Read kutep Yohana 19 Bible Online

Yohana 19 - kutep bible

Yohana 19

¹Isim yine, Bilatus nda ba byinn Yesu kimbab.

²Akyirten ba ama sa ikajwo u cwin yi cwin pangma kubur ukwe u sa bur Yesu risu. Aba pu kutupwa iki ti tibyaen pangma ana ukwe sī wu

³ama u ba ku kunnji wu ira baa, “Unyang-fu ā kora ru yi uwe, Ukwe Mbayawuda!” Ama aba byinn wu kujwo uwe.

⁴Cwucwo Bilatus kafe ruye u ka tu ande ba ti funn atang u ri te ba baa, “Ni nung, ame u sa wu ruye na ni ti ni nung baa, ame na tu-m awu te riraen iki be.”

⁵Tiri Yesu ruye ise ti kubur ikajwo wune risu-wu, ti kutupwa ti tibyaen wune rimenn-wu. Ama Bilatus ri te ba baa, “Ni nung unde-ni awu ta ri!”

⁶Kiye ti akwen Rimam tiyang ti dogari ba nungye wu, aba tso ukunn baa, “Ni kwer wu! Ni kwer wu!” Ama Bilatus ri te ba baa, “Ni pu wu ka kwer-ni te ajwo-ni, ikyaen ti, ame tu-m awu te riraen iki be.”

⁷Mbayawuda aba ri te wu baa, “A bae uwae Icwe-ti baa, itso unde wune na cwu kang, ikyaen ti, awu ku ri baa, awu na si Umbae Rimam.”

⁸Kiye ti Bilatus fxen ira yine, ikyenricwu ye wu skeb ti kucang.

⁹Awu kafe sang ti yi kusog ukwe-wu u ru ka rang Yesu baa, “Afu ru aka ba?” Yesu mbub-wu unju be.

¹⁰Bilatus rang wu baa, “Afu u ri-fu ira te m be a. Afu nung-fu ti ame site kpakang ti m u saen fu ta, u site kpakang ti m u kwer wen fu be a.”

¹¹Yesu ri te wu baa, “Rimam ti nda fu kpakang wune. A baa, ayi na si-yi ahan be, afu ú site-fu ti kpakang iki risu-m be. Ikyaen yine, ikentitibi na unde ti ye me ba sang kujwo-fu beb skeb ana-fu.”

¹²Tsi kiye wu ru uwe, Bilatus kwab kang baa, awu na u saen Yesu ta, amaa Mbayawuda aba tsi kunn ti ku nyae ira baa, “Asiti afu a saen unde wune ta ayi ku tso baa, afu si-fu urwan Ukwe Roma be. Unde ti a ri baa, awu na si ukwe, awu tsi ukub te Ukwe ti Roma.”

¹³Kiye ti Bilatus fxen fe ira yine, awu pu Yesu ruye yi ise u ru ka som ti uwog ti a ku yer rikwen atang. A ku kunn rinyi uwog-wu baa, Rishen Siminti. Mbaibrane ku kunn uwog wu ti unju-ba baa, Gabata.

¹⁴Usir ti iken yine nde si riben usir tiyang na ukwab-ba ayi. Usir ta kitaen pampam. Ama Bilatus ri te ande ba baa, “Ukwe-ni awu ta ri.”

¹⁵Aba nghae ira baa, “Ni ye wu ru! Ni wen wu! Ni ye wu ru ka kwer kutuku ti cice!” Bilatus rang ba baa, “Ame u ye ukwe-ni ru ka kwer ané?” Ande ti uwe na akwen Rimam ri te wu baa, “Ati site-ti ukwe iki fa Ukwe Roma ifaen be.”

¹⁶Tiri, Bilatus sa Yesu na ba kujwo ti a na ye wu ru ka kwer. Ama aba akyirten ye wu ru,

¹⁷u ye kutuku ti a u kwer wu atang nae tsa wu ukwae. Awu nwunn u su wu ru yi kumbukunn iki ti a ku kunn wu baa, Uwog Kukoto Risu. (Yi unju Mbaibrane, a ku kunn wu baa, Golgota.)

¹⁸Atang a kwer Yesu fa kutuku tsi si kutampwa ande ifaen iki ti a kwer ba fa ituku ama. Kinjo ta kujwo ife-wu, ti ifaen ama ta kujwo rici-wu.

¹⁹Ama Bilatus bae ira ijwe iken iki u sa bae ijwe kutuku wu. Ira yi ti awu bae si, “Yesu unde ti Nazareti, Ukwe Mbayawuda.”

²⁰Mbayawuda yang-ba ru ba sae ira yine, ikyaen ti, uwog ti a kwer Yesu atang ta fifer ti uwae uka. A bae ira yi ti unju Mbayawuda, ti unju ande ti Roma, te kyi unju Mbahelene.

²¹Kiye ti akwen Rimam tiyang nung ira yi, aba ri te Bilatus baa, “Bae-fu baa, Ukwe Mbayawuda be. Bae baa, unde wune ri baa, awu na si Ukwe Mbayawuda.”

