Read kutep Yohana 15 Bible Online

Yohana 15 - kutep bible

Yohana 15

¹“Kubenti, ame si pangma kutuku anam ti tinyang. Itse-m ti si unde ti risaen.

²Kujwo kutuku ti a ku waen-wu awaen be, Itse-m u pyera wu ruru. Ama awu ku kyaenyang ajwo ti ku waen awaen ti yi na waen awaen kora fa.

³Ana-ni, a kyae nyang pu ba ani yi fengo na ira ti ame kwen na ni.

⁴Ni baefa te m, ame ama u baefa te ni. Kujwo kutuku ti a baefa-wu te rimenn kutuku be, awu u waen-wu awaen be. Ti mbwe-yi, asiti ani a baefa-ni te m be, ani u waen-ni awaen be.

⁵“Ame ti si rimenn kutuku wu, ani ama ti si akyikya-wu. Unde ti a baefa te m, ame ama u baefa te wu, awu u si kujwo kutuku ti ku waen awaen timambe. Ani u nde tu-ni iken iki be, se ti ame a te ni ta tetso.

⁶Asiti unde a kata te m, a u sa wu jwunn tika, awu u wombeb. Akyikya kutuku ti pangma ayine, a ku byir yi ru ka jwunn si uwae urwa, ayi ku ten mbumbub.

⁷Asiti ani a ren risu te m u ye su ira-m uwae utob-ni, ani u nde ye ti ni u jwam iken ti ani ku sha meme, ama a u nde yi na ni.

⁸Iken ti ku nda Itse-m kuko ti rurob si ti ani ku waen awaen timambe. Ayine ti ku tatso ama baa, ani na si pu ni ande ti ana-m ti kubenti.

⁹Ame site ure te ni pangma ti Itse ye ure te m. Ni tsikunn ti uwae ure ti ana-m yine.

¹⁰Asiti ani a ku nae risu riben te icwe-m, ani u tsikunn ti ku som usom uwae ure ti ana-m, pangma ti ame nae risu riben te icwe na Itse-m u tsikunn ti ku som usom uwae ure ti ana-wu ama.

¹¹“Ame ri te pu m ani ira risu ure yine ikyaen ti utob ti tsen-m ā ta uwae utob-ni. Ama ikyaen ti utob ti tsen-ni ā tsi ti rimunn.

¹²Ame ku fa ni kusen baa, ni tsikunn ti ku ye ure tetso, pangma ti ame ye ure te ni.

¹³Ure ti siskeb patag ti unde u ye te arwan-wu si ti awu u cwu ricwu ikyaen-ba.

¹⁴Asiti ani a nde wande te ira ti ame ri te ni, ani si arwan-m.

¹⁵Ame ku kunn-m ani baa apyi cwucwo be, ikyaen ti, upyi ku nung-wu iken ti unde ti kununn-wu ku nde be. Tine ame u kunn ni baa arwan-m. Ayine si iken ti nde ame ri te pu m ani meme ira ti ame fxen uwog Itse-m.

¹⁶I si-yi ani ti tsab m be. Ame ti tsab ni u tom ni atom baa, ani na ru ka waen awaen, awaen ti u tsi kukunn. Ayine si ikyaen ti Itse-m u nda ni iken meme ti ani jwam uwae rinyi-m.

¹⁷Ni fxen ira ti ame ku ri te ni: Ni ye ure te atso.

¹⁸“Asiti ande ti utense a sa ni kuka, ni tangsom baa, aba na sa m kuka titawe.

¹⁹A baa, ani na si ande ti utense, aba ú ye ure te ni ikyaen ti, ani ú si ande ti ana-ba. Amaa ame tsab ra ni ruye pu m uwae-ba, ani ama si-ni ana utense cwucwo be. Ayine ti si iken ti nde titawe aba ku sa ni kuka.

²⁰Ni tangsom te ira ti ame ri te ni kute baa, upyi na ko skeb-wu unde ti kununn-wu be. Ande aba ti nda m rikaen, aba u nda kang ni rikaen ama. Ande ti a nae risu riben te ira ti ana-m, aba u nae risu riben te ira ti ana-ni ama.

²¹“Meme rikaen ti aba u nda ni si ikyaen ti ani si ande ti ana-m, ikyaen ti, aba nung-ba unde wu ti tom me ru ba be.

²²A baa, ame na ru ba ri-m ira te ba be, riraen na ikentitibi ú ta-yi ukwae-ba be. Amaa ti ame ru ba pu m ne, aba si-ba ti kufur iki risu ikentitibi-ba cwucwo be.

²³Unde titini ti awu a sa m kuka awu sa pu wu Itse-m kuka ama.

²⁴A baa, ame na nde-m iken yine be, riraen iki ú ta-yi ukwae-ba be. Amaa tine aba nung pu ba iken ti ame nde, ama aba pyir m ti Itse-m meme u sa ti kuka.

²⁵Iken yine nde kang ikyaen ti iken ti a bae uwae Kutsingken na Icwe-ba na ā kumunn. Ikyaen ti, a bae atang baa, ‘Aba sa me kuka sa amen, imbyi-yi ta-yi be.’

²⁶“Kiye ti Itindeya wu a ba, awu ti ame u tom ru uwog Itse ba. Awu Kusung na kubenti. Awu u ru uwog Itse ba, u nda ande u nung ira ti kubenti risu-m.

²⁷Ani ama si ande ti u ri ira risu-m ama, ikyaen ti, ani te m som tetso ti kucang ru ba ku sang tine.