Read kutep Yohana 14 Bible Online

Yohana 14 - kutep bible

Yohana 14

¹Yesu ri te ba baa, “Ni yer-ni anying utob be. Ru uwae kinjo uwog Rimam! Ru uwae kinjo uwog-m ama.

²Uwog ti som munnae kununn Itse-m akwen, ama ame ku ru ti m ka kyae na ni uwog. A baa, ayi na si-yi ahan be, ame ú ri te pu m ani.

³Isim ti ame a ru ka kyae mam pu m uwog wu ikyaen na ni, ame u kafe ru ba pu ni ru yi uwog ti ame ta atang, ikyaen ti uwog ti ame som atang ani u som atang ama.

⁴Uwog ti ame ku ru yi atang, ani nung pu ni fengo-wu.”

⁵Toma ri te wu baa, “Itsekuru, ati nung-ti uwog ti afu ku ru yi atang be, ati u nde rimang u nung fengo?”

⁶Yesu ri te wu baa, “Ame ti si fengo, ame ti si kubenti, ame ti si unyang. Unde iki u ka-wu uwog Itse-m be, se awu a ru tsa uwog-m.

⁷“Asiti ani a nungye pu ni ame, ani u nungye pu ni Itse-m ama. Iken ti tsi tine ru fe yi uwe ani nungye pu ni awu u nung pu ni awu ti ayib ama.”

⁸Filip ri te wu baa, “Itsekuru, tatso ti Itse-fu awu. Ayine amam ti si iken ti ati ku sha.”

⁹Yesu ri baa, “Filip, ame te ni ta tí kucang akwen, ama afu nungye-fu ame khika be a? Unde titini ti awu a nung pu wu ame, awu nung pu wu Itse-m awu ama. Imi ti nde titawe afu jwam baa, ame na tatso ni Itse-m awu?

¹⁰Filip, afu ru-fu uwae kinjo baa, ame ta uwae Itse-m, Itse-m ta uwae-m, be a? Ira ti ame ku ri te ni ru yi uwog-m ba be. Ayi si awu Itse-m ti ta uwae-m, ti ku nde wande-wu uwae ijwe-m.

¹¹Ni ru kubenti te ira ti ame ri te ni baa, ame ta uwae Itse, awu Itse ama ta uwae-m. Ko asiti ani a u ru-ni uwae kinjo ikyaen ira-m yine be, ni ru uwae kinjo ikyaen wande ti ame ku nde ti ku tso kuko na Rimam.

¹²“Ame ku ri te ni kubenti baa, unde titini ti a ru uwae kinjo uwog-m, awu u nde iken ti ame ku nde ama. Awu u nde wande ti skeb ana-m skeb ama, ikyaen ti, ame ku ru yi uwog Itse-m.

¹³Ama ko iken titini ti ani a jwam yi rinyi-m meme, ame u nde yi ikyaen ti ande na u nda Itse-m kuko ikyaen Umbae-wu.

¹⁴Asiti ani a jwam iken iki yi rinyi-m, ame u nde yi na ni.

¹⁵“Asiti ani a ye ure te m, ani u ye su icwe-m.

¹⁶Ame u jwam Itse-m, awu u nda ni unde ti u ri bom ni utob u te ni u som tetso ru fe yi uwe.

¹⁷Awu si Kusung Rimam, awu ti ku tatso ande kubenti. Ande ti utense wune u kyangte fob-ba awu be, ikyaen ti, aba sae tu-ba wu be, u nungye-ba wu be. Amaa ani nung pu ni awu ikyaen ti, awu u ba te ni som tetso u ku som uwae utob-ni.

¹⁸Ikyaen na yine, ame u ya ni ta-m uwae rikaen-ni be. Ame u kafe ba tu ni.

¹⁹Ayi u tsi-yi tsi be ande ti utense u nung-ba uwe-m cwucwo be, amaa ani u nung uwe-m. Ani u som ti user ikyaen ti, ame tsi user.

²⁰Ru ba sang usir wu, ani u nungye baa, ame ta uwae Itse-m. Ani u nung ama baa, ani ti risu-ni ta uwae-m, ame ama ta uwae-ni.

²¹“Unde titini ti a paembe Icwe-m u ku nae risu riben te yi, ayi si unde wune ti site ure te m. Unde ti ku ye ure te m, Itse-m u ye ure te wu. Ame ama u ye ure te wu u tso risu-m uwog-wu.”

²²Uwog ne Yawuda rang baa, “Itsekuru, ayi u nde rimang ti afu u tso risu-fu uwog-ti u tso-fu risu-fu uwog ande ti utense be?” (Yawuda ti rang ira yine si-wu Yawuda Iskariyoti be, awu si Yawuda iki.)

²³Yesu ri te ba baa, “Unde titini ti a ku ye ure te m, awu u nae risu riben te ira-m ti ame ku ri. Itse-m u ye ure te wu, ama ame ti Itse-m u ru ba te wu som tetso.

²⁴Unde titini ti ye-wu ure te m be, awu ku nae-wu risu riben te ira-m be. Ni tangsom ama baa, ira ti ani fxen uwog-m ne si-yi ana-m be, ayi ru uwog Itse-m ti tom me tom ba.

²⁵“Ira yine ame ku ri te ni ti kiye ti ame te ni ta tetso ti atang.

²⁶Awu Kusung ti Saen Kyag, Kusung Itindeya, ti Itse-m u tom si ba uwog-ni yi rinyi-m, awu u kwen tatso ni iken meme, awu u tangsom na ni iken ti ame ri te ni meme.

²⁷“Tine, ame ku nda ni kujimshwur. Itso kujimshwur wune si-yi pangma ana utense be. Ikyaen na yine, ni yer-ni anying utob be, ni kyen-ni ikyenricwu be.

²⁸Ani fxen ame ri te ni baa, ame na ku ruru, ama ame na u kafe ru ba ti uwog-ni. A baa, ani na ye ure te m, ani ú tsen utob ti ame ku ru yi uwog Itse-m, ikyaen ti, awu Itse-m skeb pu wu ame.

²⁹Ira yine ame ri te pu m ani tine, ti ti iken yi nde-yi khika be, ikyaen ti kiye ti ayi a ru ba ku nde ani u nung baa, ira-m na si kubenti.

³⁰Ame u ri-m ira kuko te ni cwucwo be, ikyaen ti, awu Shetann, awu ti ku nae ukwe uwae utense ne, ru ku ba. Awu site-wu kuko iki risu-m be,

³¹amaa ame ku sha ti ande ti utense ā nung baa, ame na ye ure te Itse, ama na ku nde iken ti awu ri te m meme. “Ni nwunn ti ti ru uwog iki.”