²²Bilatus ri baa, “Iken ti ame bae, ame bae pu m.”

²³Isim ti akyirten aba ye Yesu kwer mam pu ba risu kutuku, aba pu atupwa-wu u kata yi kumbub inje, unde titini uwae-ba tu ana-wu. Amaa, kutupwa-wu ti uwae, a ndxob wu ndxob. Unju kutupwa wu uwog ti a kob ren wu atang ama ta-wu be.

²⁴Ikyaen yine, akyirten aba ri tetso baa, “Ti shir yaen-ti ayi be. I nyang skeb ti ti caen iticaen ti ti nung unde ti u sa wu.” Iken yine nde ikyaen ti ayi ā kumunn iken ti a bae uwae kutsingken Rimam baa, “Aba kata atupwa-m tetso u pu atupwa-m ka na atso yi fengo na iticaen.” Ayine si si iken ti akyirten bane nde.

²⁵Ariki tsi fer ti kutuku ti a kwer Yesu fa atang. Aba si iya Yesu ti kaya iya-wu, ti Mberimu uwa Kiliyobas, ti Mberimu Magadalen.

²⁶Yesu nung iya-wu tsi atang, ti kinjo uwae atugbug-wu — awu ti Yesu cwe ira-wu timambe. Yesu ri te iya-wu baa, “Iya, nung umbae-fu ta re.”

²⁷Awu ri te unde wu baa, “Nung iya-fu ta re.” Tsi ti usir wu, awu unde ti putsa Yesu wune pu Mberimu ru ka som uwae kununn-wu.

²⁸Isim ayine, Yesu nung pu wu baa, wande-wu meme na mam tag pu yi. Ama ikyaen ti ira ti a bae uwae Kutsingken Rimam ā kumumunn, awu ri baa, “Ame ku fxen ti unwaen.”

²⁹Kitutong iki tsi atang ti munn te ambyi awaen anam ti fifab[24]. Aba sa soso ru ka tsi si uwae ambyi yine u sa wu fae si ukum u sa tso yi unju-wu baa, awu na shib ngwa.

³⁰Kiye ti wu shib ambyi ti fifab yine, awu ri baa, “Wande-m mam pu yi!” Tiri awu fur risu-wu si riben u sa cwu.

³¹Tiri Mbayawuda aba kafe ru ka jwam Bilatus baa, awu a cwe ira aba na u mber afxen ande ba ti aba ye kukwer ikyaen ti a na u nghang ba si yi riben. Aba nde iken yine ikyaen ti, usir wu si riben usir ikyinn-ba. Aba ku sha-ba ti akom ande bane na tsi ti atang ru ba ti usir ikyinn be. Usir ikyinn wune ama site rurob skeb tag ti tsitsi.

³²Ikyaen na yine akyirten aba ru ka mber afxen unde wu ti kucang, ti ana unde ti ifaen ti aba ye wu kwer te Yesu.

³³Ama kiye ti aba ru ba fob uwog Yesu, ti aba u nunung, awu cwu mam pu wu. Ikyaen yine aba mber-ba afxen-wu cwucwo be.

³⁴Amaa, kinjo uwae akyirten ba sa uti-wu ter kang Yesu ti ishi. Ti ritsen, anying ti ambyi kyebkyi.

³⁵Ira yine si ana unde ti sae iken yi te ayib u ku ri kubenti iken ti nde. Ira-wu ayi si kubenti ama awu ku ri te ni ira yine ti ni na ru uwae kinjo atang.

³⁶Iken yine nde ikyaen ti ira ti a bae uwae Kutsingken Rimam ā kumunn. Ikyaen ti, a bae baa, “Kukub rimenn-wu iki u mber-wu mber be.”

³⁷A bae kyi atang cwucwo baa, “Ande u sae unde wu ti a ter wu uti.”

³⁸Isim yine unde iki ti ru uten ti Arimateya, ti rinyi-wu si Yusufu, jwam Bilatus baa, Bilatus na a cwe, awu na nda wu riyae ti wu na u ye rukom Yesu ru ka nji. Yusufu wune si unde ti ku putsa Yesu ama, amaa, awu ku nde ana-wu ti kitam ikyaen ti, awu kyen ikyenricwu na ande ndufu Mbayawuda. Bilatus cwe. Yusufu ru ka ye rukom wu ru.

³⁹Awu Nikodemu, unde ti ru ba uwog Yesu kucang utitang né, putsa Yusufu ru ama. Awu kyang su kindob murr ti alo, ti ku nung kuyang ti tinyang. Usu yine, rurob-yi skeb kilo rijweta.

⁴⁰Aba ande ifaen bane ye rukom Yesu u cwin tag wu te atupwa pangma ti Mbayawuda ku nde kob te ande-ba ti cwucwu.

⁴¹Uwae rukong iki ta fer uwog ti a kwer Yesu atang, uwáe kutxú ti tishe ta atang ti a nji-ba unde iki atang khika be[25].

⁴²Ti usir wu si riben usir bikyinn na Mbayawuda, cwucwo ikyaen uwáe wu ta fer ba atang, aba ye rukom Yesu ru ka nae atang.