyaen ti aba ku kyen ikyenricwu ande ti kumbub Farisi, a ri-ba ira iki risu-yi be. Aba ku kyen ricwu baa, a na u rwae ba rwae kusog Rimam.

⁴³Aba ku sha ti ande na nda ba kuko skeb kuko ti ku ru uwog Rimam ba.

⁴⁴Uwog ne Yesu ya iskin baa, “Unde ti a ru uwae kinjo uwog-m, awu ru-wu nyang uwae Kinjo uwog-m be, awu ru uwae kinjo uwog awu ti tom m ba ama.

⁴⁵Unde titini ti a nung m ti ayib, awu nung AWU ti tom me tom ba.

⁴⁶Ame sang ba uwae utense ike ikyaen ti m u si uwog ti saen, ikyaen ti unde titini ti a ru uwae kinjo uwog-m awu na ā som-wu uwae kufub cwucwo be.

⁴⁷Unde titini ti a fxen ira ti ame ku ri u putsa-wu ayi be, awu u sang uwae rikwen. I si-yi ame ti u pwen wu rikwen be. Ame sang ba-m utense ikyaen ti m na u pwen ande rikwen be, i si ikyaen ti m u nda ba unyang.

⁴⁸Unde titini ti a pyir ira-m u pae mbe-wu ira ti ame ku ri te wu be, rikwen u ye wu. Ayi si ira ti ame ku ri te wu ti u ye wu usir ti ricwunnkyi.

⁴⁹Ira yi ti ame ku ri, ame ku ri-m ayi ti risu-m be, i si awu Itse-m ti tom m ba, awu ti nda m ira ti ame ku ri.

⁵⁰Ame nung pu m ama baa, ira ti Itse-m ri si iken ti ku nda ande unyang ti tsi kukunn. Ira ti ame ku ri si iken ti awu Itse ri te m baa, ame na ri.”